મુંબઈ: ઝવેરી બજારમાં આજે લાંબા સમયની તેજી બાદ મોટો ધરખમ ફેરફાર જોવા મળ્યો છે. મંગળવાર કિંમતી ધાતુઓ માટે 'કાળો મંગળવાર' સાબિત થયો છે, કારણ કે સોના અને ચાંદીના ભાવમાં જે રીતે ઘટાડો નોંધાયો છે તેણે રોકાણકારોને ચોંકાવી દીધા છે. ગઈકાલે જે સોનું ₹1.61 લાખની સપાટી વટાવી ગયું હતું, તે આજે ખુલતાની સાથે જ ₹1,300 થી વધુ તૂટ્યું છે. જ્યારે ચાંદીમાં પણ ₹2,100 થી વધુનો ઘટાડો જોવા મળ્યો છે.
 બજારના નિષ્ણાતોના મતે, આ કડાકો મુખ્યત્વે 'પ્રોફિટ બુકિંગ'નું પરિણામ છે. સતત ચાર દિવસની તેજી પછી વેપારીઓએ ઉંચા ભાવે સોનું વેચવાનું શરૂ કર્યું છે. આ ઉપરાંત, અમેરિકી પ્રમુખ ડોનાલ્ડ ટ્રમ્પના ટેરિફ વોરને લીધે સર્જાયેલી અનિશ્ચિતતામાં થોડી સ્પષ્ટતા આવતા રોકાણકારોએ સુરક્ષિત મનાતા સોનામાંથી નાણાં પાછા ખેંચવાનું મુનાસિબ માન્યું છે.
જો આપણે સર્વકાલીન ઉચ્ચતમ (All-time High) સ્તર સાથે તુલના કરીએ તો આ ઘટાડો નીચે મુજબ છે:
ધાતુ સર્વકાલીન ઉચ્ચતમ ભાવ (29 જાન્યુઆરી) આજનો ભાવ (24 ફેબ્રુઆરી) કુલ ઘટાડો
24 કેરેટ સોનું (10 ગ્રામ) ₹1,93,096 ₹1,60,295 ₹32,801
ચાંદી (1 કિલો) - ₹2,63,183 ₹1.56 લાખ+
ભાવ ઘટવા પાછળના 3 મુખ્ય કારણો
1. પ્રોફિટ બુકિંગ: ઉંચા ભાવનો લાભ લેવા રોકાણકારોએ મોટા પાયે વેચાણ કર્યું.
2. મજબૂત ડોલર: આંતરરાષ્ટ્રીય બજારમાં ડોલર ઇન્ડેક્સ મજબૂત થતા સોના પર દબાણ વધ્યું.
3. ભૌગોલિક તણાવમાં રાહત: ટ્રમ્પ વહીવટીતંત્રની નવી નીતિઓ પર સ્પષ્ટતા મળતા બજારમાં ફેલાયેલો ડર થોડો ઓછો થયો છે.
 બજારના નિષ્ણાતો માને છે કે 26 ફેબ્રુઆરીએ યોજાનારી યુએસ-ઈરાન પરમાણુ વાટાઘાટો બજારની આગામી દિશા નક્કી કરશે. જો આ વાટાઘાટો સફળ રહેશે અને વૈશ્વિક તણાવ ઘટશે, તો સોના અને ચાંદીના ભાવમાં હજુ પણ વધુ ઘટાડો જોવા મળી શકે છે.