નવી દિલ્હી :મુખ્યમંત્રી રેખા ગુપ્તાના નેતૃત્વ હેઠળની દિલ્હી સરકારે રાજધાનીની પરિવહન વ્યવસ્થા સુધારવા અને ગ્રામીણ વિસ્તારોને મુખ્ય શહેર સાથે જોડવા તરફ એક મોટું પગલું ભર્યું છે. મુખ્યમંત્રીએ ખર્ચ નાણાં સમિતિની અધ્યક્ષતા કરી હતી, જેમાં નજફગઢ ડ્રેઇનની બંને બાજુ બે-લેન રોડ બનાવવાના મહત્વાકાંક્ષી પ્રોજેક્ટને મંજૂરી અપાઈ હતી. આ પ્રોજેક્ટ પર કુલ ₹453.95 કરોડ ખર્ચવામાં આવશે.

   મુખ્યમંત્રીએ જણાવ્યું હતું કે આ પ્રોજેક્ટનો મુખ્ય ઉદ્દેશ્ય મુખ્ય રસ્તાઓ પર ટ્રાફિકની ભીડ ઓછી કરવાનો, મુસાફરીનો સમય અને ઇંધણનો વપરાશ ઘટાડવાનો અને વાહનોના ઉત્સર્જનમાં ઘટાડો કરવાનો છે. આ પ્રોજેક્ટ દિલ્હીના પરિવહન માળખાને સુધારશે અને રાજધાનીમાં વૈકલ્પિક ઇન્ટ્રા-સિટી કોરિડોર વિકસાવશે. દિલ્હી સચિવાલય ખાતે યોજાયેલી સમિતિની બેઠકમાં સિંચાઈ અને પૂર નિયંત્રણ મંત્રી પરવેશ સાહિબ સિંહ પણ હાજર હતા.

   આ પ્રોજેક્ટની વિગતો આપતાં મુખ્યમંત્રી રેખા ગુપ્તાએ જણાવ્યું હતું કે ઝાટીકારા પુલથી છાવલા પુલ સુધી ડાબા કાંઠે ૫.૯૪ કિલોમીટર લાંબો બે-લેન રસ્તો બનાવવામાં આવશે, જ્યારે છાવલાથી બસૈદરાપુર સુધી નાળાની બંને બાજુએ ૨૭.૪૧૫ કિલોમીટર લાંબો રસ્તો બનાવવામાં આવશે, જેની બંને બાજુ કુલ ૫૪.૮૩ કિલોમીટર લંબાઈ હશે. કુલ વિકસિત લંબાઈ ૬૦.૭૭ કિલોમીટર હશે.

   આ માર્ગ આઉટર રિંગ રોડ, ઇનર રિંગ રોડ, શિવાજી માર્ગ, પંખા રોડ, UER-2 (NH-9 રોહતક રોડ સાથે જોડાણ), નજફગઢ રોડ અને અન્ય મુખ્ય રસ્તાઓ સાથે જોડાણ પ્રદાન કરશે. બસૈદરાપુર ખાતે ઇનર રિંગ રોડ, કેશોપુર ખાતે આઉટર રિંગ રોડ, વિકાસપુરીમાં પંખા રોડ, કાકરોલા ખાતે નજફગઢ રોડ અને ધુલીસીરસ ખાતે UER-2 દ્વારા એરપોર્ટ અને દ્વારકા એક્સપ્રેસવે સાથે સીધી કનેક્ટિવિટી સ્થાપિત કરવામાં આવશે.

   મુખ્યમંત્રીએ કહ્યું કે આ પ્રોજેક્ટ ઉત્તમ નગર, વિકાસપુરી, નજફગઢ, બિજવાસન, ચાવલા, ગોયલા ડેરી, દ્વારકા, બાપ્રોલા, નીલોથી, પશ્ચિમ વિહાર, રાજૌરી ગાર્ડન અને IGI એરપોર્ટ સહિત અનેક વિસ્તારોને લાભ આપશે, જે ધનસાથી બસૈદરાપુર સુધીના ગ્રામીણ અને શહેરી વિસ્તારોને જોડશે. તે ગુરુગ્રામ સેક્ટર 104 અને સેક્ટર 110 સાથે જોડાણને પણ મજબૂત બનાવશે, જેનાથી દિલ્હી અને હરિયાણા વચ્ચે જોડાણ વધશે. દ્વારકા એક્સપ્રેસ વેથી જોડાયેલા ગાલિબપુર, રાવત મોડ, દૌરાલા, ઝુઝુલી, સારંગપુર, ધનસા, ઘુમ્મનહેરા, શિકારપુર, ખાટીકરા, કાંગનહેરી અને છાવલા જેવા ગામોને પણ બહેતર કનેક્ટિવિટી પ્રાપ્ત થશે. આ પ્રોજેક્ટ સરકારી જમીનની સુરક્ષા સુનિશ્ચિત કરવામાં પણ મદદ કરશે.