નવી દિલ્હી, તા.૨૫: કુદરતના મિજાજમાં ફરી એકવાર મોટો પલટો જોવા મળી રહ્યો છે. ભારતીય હવામાન વિભાગ (IMD) એ ચેતવણી આપી છે કે ઉત્તર ભારતના પર્વતીય વિસ્તારોમાં બે નવા વેસ્ટર્ન ડિસ્ટર્બન્સ સક્રિય થઈ રહ્યા છે. આ ભૌગોલિક ફેરફારોને કારણે ૨૬ ફેબ્રુઆરીથી માર્ચની શરૂઆત સુધી દેશના વિવિધ ભાગોમાં વરસાદ, હિમવર્ષા અને ગાઢ ધુમ્મસનું સામ્રાજ્ય જોવા મળી શકે છે.

પર્વતોમાં હિમવર્ષા અને મેદાની વિસ્તારોમાં ધુમ્મસ

હવામાન વિભાગના જણાવ્યા અનુસાર, ૨૬ અને ૨૭ ફેબ્રુઆરીએ જમ્મુ-કાશ્મીરના ઊંચાઈવાળા વિસ્તારોમાં હિમવર્ષા અને વરસાદની શક્યતા છે. તેની પાછળ પાછળ ૨૭ અને ૨૮ ફેબ્રુઆરીએ હિમાચલ પ્રદેશ અને ઉત્તરાખંડમાં પણ વાતાવરણ પલટાશે. આ તરફ પંજાબ અને હિમાચલના મેદાની વિસ્તારોમાં ૨૬ ફેબ્રુઆરી સુધી સવાર-સાંજ ગાઢ ધુમ્મસની ચાદર છવાયેલી રહેશે, જેના કારણે વાહનવ્યવહાર પર અસર પડી શકે છે.

દક્ષિણ અને પૂર્વ ભારતમાં પણ મેઘરાજાની એન્ટ્રી

માત્ર ઉત્તર જ નહીં, પરંતુ દક્ષિણ અને પૂર્વ ભારતના રાજ્યોમાં પણ મેઘરાજા મહેરબાન થશે. આંદામાન-નિકોબાર ટાપુઓમાં ૩૦ થી ૪૦ કિમીની ઝડપે પવન ફૂંકાવા સાથે વીજળીના કડાકા-ભડાકા સાથે વરસાદ પડી શકે છે. આ ઉપરાંત અરુણાચલ પ્રદેશ, પશ્ચિમ બંગાળ, સિક્કિમ, છત્તીસગઢ, કેરળ અને કર્ણાટકના ભાગોમાં પણ મધ્યમ વરસાદની આગાહી કરવામાં આવી છે. તેલંગાણામાં ૨૬ ફેબ્રુઆરીએ વાદળછાયું વાતાવરણ અને છૂટાછવાયા ઝાપટાની શક્યતા છે.

તાપમાનમાં વધારો: ઉનાળાના પગરવ?

એક તરફ વરસાદની આગાહી છે, તો બીજી તરફ ગરમી પણ પોતાનું જોર બતાવશે. હવામાન વિભાગના મતે, આગામી સાત દિવસમાં ઉત્તર-પશ્ચિમ અને મધ્ય ભારતના મેદાની વિસ્તારોમાં મહત્તમ તાપમાનમાં ૩ થી ૫ ડિગ્રી સેલ્સિયસનો વધારો થઈ શકે છે. મહારાષ્ટ્રમાં પણ આગામી ૨૪ કલાક બાદ પારો ૨ થી ૩ ડિગ્રી ઉંચકાય તેવી પ્રબળ શક્યતા છે, જે સંકેત આપે છે કે ઉનાળો વહેલો દસ્તક દઈ રહ્યો છે.

તારીખ મુજબ મુખ્ય આગાહી:

·         ૨૬-૨૭ ફેબ્રુઆરી: જમ્મુ-કાશ્મીરમાં વરસાદ/હિમવર્ષા.

·         ૨૭-૨૮ ફેબ્રુઆરી: હિમાચલ અને ઉત્તરાખંડમાં માવઠું.

·         ૨-૩ માર્ચ: ફરી એકવાર પર્વતીય રાજ્યોમાં વરસાદની નવી લહેર.

·         આગામી ૭ દિવસ: ઉત્તર-પશ્ચિમ ભારતમાં તાપમાન સામાન્ય કરતા ઊંચું રહેશે.