મથુરા | તા.૨૫: કાન્હાની નગરી મથુરામાં અત્યારે હોળીનો રંગ ચરમસીમાએ છે. આગામી ૨૭ ફેબ્રુઆરીના રોજ રંગભરી એકાદશીના પવિત્ર અવસરે ભગવાન શ્રીકૃષ્ણના જન્મસ્થાન પર વિશ્વવિખ્યાત ‘લઠમાર હોળી’નું ભવ્ય આયોજન કરવામાં આવ્યું છે. તેસુના ફૂલોનો કેસરીયો રંગ અને ગોપીઓની લાઠીઓના પ્રહારનો અવાજ સમગ્ર વ્રજ મંડળને ભક્તિના અનોખા રંગમાં રંગી દેશે. આ મહોત્સવને માણવા માટે માત્ર ભારત જ નહીં પરંતુ વિદેશથી પણ લાખો શ્રદ્ધાળુઓ ઉમટી પડ્યા છે.

કેશવ વાટિકામાં જામશે હોળીનો દરબાર

શ્રી કૃષ્ણ જન્મસ્થાન સેવા સંસ્થાનના જણાવ્યા અનુસાર, મુખ્ય કાર્યક્રમ સાંજે ૪:૦૦ વાગ્યે મંદિર પરિસરની કેશવ વાટિકામાં શરૂ થશે. રાધારાણીના જન્મસ્થળ ‘રાવલ’ થી આવેલા હુરિયારો (પુરૂષો) અને હુરિયારિણો (મહિલાઓ) પરંપરાગત વ્રજવાસી પોશાકમાં સજ્જ થઈને લઠમાર હોળીનું જીવંત પ્રદર્શન કરશે. જ્યારે ગોપીઓ લાઠી વરસાવશે ત્યારે ગોપ ઢાલ વડે પોતાનો બચાવ કરતા નજરે પડશે, જે દ્રશ્ય ભક્તોમાં ભારે રોમાંચ જગાડશે.

ટેસુના ફૂલો અને અબીલ-ગુલાલની છોળો

આ વર્ષે પણ પરંપરા મુજબ કેમિકલયુક્ત રંગોને બદલે ટેસુના ફૂલોમાંથી બનાવેલા કુદરતી રંગોનો ઉપયોગ કરવામાં આવશે. હોળીના દરબારમાં ફાગ ગાયકો હોળીના પદો ગાશે અને લોક કલાકારોના નૃત્ય સાથે આખું આકાશ અબીલ-ગુલાલથી ભરાઈ જશે. ભક્તો પર પિચકારીઓ દ્વારા કેસરીયો રંગ છાંટવામાં આવશે, જે ભગવાનના પ્રસાદ સમાન માનવામાં આવે છે.

ચુસ્ત સુરક્ષા અને વિશેષ વ્યવસ્થા

ભારે ભીડને જોતા મંદિર પ્રશાસન દ્વારા સુરક્ષાના કડક બંદોબસ્ત કરવામાં આવ્યા છે. ભક્તોને મોબાઈલ ફોન અને અન્ય ઈલેક્ટ્રોનિક ઉપકરણો અંદર ન લઈ જવા અપીલ કરવામાં આવી છે. મંદિરના ત્રણેય પ્રવેશદ્વાર પરથી વ્યવસ્થિત રીતે દર્શન થઈ શકે તે માટે પોલીસ અને સ્વયંસેવકો તૈનાત રહેશે. ૪૬ વર્ષથી ચાલી આવતી આ અખંડ પરંપરામાં કોઈ ખલેલ ન પહોંચે તેની ખાસ તકેદારી રાખવામાં આવી છે.

વ્રજની આ હોળી માત્ર એક તહેવાર નથી, પણ ભક્ત અને ભગવાન વચ્ચેના અનોખા પ્રેમનું પ્રતીક છે. જો તમે પણ આ પવિત્ર ક્ષણોના સાક્ષી બનવા માંગતા હોવ, તો ૨૭મીની સાંજ મથુરાના નામે કરી દેજો!