તેલ અવીવ: વડાપ્રધાન નરેન્દ્રભાઈ મોદી અત્યારે ઇઝરાયલની બે દિવસની મહત્વપૂર્ણ મુલાકાતે છે. બુધવારે સાંજે જ્યારે તેમનું વિમાન બેન ગુરિયન એરપોર્ટ પર લેન્ડ થયું, ત્યારે ઇઝરાયલી વડાપ્રધાન બેન્જામિન નેતન્યાહૂએ પ્રોટોકોલ તોડીને તેમનું ઉષ્માભર્યું સ્વાગત કર્યું હતું. સ્વાગત સમારોહ બાદ એરપોર્ટ પર જ બંને નેતાઓ વચ્ચે એક ખાનગી બેઠક યોજાઈ હતી, જેમાં ભારત અને ઇઝરાયલના ગાઢ સંબંધોની ઝલક જોવા મળી હતી.
નેતન્યાહૂના કાર્યાલય દ્વારા શેર કરવામાં આવેલા એક વીડિયોમાં બંને નેતાઓ વચ્ચેની કેમિસ્ટ્રી સ્પષ્ટ દેખાઈ રહી છે. બેઠક દરમિયાન નેતન્યાહૂ અત્યંત ખુશ દેખાતા હતા અને તેમણે પીએમ મોદીને ઉદ્દેશીને કહ્યું, "આ માત્ર રાજદ્વારી સંબંધ નથી, પણ આપણી સાચી મિત્રતા છે." આ સાંભળીને પીએમ મોદીએ હસીને નેતન્યાહૂની પીઠ થપથપાવી હતી અને બદલામાં નેતન્યાહૂએ પણ તે જ અંદાજમાં વળતો પ્રતિસાદ આપ્યો હતો. આ દ્રશ્યો સોશિયલ મીડિયા પર લોકપ્રિય થયા છે.
 પીએમ મોદીએ પોતાની મુલાકાત અંગે ખુશી વ્યક્ત કરતા જણાવ્યું કે, "નવ વર્ષ બાદ ઇઝરાયલ પાછા ફરીને મને ખૂબ જ આનંદ થયો છે. મારા મિત્ર નેતન્યાહૂએ જે રીતે સ્વાગત કર્યું છે તે બદલ હું તેમનો આભારી છું." તેમણે વધુમાં ઉમેર્યું કે ભારત અને ઇઝરાયલ વચ્ચેની ભાગીદારી આવનારા સમયમાં વધુ મજબૂત બનશે.
 સોશિયલ મીડિયા પ્લેટફોર્મ 'X' પરની એક પોસ્ટમાં પીએમ મોદીએ માહિતી આપી કે નેતન્યાહૂ સાથેની મુલાકાતમાં વિવિધ મહત્વના વિષયો પર ચર્ચા થઈ છે.
ટેકનોલોજી અને કૃષિ: બંને દેશો આ ક્ષેત્રમાં સહયોગ વધારશે.
જળ વ્યવસ્થાપન: ઇઝરાયલની અત્યાધુનિક જળ ટેકનોલોજીનો ભારતમાં વ્યાપ વધારવા અંગે ચર્ચા.
પ્રતિભા ભાગીદારી: બંને દેશોના યુવાનો અને કૌશલ્યનો એકબીજાના વિકાસ માટે ઉપયોગ.
પીએમ મોદીની આ મુલાકાત એવા સમયે થઈ રહી છે જ્યારે પશ્ચિમ એશિયામાં મહત્વના ભૌગોલિક-રાજકીય વિકાસ થઈ રહ્યા છે. આ બે દિવસીય પ્રવાસ દરમિયાન બંને દેશો વચ્ચે સંરક્ષણ અને વ્યૂહાત્મક ભાગીદારીને લઈને અનેક મહત્વના કરારો પર હસ્તાક્ષર થવાની સંભાવના છે