મુંબઈ, તા. ૨૬: બોલિવૂડના દિગ્ગજ અભિનેતા બોમન ઈરાની માટે આજનો દિવસ જિંદગીની સૌથી યાદગાર ક્ષણોમાંની એક બની ગયો છે. પોતાની પ્રથમ ડાયરેક્ટોરિયલ ડેબ્યૂ ફિલ્મ "ધ મહેતા બોય્ઝ" ને લઈને તેઓ હાલમાં ભારે ચર્ચામાં છે. મુંબઈમાં આયોજિત 'સ્પોકન વર્ડ ફેસ્ટિવલ' દરમિયાન જ્યારે સ્ટેજ પરથી તેમની ફિલ્મનું નામ જાહેર કરવામાં આવ્યું, ત્યારે જે નજારો જોવા મળ્યો તેણે બોમન ઈરાનીને અંદરથી હચમચાવી દીધા હતા.

ફેસ્ટિવલમાં હાજર લગભગ ૫,૦૦૦ થી વધુ કલાપ્રેમીઓએ જ્યારે એકસાથે 'ધ મહેતા બોય્ઝ' ના નામનો જાપ શરૂ કર્યો, ત્યારે આખો હોલ તાળીઓના ગડગડાટથી ગુંજી ઉઠ્યો હતો. આ ક્ષણને સોશિયલ મીડિયા પર શેર કરતા બોમન ઈરાનીએ અત્યંત ભાવુક પોસ્ટ લખી છે. તેમણે જણાવ્યું કે, "હું સ્ટેજ પર ઉભો હતો અને આટલો બધો પ્રેમ જોઈને આશ્ચર્યચકિત થઈ ગયો હતો. જાણે કોઈ રોક બેન્ડનું પરફોર્મન્સ ચાલતું હોય તેવો અવાજ ગુંજતો હતો. તે સમયે મારા રુવાડા ઉભા થઈ ગયા હતા અને હું સ્તબ્ધ બની ગયો હતો."

બોમન ઈરાનીએ આ ફિલ્મને પોતાનું "બેબી" ગણાવ્યું છે, કારણ કે આ ફિલ્મ દ્વારા તેઓ પ્રથમવાર નિર્દેશકની ખુરશી સંભાળી રહ્યા છે. પ્રેક્ષકોનો આવો ઉમળકાભેર પ્રતિસાદ એ વાતની સાબિતી છે કે લોકો આ ફિલ્મની આતુરતાથી રાહ જોઈ રહ્યા છે.

કામની વાત કરીએ તો, બોમન ઈરાની હાલમાં ખૂબ જ વ્યસ્ત છે. તેમણે તાજેતરમાં જ 'ખોસલા કા ઘોસલા ૨' નું દિલ્હી શિડ્યુલ પૂર્ણ કર્યું છે. આ ઉપરાંત, તેઓ અક્ષય કુમાર અને સૈફ અલી ખાન સાથે ફિલ્મ 'હૈવાન' માં પણ જોવા મળશે. સાઉથના મેગાસ્ટાર રામ ચરણ સાથેની તેમની ફિલ્મ 'પેડી' (Paddi) પણ આગામી ૩૦ એપ્રિલે રિલીઝ થવા જઈ રહી છે. અભિનય બાદ હવે નિર્દેશન ક્ષેત્રે બોમન ઈરાની શું નવો જાદુ ચલાવે છે, તેના પર સૌની નજર છે.