જેરુસલેમ, તા. ૨૬: ભારત અને ઈઝરાયલ વચ્ચેના સંબંધો હવે માત્ર રક્ષા કે ટેકનોલોજી પૂરતા મર્યાદિત નથી રહ્યા, પરંતુ ભારતીય ઓટોમોબાઈલ બ્રાન્ડ્સ પણ હવે વિદેશી ધરતી પર પોતાનું કૌશલ્ય બતાવી રહી છે. વડાપ્રધાન નરેન્દ્ર મોદીની બે દિવસીય ઈઝરાયલ મુલાકાત દરમિયાન જેરુસલેમમાં આયોજિત એક હાઈ-ટેક પ્રદર્શનમાં ભારતની શાન ગણાતી રોયલ એનફિલ્ડ (Royal Enfield) ની નવી બાઈકનું અનાવરણ કરવામાં આવ્યું હતું. આ તકે પીએમ મોદી અને ઈઝરાયલના વડાપ્રધાન બેન્જામિન નેતન્યાહૂએ સાથે મળીને આ મોટરસાઈકલનું નિરીક્ષણ કર્યું હતું અને તેની સાથે ફોટો પણ પડાવ્યો હતો.

જે બાઈકે બંને દિગ્ગજ નેતાઓનું ધ્યાન ખેંચ્યું તે છે 'રોયલ એનફિલ્ડ ગોઆન ક્લાસિક 350'. આ એક ક્લાસિક બોબર-શૈલીની બાઈક છે જે ભારતીય વારસા અને આધુનિક ટેકનોલોજીનું અદભૂત મિશ્રણ છે. તેમાં ૩૪૯ સીસીનું શક્તિશાળી એન્જિન છે જે ૨૦.૨ બીએચપી પાવર જનરેટ કરે છે. તેની ફ્લોટિંગ સીટ, લાંબા એપ-હેંગર હેન્ડલબાર અને ટ્યુબલેસ ટાયર તેને અન્ય બાઈક્સ કરતા અલગ પાડે છે. ચેન્નાઈ સ્થિત આ કંપની અત્યારે ૮૦ થી વધુ દેશોમાં પોતાનો વ્યવસાય ફેલાવી ચૂકી છે અને હવે તેની નજર મધ્ય-પૂર્વના બજારો પર છે.

આ પ્રદર્શન માત્ર જૂની શૈલીની બાઈક્સ પૂરતું મર્યાદિત નહોતું. રોયલ એનફિલ્ડ તેની પ્રથમ ઈલેક્ટ્રિક મોટરસાઈકલ 'ફ્લાઈંગ ફ્લી' (Flying Flea - FF C6) પણ ટૂંક સમયમાં ભારતીય અને વૈશ્વિક બજારોમાં ઉતારવા જઈ રહી છે. ચેન્નાઈમાં તેના ટેસ્ટિંગના ફોટા પણ સામે આવ્યા છે, જે સૂચવે છે કે કંપની હવે ગ્રીન એનર્જી તરફ ઝડપથી આગળ વધી રહી છે. પીએમ મોદીની આ મુલાકાતથી ભારતીય ઉત્પાદનોને આંતરરાષ્ટ્રીય સ્તરે એક નવું પ્લેટફોર્મ મળ્યું છે.

બીજી તરફ, ઓટો જગતમાં સુઝુકી પણ પોતાના ઈ-એક્સેસ ઈલેક્ટ્રિક સ્કૂટર સાથે મેદાનમાં ઉતરી છે. જોકે, સુઝુકી રેન્જ કે સ્પીડના મોટા દાવા કરવાને બદલે 'સૌથી સુરક્ષિત બેટરી' હોવાનો દાવો કરી રહી છે, જે ઓલા અને એથર જેવી કંપનીઓ માટે પડકારરૂપ બની શકે છે. ભારત અને ઈઝરાયલ વચ્ચેના આ વેપાર અને સંસ્કૃતિના મજબૂત સંબંધો આવનારા સમયમાં ઓટોમોબાઈલ ક્ષેત્રે નવી ક્રાંતિ લાવશે તે નક્કી છે.