ટેક્સસમાં ગુજરાતીનાં તિલક જ્વેલર્સ બાદ હવે બીજે ક્યાં-ક્યાં રેડ પડી?
ગોલ્ડ સ્કેમમાં ગુજરાતી જ્વેલર્સની કથિત સંડોવણી ખૂલતા અમેરિકાની પોલીસ અને ફેડરલ એજન્સીએ ટેક્સસ ઉપરાંત જ્યોર્જિયા અને ફલોરિડામાં ત્રણ અલગ-અલગ લોકેશન્સ પર રેડ કરી : લાખો ડોલરનું ગોલ્ડ જપ્ત કરવાની સાથે કેટલાક લોકોની ધરપકડ કરાઈ છે
ટેક્સસ,તા.૨૭: જાન્યુઆરી ૨૯ના રોજ ટેક્સસના અરવિગમાં આવેલા ગુજરાતીની માલિકીના તિલક જ્વેલર્સ પર પડેલી મોટી રેડ બાદ આ કૌભાંડની તપાસનો રેલો હવે બીજા સ્ટેટ્સ સુધી પહોંચ્યો છે. અમેરિકામાં ચાલી રહેલા ગોલ્ડ સ્કેમમાં ગુજરાતી જ્વેલર્સની કથિત સંડોવણી ખૂલતા હવે આ મામલે વધુ ત્રણ સ્ટોર્સ પર રેડ કરી લાખો ડોલરનું ગોલ્ડ જપ્ત કરવાની સાથે કેટલાક લોકોની ધરપકડ કરાઈ છે.
IamGujaratને મળેલી માહિતી અનુસાર બુધવારના રોજ FBI અને લોકલ પોલીસે જ્યોર્જિયા, ટેક્સસ અને ફલોરિડામાં ત્રણ લોકેશન્સ પર આવેલા જ્વેલરી સ્ટોર્સ પર રેડ કરી હતી.
સિનિયર સિટીઝન્સ સાથે ઠગાઈ કરીને પડાવવામાં આવેલા ૭૦ મિલિયન ડોલરથી પણ વધુના ચોરીના ગોલ્ડના વહીવટમાં આ જ્વેલરી સ્ટોર્સ સામેલ હોવાનો ઓથોરિટીનો દાવો છે જેમાં જ્યોર્જિયાના ડિકેટરમાં આવેલા માલાણી જ્વેલર્સનો પણ સમાવેશ થાય છે.
માલાણી જ્વેલર્સ પર બુધવારે રેડ થઈ હતી અને આ સિવાય ટેક્સસના રિચાર્ડસન અને ફલોરિડાના ઓર્લાન્ડોમાં પણ રેડ કરવામાં આવી હોવાનું જાણવા મળી રહ્યું છે. જોકે, માલાણી જ્વેલર્સના ઓનર તેમજ ત્યાંથી કોની-કોની ધરપકડ થઈ છે તેની કોઈ ચોક્કસ વિગતો નથી મળી શકી. આ કેસની તપાસ ટેક્સસની કોલિન કાઉન્ટી શેરિફ ઓફિસ તેમજ ફેડરલ એજન્સી દ્વારા કરવામાં આવી રહી છે.
CBSના એક રિપોર્ટ પ્રમાણે ફેબ્રુઆરી ૨૫ના રોજ બુધવારે નોર્થ ટેક્સસના રિચાર્ડ્સનમાં આવેલી માલાણી જ્વેલર્સની બ્રાન્ચ પર ૨૦ SWAT ઓફિસર્સ ધસી આવ્યા હતા અને આ રેડ દરમિયાન ૧૩ એમ્પ્લોઈની અટકાયત કરવાની સાથે સ્ટોરમાંથી મોટી માત્રામાં ગોલ્ડ પણ જપ્ત કરાયું હતું, પોલીસનું કહેવું છે કે માલાણી જ્વેલર્સમાં ચોરીના ગોલ્ડનો વહીવટ થતો હતો.
બુધવારે જે ત્રણ સ્ટોર્સમાં રેડ થઈ હતી તેમાં બે સ્ટોર્સ માલાણીના હોવાનું જાણવા મળી રહ્યું છે જ્યારે ફલોરિડામાં આવેલો સ્ટોર કોનો હતો તે અંગે કોઈ ચોક્કસ માહિતી નથી મળી શકી. કેટલાક મીડિયા રિપોર્ટ્સમાં એવો પણ દાવો કરવામાં આવ્યો છે કે ત્રણ સ્ટોર્સમાં થયેલી રેડમાં ૫૦ મિલિયન ડોલરનું ગોલ્ડ જપ્ત કરવામાં આવ્યું છે.
જાન્યુઆરીમાં ટેક્સસમાં તિલક જ્વેલર્સની સાથે-સાથે સાયમા જ્વેલર્સ પર પણ રેડ પડી હતી. ઓથોરિટીએ આ મામલે એવું જણાવ્યું છે કે ચોરીના ગોલ્ડનું લોન્ડરિગ કરીને તેને ઓગાળી દઈ તેમાંથી દાગીના બનાવીને વેચી દેવાના આ કૌભાંડની જે તપાસ ચાલી રહી છે તેના ભાગરૂપે બુધવારે મલ્ટિપલ લોકેશન્સ પર રેડ કરવામાં આવી હતી.
ચોરીના ગોલ્ડમાંથી જે જ્વેલરી બનતી હતી તેને બજાર ભાવે કસ્ટમર્સને વેચી દેવાતી હતી કે પછી અમેરિકાની બહાર પણ મોકલવામાં આવતી હતી. આ પ્રકરણમાં ૨૦થી વધુ લોકોની ધરપકડ કરવામાં આવી છે, તિલક જ્વેલર્સની રેડમાં તિથિ પટેલ અને નિરવ સોની નામના બે ગુજરાતીની ધરપકડ કરાઈ હતી, આ બંને હાલ પણ જેલમાં છે, તેમના પર ટોટલ ચાર મિલિયનના બોન્ડ મૂકવામાં આવ્યા હતા અને તેમની હિયરિગ છેક મે ૨૦૨૫માં થવાની છે.
અત્યારસુધી આ કાંડમાં અરેસ્ટ થયેલા લોકોમાં પ્રાંશુ સુથાર, શિવમ સોની, ધવલસિહ રાઠોડ, અર્પિત દેસાઈ, સતીષ પટેલ અને પ્રાંજલ પટેલ નામના ગુજરાતીઓનો પણ સમાવેશ થાય છે.
જાન્યુઆરીના છેલ્લા વીકમાં તિલક જ્વેલર્સ અને સાયમા જ્વેલર્સ પર રેડ થઈ ત્યારે જ IamGujarat દ્વારા જણાવાયું હતું કે આ કૌભાંડમાં આગામી દિવસોમાં અન્ય જ્વેલર્સને ત્યાં રેડ કરવાની સાથે બીજા પણ ઘણા લોકોની ધરપકડ કરવામાં આવી શકે છે.
અમેરિકામાં છેલ્લા પાંચેક વર્ષમાં જ સ્કેમર્સ દ્વારા સિનિયર સિટીઝન્સ પાસેથી કરોડો ડોલરનું ગોલ્ડ પડાવવામાં આવ્યું છે અને તેમાં ગુજરાતીઓની પણ મોટાપાયે સંડોવણી બહાર આવી છે. બે-અઢી વર્ષ પહેલા કેનેડાવાળી લાઈનથી ઈલીગલી અમેરિકા ગયેલા ચરોતરના એક યુવકે પણ પોતાની પ્રેમિકા સાથે મળીને આ ધંધામાં તગડી કમાણી કરી હતી અને સાથે જ ઈન્ડિયા પણ સારા એવા પૈસા મોકલ્યા હતા, પણ તિલક જ્વેલર્સ પર રેડ પડી તે પહેલા જ આ ભાઈ પણ પોલીસના હાથમાં આવી ગયા હતા.
અમેરિકામાં રહેતા જેટલા ગુજરાતીઓએ આ ચોર ગેંગ પાસેથી કેશમાં વ્યવહાર કરીને સસ્તામાં ગોલ્ડ ખરીદ્યું છે તે બધાને પણ તપાસનો સામનો કરવો પડે તેવી પૂરી શક્યતા છે. અધૂરામાં પૂરું આ પ્રકરણમાં પકડાયેલા જેટલા પણ લોકો નોન-ઈમિગ્રન્ટ સ્ટેટસ પર કે પછી ઈલીગલી અમેરિકામાં રહે છે તેમને ડિપોર્ટ પણ કરવામાં આવશે પરંતુ તે પહેલા પોલીસે તેમના પર જે ગંભીર આરોપ લગાવ્યા છે તેનો કેસ ચાલશે અને તેમને દોષિત સાબિત થવા પર સજા પણ ભોગવવી પડશે.
અમેરિકાની પોલીસ મિલિયન્સ ઓફ ડોલર્સનો ચોરીનો માલ રિકવર કરવા માટે પણ હાલ આકાશ-પાતાળ એક કરી રહી છે, જેથી આ કૌભાંડીઓએ અમેરિકામાં જ રાખેલી પોતાની બેનંબરી કમાણી પણ ગુમાવવી પડશે
(9:57 AM IST)
છેલ્લા 8 દિવસમાં સૌથી લોકપ્રિય 
