લખનૌ: દિલ્હીના બહુચર્ચિત દારૂ કૌભાંડ કેસમાં કોર્ટે પૂર્વ મુખ્યમંત્રી અરવિંદ કેજરીવાલ અને મનીષ સિસોદિયાને નિર્દોષ જાહેર કરતા દેશના રાજકારણમાં ગરમાવો આવી ગયો છે. આ ચુકાદા બાદ સમાજવાદી પાર્ટીના અધ્યક્ષ અખિલેશ યાદવે સોશિયલ મીડિયા અને મીડિયા સમક્ષ ભાજપ સરકાર પર આકરા પ્રહારો કર્યા હતા. તેમણે આ જીતને માત્ર 'આપ'ની જીત નહીં પરંતુ 'સત્યની જીત' અને ભાજપ માટે 'નૈતિક મૃત્યુદંડ' ગણાવ્યો છે.

અખિલેશ યાદવે પ્રતિક્રિયા આપતા જણાવ્યું હતું કે, "આજે દિલ્હીના લોકપ્રિય નેતા અરવિંદ કેજરીવાલ સાથે સત્ય અને ન્યાય બંને અડીખમ ઉભા છે. આરોપો ગમે તેટલા મોટા કે ગંભીર હોય, પણ તે ક્યારેય સત્યને દબાવી શકતા નથી." તેમણે વધુમાં ઉમેર્યું કે આ ચુકાદા બાદ દેશનો દરેક ઈમાનદાર નાગરિક રાહતનો શ્વાસ લેશે, જ્યારે ભાજપના સમર્થકો આજે આત્મ-લજ્જા અનુભવી રહ્યા હશે કારણ કે ભાજપે દિલ્હીના રહેવાસીઓ સાથે વિશ્વાસઘાત કર્યો છે.
 પોતાના નિવેદનમાં અખિલેશ યાદવે શંકરાચાર્યનો ઉલ્લેખ કરીને ભાજપ પર આકરો તંજ કસ્યો હતો. તેમણે કહ્યું કે, "જે લોકો પવિત્ર શંકરાચાર્ય જેવા મહાન સંતો પર પણ ખોટા આક્ષેપો લગાવી શકે છે, તેમના માટે કોઈ પણ વ્યક્તિને બદનામ કરવી એ મોટી વાત નથી." આ નિવેદન દ્વારા તેમણે ભાજપની રાજનીતિને નૈતિકતા વગરની ગણાવી હતી.
કેજરીવાલ અને સિસોદિયાની મુક્તિને વિપક્ષી ગઠબંધન માટે બુસ્ટર ડોઝ માનવામાં આવી રહ્યો છે. અખિલેશ યાદવ ઉપરાંત ભગવંત માન, કપિલ સિબ્બલ અને અન્ય વિપક્ષી નેતાઓએ પણ એજન્સીઓના દુરુપયોગનો મુદ્દો ઉઠાવી કેન્દ્ર સરકારને ઘેરી છે. કેજરીવાલના જેલમાંથી બહાર આવ્યા અને હવે નિર્દોષ છૂટ્યા બાદ વિપક્ષ વધુ આક્રમક મૂડમાં જોવા મળી રહ્યો છે. આ સમાચાર બાદ હવે ભાજપ આ 'નૈતિક પરાજય'ના આરોપોનો સામનો કેવી રીતે કરે છે તે જોવું રસપ્રદ રહેશે