તેલ અવીવ: મધ્ય પૂર્વમાં ઈરાન અને ઇઝરાયલ વચ્ચે ફાટી નીકળેલા ભીષણ જંગે હવે અત્યંત ભયાનક સ્વરૂપ ધારણ કર્યું છે. ઇઝરાયલે પોતાનું નાગરિક હવાઈ ક્ષેત્ર (Airspace) બંધ કરી દીધું છે અને ઈરાન સાથેની સૈન્ય કાર્યવાહીમાં તોતિંગ વધારો થયો છે. આ કટોકટીની સ્થિતિને ધ્યાનમાં રાખીને તેલ અવીવ સ્થિત ભારતીય દૂતાવાસે ઇઝરાયલમાં રહેતા તમામ ભારતીય નાગરિકો માટે તાત્કાલિક અસરથી 'સુરક્ષા એડવાઈઝરી' જારી કરી છે, જેમાં તેમને "અત્યંત સાવધાની" રાખવા અને હંમેશા સતર્ક રહેવા વિનંતી કરવામાં આવી છે.

ભારતીય દૂતાવાસે સોશિયલ મીડિયા પ્લેટફોર્મ X પર એક મહત્વપૂર્ણ પોસ્ટ દ્વારા ભારતીયોને સ્પષ્ટ સૂચના આપી છે કે તેઓ હંમેશા નિયુક્ત આશ્રયસ્થાનો (Shelters) ની નજીક રહે અને પોતાના રહેઠાણ કે કાર્યસ્થળની આસપાસના સુરક્ષિત સ્થળોથી સારી રીતે પરિચિત રહે. યુદ્ધની આ સ્થિતિમાં કોઈ પણ પ્રકારની બિનજરૂરી મુસાફરી ન કરવા અને ઇઝરાયલી અધિકારીઓ તથા 'હોમ ફ્રન્ટ કમાન્ડ' દ્વારા જારી કરવામાં આવતી સુરક્ષા માર્ગદર્શિકાનું અક્ષરશઃ પાલન કરવા જણાવાયું છે. પળેપળ બદલાતી પરિસ્થિતિમાં સ્થાનિક સમાચાર અને કટોકટીની ચેતવણીઓ પર સતત નજર રાખવી અનિવાર્ય બની ગઈ છે.

ભારતીય નાગરિકોની સહાય માટે દૂતાવાસે 24x7 કાર્યરત હેલ્પલાઇન નંબર અને સમર્પિત ઈમેલ એડ્રેસ સક્રિય કર્યા છે, જેથી કોઈ પણ કટોકટીના સમયે ત્વરિત મદદ મળી શકે. જોકે, ભારત સરકાર દ્વારા હાલમાં સ્થળાંતર (Evacuation) ની કોઈ સત્તાવાર યોજના જાહેર કરવામાં આવી નથી, પરંતુ વિદેશ મંત્રાલય પરિસ્થિતિ પર બારીકાઈથી નજર રાખી રહ્યું છે. ઇઝરાયલમાં સાયરનનો ગુંજારવ અને આકાશમાં મિસાઈલોના આક્રમણ વચ્ચે ભારતીય સમુદાયમાં ચિંતાનો માહોલ છે, અને દૂતાવાસ સતત તેમના સંપર્કમાં રહીને અપડેટ્સ જારી કરી રહ્યું છે.