મુંબઈ:  ઈઝરાયેલ અને ઈરાન વચ્ચે ફાટી નીકળેલા ભીષણ જંગની સૌથી મોટી અને સીધી અસર હવે આંતરરાષ્ટ્રીય હવાઈ મુસાફરી પર જોવા મળી રહી છે. સુરક્ષાના ગંભીર જોખમોને ધ્યાનમાં રાખીને ભારતની રાષ્ટ્રીય એરલાઇન એર ઇન્ડિયાએ દુબઈ, અબુ ધાબી, રિયાધ, જેદ્દાહ, દોહા અને મસ્કત જેવા મધ્યપૂર્વના તમામ મુખ્ય રૂટ પરની ફ્લાઇટ્સ તાત્કાલિક અસરથી રદ કરી દીધી છે. ૨૮ ફેબ્રુઆરીના રોજ તેલ અવીવ જઈ રહેલી ફ્લાઇટ AI139 ને હુમલાની ધમકી મળતા જ પાઇલટે સમજદારી દાખવી વિમાનને હવામાંથી જ ભારત પરત વાળ્યું હતું. આ ઘટનાએ સાબિત કરી દીધું છે કે ખાડી દેશોનું હવાઈ ક્ષેત્ર અત્યારે મિસાઈલ હુમલાઓ અને લશ્કરી કાર્યવાહીને કારણે 'ડેન્જર ઝોન'માં ફેરવાઈ ગયું છે.

માત્ર એર ઇન્ડિયા જ નહીં, પણ ખાનગી એરલાઇન ઈન્ડિગોએ પણ મધ્યપૂર્વ જનારા મુસાફરો માટે રેડ એલર્ટ જારી કર્યું છે. ઈરાન અને તેની આસપાસના વિસ્તારોમાં જે રીતે મિસાઈલોનો મારો ચાલી રહ્યો છે, તેને જોતા એરલાઇન્સ કંપનીઓ હવે જોખમ લેવા તૈયાર નથી. ઈન્ડિગોની ટીમો સતત ગલ્ફ ક્ષેત્રની સ્થિતિ પર નજર રાખી રહી છે અને મુસાફરોને સલાહ આપવામાં આવી છે કે તેઓ એરપોર્ટ પર જવા માટે નીકળે તે પહેલાં પોતાની ફ્લાઇટનું લાઈવ સ્ટેટસ ચોક્કસ તપાસી લે. ફ્લાઇટ્સ રદ થવાને કારણે હજારો પ્રવાસીઓ અને એનઆરઆઈ (NRIs) અત્યારે વિવિધ દેશોમાં અટવાઈ પડ્યા છે, જેમના માટે વૈકલ્પિક વ્યવસ્થા કરવી એ એરલાઇન્સ માટે મોટો પડકાર બની ગયો છે.

વૈશ્વિક સ્તરે પણ આ યુદ્ધને કારણે અફરાતફરીનો માહોલ છે. યુરોપિયન દેશોએ પોતાના નાગરિકોની સલામતી માટે કડક આદેશો જારી કર્યા છે. બ્રિટને ઈરાનમાંથી પોતાનો રાજદ્વારી સ્ટાફ પાછો ખેંચી લીધો છે, જ્યારે ફ્રાન્સ અને ઇટાલીએ તેમના નાગરિકોને ઈરાન અને ઈઝરાયેલ છોડી દેવા તાકીદ કરી છે. જર્મનીએ પણ તેની મુસાફરી માર્ગદર્શિકામાં ફેરફાર કરીને ઈઝરાયેલના પ્રવાસને અત્યંત જોખમી ગણાવ્યો છે. ભારતીય વિદેશ મંત્રાલય પણ મધ્યપૂર્વમાં રહેલા ભારતીયોની સુરક્ષા અંગે ચિંતિત છે અને એરલાઇન્સ સાથે મળીને એવા રૂટ શોધવામાં આવી રહ્યા છે જ્યાંથી સુરક્ષિત મુસાફરી શક્ય બને, પરંતુ હાલની સ્થિતિ જોતા આગામી કેટલાક દિવસો સુધી હવાઈ વ્યવહાર ખોરવાયેલો રહે તેવી પૂરેપૂરી શક્યતા છે.