કાનપુર:ઉત્તર પ્રદેશમાં રેલવે દ્વારા મુસાફરો માટે એક અત્યંત મહત્વપૂર્ણ અને ચિંતાજનક સમાચાર સામે આવ્યા છે. કાનપુર અને ઉન્નાવ વચ્ચે ગંગા નદી પર આવેલા ૧૧૮ વર્ષ જૂના ઐતિહાસિક રેલવે પુલના સમારકામ માટે રેલવેએ ૨ એપ્રિલથી ૧૩ મે સુધી એટલે કે સતત ૪૨ દિવસ માટે 'મેગા બ્લોક' લેવાની જાહેરાત કરી છે. આ સમારકામ હેઠળ જૂના નબળા સ્લીપર્સ હટાવીને મજબૂત સ્ટીલ એચ-બીમ લગાવવામાં આવશે, જેના કારણે આ રૂટ પરનો ટ્રેન વ્યવહાર લાંબા સમય સુધી પ્રભાવિત રહેશે.
   આ મેગા બ્લોકની સીધી અસર કાનપુર-લખનૌ રૂટ પર જોવા મળશે. રેલવેના જણાવ્યા અનુસાર, દરરોજ સવારે ૯:૩૦ થી સાંજે ૫:૩૦ વાગ્યા સુધી કુલ ૮ કલાક માટે ડાઉન લાઇન બ્લોક રહેશે. આ કારણે ૧૪ ટ્રેનોને સંપૂર્ણપણે રદ કરવામાં આવી છે, જ્યારે ૩૧ મહત્વની ટ્રેનોના રૂટમાં ફેરફાર (ડાયવર્ઝન) કરવામાં આવ્યો છે. ખાસ કરીને નવી દિલ્હી-લખનૌ શતાબ્દી એક્સપ્રેસ અને વંદે ભારત એક્સપ્રેસ જેવી પ્રીમિયમ ટ્રેનો હવે કાનપુરને બદલે વાયા મુરાદાબાદ થઈને દોડશે.
રદ અને ડાયવર્ટ થયેલી મુખ્ય ટ્રેનોની યાદી:
 સંપૂર્ણ રદ ટ્રેનો: લખનૌ-ઝાંસી મેમુ, પ્રયાગરાજ પેસેન્જર, રાયબરેલી પેસેન્જર, કાનપુર-સીતાપુર પેસેન્જર અને કાસગંજ પેસેન્જર સહિતની કુલ ૧૪ ટ્રેનો ૪૨ દિવસ સુધી પાટા પર નહીં ઉતરે.
રૂટ બદલાયેલી ટ્રેનો: વંદે ભારત (૨૨૪૨૬) અને શતાબ્દી (૧૨૦૦૪) હવે ગાઝિયાબાદ-મુરાદાબાદ થઈને લખનૌ પહોંચશે. આ ઉપરાંત લોકમાન્ય તિલક-ગોરખપુર, ઓખા-ગોરખપુર અને યશવંતપુર-ગોરખપુર જેવી ટ્રેનો કાનપુર-પ્રયાગરાજ-અયોધ્યાના રૂટ પર ડાયવર્ટ કરવામાં આવી છે.
ક્લોન હમસફર ટ્રેનો: નવી દિલ્હી-બરૌની અને દરભંગા જેવી હમસફર ટ્રેનો પણ બદલાયેલા રૂટ પરથી દોડશે.
રેલવે પ્રશાસને મુસાફરોને અપીલ કરી છે કે આ સમયગાળા દરમિયાન મુસાફરીનું આયોજન કરતા પહેલા હેલ્પલાઇન નંબર ૧૩૯ અથવા IRCTC ની વેબસાઇટ પર ટ્રેનનું સ્ટેટસ ચોક્કસથી તપાસી લેવું. પુલના સમારકામ બાદ ટ્રેનોની ઝડપ અને સુરક્ષામાં વધારો થશે, પરંતુ હાલમાં ૪૨ દિવસ સુધી મુસાફરોએ સમય અને રૂટમાં થતા ફેરફારને કારણે અસુવિધા વેઠવી પડશે