નવી દિલ્હી: ઈરાન અને ઈઝરાયેલ વચ્ચેનો તણાવ હવે વર્ષ ૨૦૨૬ના સૌથી ભયાનક સૈન્ય સંઘર્ષમાં ફેરવાઈ ગયો છે. અમેરિકા અને ઈઝરાયેલના સંયુક્ત હુમલા બાદ ઈરાને વળતો મિસાઈલ હુમલો શરૂ કરતા બંને દેશોમાં કટોકટી જાહેર કરવામાં આવી છે. આ યુદ્ધમાં જે બાબત સૌથી વધુ ચર્ચામાં છે તે છે બંને દેશોના અત્યંત આધુનિક અને ઘાતક હથિયારો. ઈરાન પાસે મધ્ય પૂર્વમાં મિસાઈલોનો સૌથી મોટો દરિયો છે, જ્યારે ઈઝરાયેલ પાસે દુનિયાની સર્વશ્રેષ્ઠ હવાઈ સંરક્ષણ પ્રણાલી છે.
ઈરાન: મિસાઈલોનો પ્રચંડ ભંડાર: ઈરાન પાસે હાલમાં ૩,૦૦૦થી વધુ બેલિસ્ટિક મિસાઈલો છે. તેની વ્યૂહરચના એકસાથે હજારો મિસાઈલો છોડીને દુશ્મનના સંરક્ષણને ધ્વસ્ત કરવાની છે.
ખુર્રમશહર અને સેજિલ: આ ૨,૦૦૦ થી ૨,૫૦૦ કિમી સુધી પ્રહાર કરતી મધ્યમ અંતરની બેલિસ્ટિક મિસાઈલો છે.
ફત્તાહ (હાઈપરસોનિક): ઈરાનનો દાવો છે કે આ મિસાઈલ એટલી ઝડપી છે કે કોઈ પણ સંરક્ષણ સિસ્ટમ તેને રોકી શકતી નથી.
શાહેદ-૧૩૬ ડ્રોન: આ 'આત્મઘાતી ડ્રોન' તરીકે ઓળખાય છે, જે લાંબા અંતર સુધી જઈને લક્ષ્ય સાથે ટકરાઈને વિનાશ વહેરે છે.
ઈઝરાયેલ: ટેકનોલોજીનું 'અભેદ્ય' કવચ: ઈઝરાયેલ પાસે દુશ્મન મિસાઈલોને હવામાં જ તોડી પાડવા માટે બહુ-સ્તરીય સુરક્ષા વ્યવસ્થા છે.
એરો-૩: આ સિસ્ટમ વાતાવરણની બહાર જ દુશ્મન મિસાઈલને શોધીને તેનો નાશ કરે છે.
 ટૂંકા અંતરના રોકેટ અને ડ્રોનને તોડી પાડવા માટે આયર્ન ડોમ જગવિખ્યાત છે. જ્યારે નવી 'આયર્ન બીમ' લેસર સિસ્ટમ ૨૦૨૫ના અંતમાં કાર્યરત થઈ છે, જે લેસર કિરણોથી પળવારમાં ડ્રોનને રાખ કરી દે છે.
અમેરિકાએ ઈઝરાયેલની સુરક્ષા માટે પોતાની સૌથી આધુનિક એન્ટી-મિસાઈલ સિસ્ટમ THAAD તૈનાત કરી છે, જે અંતિમ તબક્કે પણ મિસાઈલને તોડી શકે છે.
યુદ્ધના મેદાનમાં અત્યારે બંને પક્ષો પોતાની સંપૂર્ણ તાકાત અજમાવી રહ્યા છે. ઈરાન પાસે સંખ્યાબળ છે, તો ઈઝરાયેલ પાસે અમેરિકાના સાથ સાથે હાઈ-ટેક સુરક્ષા છે. જોકે, આ શસ્ત્રોનો ઉપયોગ માત્ર આ બે દેશો માટે જ નહીં, પણ સમગ્ર વિશ્વની શાંતિ અને અર્થતંત્ર માટે ભારે જોખમ ઊભું કરી રહ્યો છે. આકાશમાં ગુંજતી સાયરન અને ત્રાટકતી મિસાઈલો સૂચવે છે કે આ જંગ આગામી દિવસોમાં વધુ લોહિયાળ બની શકે છે