નવી દિલ્હી: મધ્ય પૂર્વમાં ભભૂકી રહેલી યુદ્ધની જ્વાળાઓ હવે માત્ર સરહદો પૂરતી મર્યાદિત નથી રહી, પરંતુ તેની સીધી અસર ભારતના કોર્પોરેટ જગત અને સામાન્ય માણસના ખિસ્સા પર પડવાની તૈયારીમાં છે. અમેરિકા અને ઈરાન વચ્ચેના સંઘર્ષને કારણે વૈશ્વિક ઉર્જા બજારમાં જે ઉથલપાથલ મચી છે, તેનાથી મુકેશ અંબાણીની રિલાયન્સ ઇન્ડસ્ટ્રીઝ (RIL) સહિત દેશની મોટી ઓઈલ માર્કેટિંગ કંપનીઓ (OMCs) માટે મુશ્કેલીઓ વધી શકે છે. જો ક્રૂડ ઓઈલના ભાવ પ્રતિ બેરલ $100 ને વટાવી જશે, તો ભારતના આયાત બિલમાં મોટો વધારો થશે અને ફુગાવો બેકાબૂ બની શકે છે.

    નિષ્ણાતોના મતે, સૌથી મોટું જોખમ 'હોર્મુઝની સામુદ્રધુની' પર છે. આ એ માર્ગ છે જ્યાંથી વિશ્વનો 20% પેટ્રોલિયમ પુરવઠો પસાર થાય છે. ભારત માટે આ રસ્તો કરોડરજ્જુ સમાન છે કારણ કે આપણી 50% ક્રૂડ ઓઈલ અને 54% LNGની આયાત અહીંથી જ થાય છે. જો યુદ્ધને કારણે આ શિપિંગ રૂટ ખોરવાય છે, તો વીમા અને પરિવહન ખર્ચ વધશે, જેના કારણે બ્રેન્ટ ક્રૂડના ભાવમાં 15% સુધીનો ઉછાળો આવી શકે છે. હાલમાં જ ભાવ $65 થી વધીને $73 ની સપાટીએ પહોંચી ગયા છે.
   માર્કેટ એક્સપર્ટ્સના જણાવ્યા અનુસાર, રિલાયન્સ ઇન્ડસ્ટ્રીઝ માટે આ સ્થિતિ મિશ્ર સાબિત થઈ શકે છે. જો તેલના ભાવ વધવાની સાથે રિફાઇનિંગ માર્જિન (GRM) વધશે, તો રિલાયન્સના રિફાઇનિંગ બિઝનેસને ફાયદો થઈ શકે છે. પરંતુ જો યુદ્ધને કારણે વૈશ્વિક માંગમાં ઘટાડો થાય અને પેટ્રોકેમિકલ સેગમેન્ટમાં ખર્ચ વધે, તો નફાકારકતા પર મોટો ફટકો પડી શકે છે. બીજી તરફ, IOCL, BPCL અને HPCL જેવી સરકારી કંપનીઓ માટે મુશ્કેલી એ છે કે જો તેઓ વધેલા ભાવનો બોજ ગ્રાહકો પર નહીં નાખે, તો તેમનો માર્જિન ઘટી જશે અને શેરના ભાવ તૂટી શકે છે.
ઉડ્ડયન, પેઇન્ટ અને કેમિકલ સેક્ટરમાં પણ ઉત્પાદન ખર્ચ વધવાની પૂરેપૂરી શક્યતા છે. શેરબજારમાં પણ વિદેશી રોકાણકારો (FII) મોટા પાયે વેચાણ કરી શકે છે, જેનાથી નિફ્ટીમાં 3 થી 5%નો ઘટાડો જોવા મળી શકે છે. રિલાયન્સનો શેર અત્યારે ₹1,394 ની આસપાસ ટ્રેડ કરી રહ્યો છે, પરંતુ યુદ્ધની અનિશ્ચિતતાને કારણે તેમાં ટૂંકા ગાળામાં ભારે અસ્થિરતા જોવા મળી શકે છે. રોકાણકારો અત્યારે ફાર્મા અને IT જેવા સુરક્ષિત ક્ષેત્રો તરફ વળી રહ્યા છે