દુબઈ: મધ્ય પૂર્વમાં ફાટી નીકળેલા ભીષણ યુદ્ધની ઝપેટમાં હવે ગ્લેમર જગત પણ આવી ગયું છે. અમેરિકા અને ઈઝરાયેલ દ્વારા ઈરાન પર કરવામાં આવેલા હુમલા બાદ સમગ્ર અખાતી વિસ્તાર યુદ્ધના મેદાનમાં ફેરવાઈ ગયો છે. આ ગંભીર પરિસ્થિતિ વચ્ચે બોલિવૂડની જાણીતી અભિનેત્રી અને ગાયિકા સોનલ ચૌહાણ દુબઈ એરપોર્ટ પર ફસાઈ ગઈ છે. ઈરાન દ્વારા કરવામાં આવી રહેલી જવાબી કાર્યવાહી અને મિસાઈલ હુમલાના જોખમને જોતા દુબઈ ઈન્ટરનેશનલ એરપોર્ટ પર તમામ કામગીરી તાત્કાલિક અસરથી રોકી દેવામાં આવી છે, જેના કારણે સોનલ સહિત હજારો પ્રવાસીઓ ત્યાં અટવાઈ પડ્યા છે.

યુદ્ધના આ ભયાનક માહોલ વચ્ચે સોનલ ચૌહાણે સોશિયલ મીડિયા પ્લેટફોર્મ X (અગાઉ ટ્વિટર) પર ભાવુક પોસ્ટ શેર કરીને પ્રધાનમંત્રી નરેન્દ્ર મોદી પાસે મદદ માંગી છે. તેમણે પોતાની પોસ્ટમાં લખ્યું છે કે, "માનનીય પ્રધાનમંત્રી મોદીજી, હું હાલ દુબઈમાં સર્જાયેલા સંકટને કારણે અહીં ફસાઈ ગઈ છું. મારી ફ્લાઇટ રદ કરવામાં આવી છે અને ભારત પરત ફરવા માટે કોઈ રસ્તો દેખાઈ રહ્યો નથી. કૃપા કરીને આ મુશ્કેલ સમયમાં મને માર્ગદર્શન આપો અને સુરક્ષિત રીતે વતન પહોંચાડવા માટે મદદ કરો." સોનલની આ અપીલ બાદ સોશિયલ મીડિયા પર ફેન્સ તેની સુરક્ષા માટે પ્રાર્થના કરી રહ્યા છે.

ઈરાન અને ઈઝરાયેલ વચ્ચે વધતા તણાવને કારણે દુબઈના આકાશમાં મિસાઈલોનો ખતરો મંડરાઈ રહ્યો છે. સુરક્ષાના કારણોસર દુબઈ ઈન્ટરનેશનલ (DXB) અને અલ મક્તૂમ ઈન્ટરનેશનલ (DWC) જેવા વિશ્વના સૌથી વ્યસ્ત એરપોર્ટ્સને અનિશ્ચિત સમય માટે બંધ કરી દેવામાં આવ્યા છે. ઈરાની મીડિયા અને સેના દ્વારા તેમના સર્વોચ્ચ નેતાના મોતના સમાચારને પુષ્ટિ આપવામાં આવ્યા બાદ સ્થિતિ વધુ વણસી છે. ઈરાન હવે ખાડી વિસ્તારમાં આવેલા અમેરિકી સૈન્ય મથકોને નિશાન બનાવી રહ્યું છે, જેના કારણે આંતરરાષ્ટ્રીય વિમાન સેવાઓ સંપૂર્ણપણે ખોરવાઈ ગઈ છે.

ઉલ્લેખનીય છે કે, સોનલ ચૌહાણે ૨૦૦૮માં આવેલી ફિલ્મ ‘જન્નત’થી બોલિવૂડમાં ધમાકેદાર એન્ટ્રી કરી હતી અને આજે પણ તે ‘જન્નત ગર્લ’ તરીકે લોકપ્રિય છે. અભિનયની સાથે તે એક કુશળ ગાયિકા પણ છે. તાજેતરમાં તે પ્રભાસની ફિલ્મ ‘આદિપુરુષ’માં જોવા મળી હતી. હાલમાં તે એક પ્રોજેક્ટના સિલસિલે વિદેશમાં હતી, પરંતુ યુદ્ધની આકસ્મિક સ્થિતિએ તેને મુશ્કેલીમાં મૂકી દીધી છે. હવે આખી દુનિયાની નજર ભારત સરકાર પર છે કે તેઓ દુબઈમાં ફસાયેલા સોનલ ચૌહાણ અને અન્ય ભારતીય નાગરિકોને કઈ રીતે સુરક્ષિત બહાર કાઢે છે.