ઈરાનના સર્વોચ્ચ નેતાના મૃત્યુને પગલે  અમેરિકી પ્રેસિડેન્ટની તીખી પ્રતિક્રિયા: ટ્રમ્પે તેમને ઇતિહાસના સૌથી ક્રૂર વ્યક્તિ ગણાવ્યા: માત્ર ઈરાનના લોકો માટે જ નહીં, પરંતુ તમામ અમેરિકનો અને વિશ્વભરના દેશો માટે ન્યાય મળ્યો છે

વોશિંગ્ટન: અમેરિકી રાષ્ટ્રપતિ ડોનાલ્ડ ટ્રમ્પે સોશિયલ મીડિયા પર એક પોસ્ટ દ્વારા પુષ્ટિ કરી છે કે ઈરાનના સર્વોચ્ચ નેતા આયાતોલ્લાહ અલી ખામેની હવે જીવિત નથી. ટ્રમ્પે તેમને ઇતિહાસના સૌથી ક્રૂર વ્યક્તિ ગણાવતા કહ્યું કે, આ માત્ર ઈરાનના લોકો માટે જ નહીં, પરંતુ તે તમામ અમેરિકનો અને વિશ્વભરના દેશો માટે ન્યાય છે જેમના નાગરિકો ખામેનીના શાસન હેઠળ માર્યા ગયા અથવા અપંગ થયા છે. આ નિવેદન બાદ પશ્ચિમ એશિયામાં ભારેલા અગ્નિ જેવી સ્થિતિ સર્જાઈ છે. *

 

 

ઈઝરાયેલનો ઈરાન પર ફરી પ્રચંડ હુમલો: ૩૦થી વધુ સૈન્ય ઠેકાણાઓ પર બોમ્બમારો: ઈરાની હવાઈ સંરક્ષણ પ્રણાલી, મિસાઈલ લોન્ચર્સ અને મુખ્ય સૈન્ય કમાન્ડ સેન્ટરોનો સમાવેશ: ઓપરેશન ચાલુ

ઈઝરાયેલ ડિફેન્સ ફોર્સિસ (આઈ.ડી.એફ.) દ્વારા ઈરાનના પશ્ચિમ અને મધ્ય ભાગોમાં ભીષણ હવાઈ હુમલા કરવામાં આવ્યા છે. અત્યાર સુધીમાં ૩૦થી વધુ મહત્વના લક્ષ્યોને નિશાન બનાવવામાં આવ્યા છે, જેમાં ઈરાની હવાઈ સંરક્ષણ પ્રણાલી, મિસાઈલ લોન્ચર્સ અને શાસનના મુખ્ય સૈન્ય કમાન્ડ સેન્ટરોનો સમાવેશ થાય છે. ઈઝરાયેલનું કહેવું છે કે આ ઓપરેશન હજુ પણ ચાલુ છે અને ઈરાનની સૈન્ય શક્તિને તોડી પાડવી તેમનો મુખ્ય ઉદ્દેશ્ય છે. *

 

 

અમેરિકી-ઈઝરાયેલ એરસ્ટ્રાઈકમાં ઈરાની રિવોલ્યુશનરી ગાર્ડના વડા અને ખામેનીના અત્યંત નજીકના સુરક્ષા સલાહકાર મેજર જનરલ મોહમ્મદ પાકપોરનું મોત: ઈરાનનું સૈન્ય નેતૃત્વ વેરવિખેર થઈ ગયું 

ઈરાનને વધુ એક મોટો ફટકો પડ્યો છે. અમેરિકા અને ઈઝરાયેલ દ્વારા કરવામાં આવેલા સંયુક્ત હવાઈ હુમલામાં ઈરાની રિવોલ્યુશનરી ગાર્ડના વડા મેજર જનરલ મોહમ્મદ પાકપોર માર્યા ગયા છે. પાકપોર દિવંગત સર્વોચ્ચ નેતા ખામેનીના અત્યંત નજીકના સુરક્ષા સલાહકાર ગણાતા હતા. આ હાઈ-પ્રોફાઈલ ટાર્ગેટના મોત બાદ ઈરાનનું સૈન્ય નેતૃત્વ વેરવિખેર થઈ ગયું હોવાના અહેવાલો મળી રહ્યા છે. *

 

 

યુદ્ધની અસર વિમાન સેવાઓ પર: ૮૫૦થી વધુ ફ્લાઈટ્સ રદ થતા ભારતના હજારો મુસાફરો મુશ્કેલીમાં મુકાયા

નવી દિલ્હી: ઈરાન અને મધ્ય પૂર્વના દેશોના હવાઈ ક્ષેત્ર પર લાદવામાં આવેલા પ્રતિબંધોને કારણે નાગરિક ઉડ્ડયન મંત્રાલયે મોટી જાહેરાત કરી છે. ૨૮ ફેબ્રુઆરીના રોજ ૪૧૦ ફ્લાઈટ્સ રદ કરવામાં આવી હતી, જ્યારે આજે ૧ માર્ચના રોજ વધુ ૪૪૪ ફ્લાઈટ્સ રદ થવાની શક્યતા છે. આંતરરાષ્ટ્રીય તણાવને કારણે એરલાઈન્સ કંપનીઓએ પોતાના રૂટ બદલવા પડ્યા છે અથવા ઉડાન સ્થગિત કરી દીધી છે, જેનાથી હજારો પ્રવાસીઓ મુશ્કેલીમાં મુકાયા છે. *

 

 

દુબઈ ઇન્ટરનેશનલ એરપોર્ટ પર પ્રચંડ વિસ્ફોટ: ઈરાની હુમલાની આશંકા: એરપોર્ટ પર અફરાતફરીનો માહોલ: સુરક્ષા એજન્સીઓએ સમગ્ર વિસ્તારને કોર્ડન કરી લીધો 

સંયુક્ત આરબ અમીરાતના દુબઈ ઇન્ટરનેશનલ એરપોર્ટ પરથી એક ભયાનક વિસ્ફોટના સમાચાર મળી રહ્યા છે. પ્રારંભિક અહેવાલો મુજબ, આ એક ઈરાની સ્ટ્રાઈક હોઈ શકે છે જે ઈઝરાયેલ અને અમેરિકાના હુમલાના વળતા જવાબ તરીકે કરવામાં આવી છે. એરપોર્ટ પર અફરાતફરીનો માહોલ છે અને સુરક્ષા એજન્સીઓએ સમગ્ર વિસ્તારને કોર્ડન કરી લીધો છે. નુકસાનની વિગતોની હજુ રાહ જોવાઈ રહી છે. *

 

 

જમ્મુ-કાશ્મીરના પુંછમાં ભારતીય સેનાની સવારે મોટી કાર્યવાહી: પાકિસ્તાની ડ્રોન તોડી પાડ્યું: સરહદી વિસ્તારોમાં સર્ચ ઓપરેશન તેજ કરવામાં આવ્યું: સુરક્ષા દળો એલર્ટ પર

ભારતીય સીમા પર પાકિસ્તાની નાપાક હરકત ફરી એકવાર નિષ્ફળ બનાવવામાં આવી છે. રવિવારે વહેલી સવારે જમ્મુ-કાશ્મીરના પુંછ જિલ્લામાં નિયંત્રણ રેખા (એલ.ઓ.સી.) ઓળંગીને ભારતીય સરહદમાં પ્રવેશેલા પાકિસ્તાની ડ્રોન પર ભારતીય સૈનિકોએ અંધાધૂંધ ગોળીબાર કરીને તેને તોડી પાડ્યું હતું. આ ઘટના બાદ સરહદી વિસ્તારોમાં સર્ચ ઓપરેશન તેજ કરવામાં આવ્યું છે અને સુરક્ષા દળોને એલર્ટ પર રાખવામાં આવ્યા છે. *

 

 

ચીનની મધ્યસ્થીની અપીલ: ઈરાન પરના હુમલા રોકવા અને તાત્કાલિક યુદ્ધવિરામની માંગ: ચીની વિદેશ મંત્રાલયે ચેતવણી આપી છે કે જો હુમલાઓ રોકવામાં નહીં આવે તો સ્થિતિ નિયંત્રણ બહાર જશે

પશ્ચિમ એશિયામાં વકરતી જતી હિંસા વચ્ચે ચીને કડક વલણ અપનાવ્યું છે. ચીને અમેરિકા અને ઈઝરાયેલ દ્વારા ઈરાન પર કરવામાં આવેલા હુમલા બાદ તાત્કાલિક યુદ્ધવિરામની માંગ કરી છે. ચીની વિદેશ મંત્રાલયે ચેતવણી આપી છે કે જો આ હુમલાઓ રોકવામાં નહીં આવે તો સ્થિતિ નિયંત્રણ બહાર જઈ શકે છે અને પ્રાદેશિક અસ્થિરતા વધી શકે છે. ચીને તમામ પક્ષોને સંયમ જાળવવા વિનંતી કરી છે. 

 

 

ઈરાનનો વળતો પ્રહાર: ‘સ્ટ્રેટ ઓફ હોર્મુઝ’ પર સંપૂર્ણ નાકાબંધી, તમામ વ્યાપારી જહાજો માટેનો દરિયાઈ રસ્તો બંધ કરી દીધો: વિશ્વ પર ‘ઓઈલ બોમ્બ’ ઝીંકાયો: વિશ્વની અર્થવ્યવસ્થાને હચમચાવી દેતો મોટો નિર્ણય: ઈરાની નૌસેના દ્વારા રેડિયો બ્રોડકાસ્ટ દ્વારા ચેતવણી: અખાતી દેશોમાંથી આયાત થતો ૨૫ ટકા તેલ અને ગેસનો પુરવઠો અટકી ગયો

અમેરિકા અને ઈઝરાયેલના ભીષણ હુમલા બાદ ઈરાને વિશ્વની અર્થવ્યવસ્થાને હચમચાવી દેતો મોટો નિર્ણય લીધો છે. ઈરાની રિવોલ્યુશનરી ગાર્ડ્સે (આઈ.આર.જી.સી.) વિશ્વના સૌથી મહત્વપૂર્ણ દરિયાઈ માર્ગ ‘સ્ટ્રેટ ઓફ હોર્મુઝ’ને તમામ વ્યાપારી જહાજો માટે બંધ કરી દીધો છે. ઈરાની નૌસેના દ્વારા રેડિયો બ્રોડકાસ્ટ દ્વારા ચેતવણી આપવામાં આવી છે કે કોઈપણ જહાજને આ માર્ગ પરથી પસાર થવા દેવામાં આવશે નહીં. આ માર્ગ બંધ થવાથી અખાતી દેશોમાંથી થતો ૨૫ ટકા તેલ અને ગેસનો પુરવઠો અટકી ગયો છે, જેના કારણે ભારત સહિત સમગ્ર વિશ્વમાં ઊર્જા સંકટના વાદળો ઘેરાયા છે. *

 

 

વિશ્વ બજારમાં તેલના ભાવમાં ભડકો: ૧૫૦ ડોલર પ્રતિ બેરલ સુધી પહોંચવાની આશંકા: દરિયાઈ વીમા કંપનીઓએ પણ આ વિસ્તારમાં જહાજો મોકલવા માટેના પ્રીમિયમમાં ૫૦ ટકાનો વધારો કરી દીધો 

હોર્મુઝની સામુદ્રધુનીમાં ઈરાની મિસાઈલો અને યુદ્ધ જહાજોની તૈનાતીને પગલે આંતરરાષ્ટ્રીય તેલ બજારમાં ફફડાટ વ્યાપી ગયો છે. આર્થિક નિષ્ણાતો અને ‘રુસ્ટાડ એનર્જી’ જેવા સંશોધન જૂથોના મતે, જો આ નાકેબંધી લાંબો સમય ચાલશે તો કાચા તેલના ભાવ પ્રતિ બેરલ ૧૫૦ ડોલરને પાર કરી શકે છે. દરિયાઈ વીમા કંપનીઓએ પણ આ વિસ્તારમાં જહાજો મોકલવા માટેના પ્રીમિયમમાં ૫૦ ટકાનો વધારો કરી દીધો છે, જેની સીધી અસર પેટ્રોલ-ડીઝલના ભાવ અને વૈશ્વિક મોંઘવારી પર પડશે. 

 

 

માત્ર ૩ કિલોમીટરનો દરિયાઈ માર્ગ બન્યો યુદ્ધનું મેદાન: જહાજોના રૂટ ડાયવર્ટ: હજારો કન્ટેનર અને ઓઈલ ટેન્કરો અત્યારે મધ્ય દરિયામાં થંભી ગયા: અમેરિકી સેનાએ પણ પોતાના ધ્વજ હેઠળના જહાજોને ઈરાની સરહદથી દુર રહેવા સૂચના આપી

સ્ટ્રેટ ઓફ હોર્મુઝ તેના સૌથી સાંકડા ભાગમાં માત્ર ૩ કિલોમીટરની પહોળાઈ ધરાવે છે, જેનો ઉપયોગ ઈરાને હથિયાર તરીકે કર્યો છે. માએસ્ક અને અન્ય મોટી શિપિંગ કંપનીઓએ પોતાના જહાજોને આ વિસ્તારમાંથી હટાવી લીધા છે અથવા અટકાવી દીધા છે. 

હજારો કન્ટેનર અને ઓઈલ ટેન્કરો અત્યારે મધ્ય દરિયામાં થંભી ગયા છે. અમેરિકી સેનાએ પણ પોતાના ધ્વજ હેઠળના જહાજોને ઈરાની સરહદથી દુર રહેવા સૂચના આપી છે, જેના કારણે વૈશ્વિક સપ્લાય ચેઈન સંપૂર્ણપણે ખોરવાઈ ગઈ છે. *

 

 

ભારતની ચિંતામાં વધારો: તેલની આયાત પર સંકટના વાદળો: આગામી દિવસોમાં ભારતમાં ઈંધણના ભાવમાં મોટો ઉછાળો જોવા મળી શકે છે

ભારત પોતાની જરૂરિયાતનું મોટાભાગનું કાચું તેલ મધ્ય પૂર્વના દેશો જેવા કે ઈરાક, સાઉદી અરેબિયા અને યુએઈ પાસેથી મંગાવે છે. હોર્મુઝ માર્ગ બંધ થવાથી ભારતીય રિફાઈનરીઓ સુધી પહોંચતા તેલના જથ્થામાં મોટો ઘટાડો થઈ શકે છે. ભારતનું વિદેશ મંત્રાલય સ્થિતિ પર સતત નજર રાખી રહ્યું છે અને અખાતી દેશોમાં વસતા ભારતીય નાગરિકો માટે એડવાઈઝરી જારી કરવામાં આવી છે. જો આ તણાવ ઘટશે નહીં તો આગામી દિવસોમાં ભારતમાં ઈંધણના ભાવમાં મોટો ઉછાળો જોવા મળી શકે છે. 

 

 

અમેરિકાએ ઈરાન પરના હવાઈ હુમલામાં આર્ટિફિશિયલ ઈન્ટેલિજન્સ ટૂલ્સનો ઉપયોગ કર્યો: એન્થ્રોપિકના એઆઈ ટૂલ્સનો વ્યાપક ઉપયોગ કર્યો હોવાની ચોંકાવનારી વિગતો સામે આવી

અમેરિકન સરકારે આર્ટિફિશિયલ ઈન્ટેલિજન્સ સ્ટાર્ટઅપ કંપનીની ટેકનોલોજીનો ઉપયોગ ભવિષ્યમાં બંધ કરવાની સત્તાવાર જાહેરાત કર્યાના ગણતરીના કલાકોમાં જ ઈરાન પરના હવાઈ હુમલામાં એન્થ્રોપિકના એઆઈ ટૂલ્સનો વ્યાપક ઉપયોગ કર્યો હોવાની ચોંકાવનારી વિગતો સામે આવી છે. આધુનિક યુદ્ધમાં આર્ટિફિશિયલ ઈન્ટેલિજન્સના ઉપયોગ અંગે આંતરરાષ્ટ્રીય સ્તરે ગંભીર ચર્ચાઓ શરૂ થઈ છે.

 

 

દુબઈ: ઈરાને સંયુક્ત આરબ અમીરાત પર ૧૩૭ મિસાઈલો અને ૨૦૯ ડ્રોન છોડ્યા: અત્યાર સુધીનો સૌથી ભયાવહ હુમલો

ઈરાન દ્વારા સંયુક્ત આરબ અમીરાત પર અત્યાર સુધીનો સૌથી ભયાવહ હુમલો કરવામાં આવ્યો છે. ઈરાને અમીરાત પર ૧૩૭ મિસાઈલો અને ૨૦૯ ઘાતક ડ્રોન છોડ્યા છે. આ હુમલામાં પ્રખ્યાત પામ જુમેરાહ હોટલમાં આગ ભભૂકી ઉઠી છે. આ ઉપરાંત મુખ્ય એરપોર્ટ અને વિશ્વવિખ્યાત બુર્જ અલ અરબ ઈમારત પર પણ સીધો હુમલો કરવામાં આવ્યો છે, જેના કારણે સમગ્ર વિસ્તારમાં ભારે અફરાતફરી અને ભયનો માહોલ સર્જાયો છે.

 

 

અબુ ધાબી એરપોર્ટ પર ડ્રોન હુમલો: એક એશિયન નાગરિકનું મોત અને સાત ગંભીર રીતે ઘાયલ:

અબુ ધાબી એરપોર્ટ પ્રશાસને સત્તાવાર નિવેદન જાહેર કરીને જણાવ્યું છે કે ઝાયેદ ઇન્ટરનેશનલ એરપોર્ટ પર થયેલા અચાનક ડ્રોન હુમલા બાદ સત્તાવાળાઓ દ્વારા બચાવ કામગીરી હાથ ધરવામાં આવી છે. આ દુઃખદ ઘટનામાં એક એશિયન નાગરિકે પોતાનો જીવ ગુમાવ્યો છે, જ્યારે અન્ય સાત લોકો ગંભીર રીતે ઘાયલ થયા છે, જેમને તાત્કાલિક સારવાર અર્થે ખસેડવામાં આવ્યા છે.

 

 

અમેરિકી રાષ્ટ્રપતિ ડોનાલ્ડ ટ્રમ્પની કડક ચેતવણી: ઈરાન પર ભારે બોમ્બમારો અવિરતપણે ચાલુ જ રહેશે

મધ્ય પૂર્વમાં વધતા જતા તણાવ વચ્ચે અમેરિકાના રાષ્ટ્રપતિ ડોનાલ્ડ ટ્રમ્પે અત્યંત આક્રમક વલણ અપનાવતા સ્પષ્ટ શબ્દોમાં ચીમકી આપી છે કે ઈરાન પર કરવામાં આવી રહેલો ભારે બોમ્બમારો જ્યાં સુધી અમેરિકાને જરૂરી જણાશે ત્યાં સુધી અવિરતપણે ચાલુ રાખવામાં આવશે. આ નિવેદનથી પશ્ચિમ એશિયામાં યુદ્ધ વધુ ઉગ્ર બનવાની દહેશત ઊભી થઈ છે.

 

 

પશ્ચિમ એશિયામાં યુદ્ધ ભડક્યું: દોહા, દુબઈ, બહેરીન, કતાર અને તેલ અવીવમાં શ્રેણીબદ્ધ પ્રચંડ ધડાકા

ઈરાની મિસાઈલો અને ડ્રોન દ્વારા અમેરિકા, ઇઝરાયેલ અને અખાતી દેશોના લશ્કરી મથકોને સીધા નિશાન બનાવવામાં આવતા યુદ્ધની આગ વધુ વિસ્તરી છે. દોહા, દુબઈ, બહેરીન, કતાર અને તેલ અવીવ સહિતના અગ્રણી શહેરોમાં પ્રચંડ વિસ્ફોટોના અવાજો ગુંજી ઉઠ્યા હતા. આ વ્યાપક હુમલાઓથી સમગ્ર વિસ્તારમાં ભારે તણાવ અને અરાજકતાની સ્થિતિ નિર્માણ પામી છે.

 

 

પશ્ચિમ એશિયાની કટોકટી: ભારતમાં ફસાયેલા વિદેશી નાગરિકોના વિઝા લંબાવવા સરકાર દ્વારા મોટી રાહતરૂપ સહાય

પશ્ચિમ એશિયામાં ચાલી રહેલા ભીષણ યુદ્ધ અને તણાવને કારણે જે વિદેશી નાગરિકો ભારતમાં છે અને વિમાની સેવાઓ ખોરવાતા તેમના પ્રવાસ કાર્યક્રમમાં ફેરફાર કરવો પડ્યો છે, તેઓને મોટી રાહત આપવામાં આવી છે. ભારતમાં તેમનું રોકાણ નિયમિત કરવા અથવા વિઝા લંબાવવા માટે ભારત સરકાર દ્વારા જરૂરી તમામ સહાય પૂરી પાડવાની વ્યવસ્થા કરવામાં આવી છે.

 

 

વિદેશ મંત્રી એસ જયશંકરની કતારના વડાપ્રધાન અને વિદેશ મંત્રી શેખ મોહમ્મદ બિન અબ્દુલરહેમાન બિન જાસીમ અલ થાની સાથે વાતચીત: ભારતીય સમુદાયની સુરક્ષા અંગે ખાતરી મેળવી

ભારતના વિદેશ મંત્રી એસ જયશંકરે કતારના વડાપ્રધાન અને વિદેશ મંત્રી શેખ મોહમ્મદ બિન અબ્દુલરહેમાન બિન જાસીમ અલ થાની સાથે ટેલિફોનિક વાતચીત કરીને વર્તમાન પરિસ્થિતિનો તાગ મેળવ્યો હતો. તેમણે સોશિયલ મીડિયા પર માહિતી આપતા જણાવ્યું હતું કે કતારમાં વસતા ભારતીય સમુદાયની સુરક્ષા અને સુખાકારી અંગે કતાર સરકાર દ્વારા આપવામાં આવેલી ખાતરીની તેઓ પ્રશંસા કરે છે.

 

 

કેનેડાના વડાપ્રધાન માર્ક કાર્નીની ઐતિહાસિક ભારત મુલાકાત: બંને દેશો વચ્ચેના સંબંધોમાં નવા યુગનો પ્રારંભ: છેલ્લા આઠ વર્ષમાં કોઈપણ કેનેડિયન વડાપ્રધાનની આ પ્રથમ દ્વિપક્ષીય ભારત મુલાકાત

કેનેડાના વડાપ્રધાન માર્ક કાર્નીએ ભારતની મુલાકાત વેળાએ જણાવ્યું છે કે છેલ્લા આઠ વર્ષમાં કોઈપણ કેનેડિયન વડાપ્રધાનની આ પ્રથમ દ્વિપક્ષીય ભારત મુલાકાત છે. તેમણે વિશેષ ભાર મૂકતા ઉમેર્યું હતું કે આ ઐતિહાસિક મુલાકાત બંને દેશો વચ્ચેના લાંબા પડકારજનક સમયગાળાનો અંત લાવશે અને ભારત તથા કેનેડા વચ્ચેના નવા, મજબૂત અને વધુ મહત્વાકાંક્ષી સંબંધોની શરૂઆત કરશે.

 

 

સંયુક્ત આરબ અમીરાતની અત્યાધુનિક એર ડિફેન્સ સિસ્ટમની મોટી સફળતા: ઈરાનની ઘાતક મિસાઈલો અને ડ્રોન તોડી પાડ્યા

સંયુક્ત આરબ અમીરાત પ્રશાસને એક સત્તાવાર અને વિસ્તૃત નિવેદનમાં માહિતી આપી છે કે તેમની અત્યાધુનિક એર ડિફેન્સ સિસ્ટમે સતર્કતા દાખવીને હવામાં જ ઈરાન દ્વારા છોડવામાં આવેલી વધુ ઘાતક મિસાઈલો અને ડ્રોનને સફળતાપૂર્વક આંતરીને નષ્ટ કરી દીધા છે, જેનાથી દેશમાં મોટી જાનહાનિ અને નુકસાની ટાળી શકાઈ છે.

 

 

દિલ્હીના બહુચર્ચિત એક્સાઇઝ પોલિસી કેસમાં સીબીઆઈની ૯૭૪ પાનાની વિસ્તૃત અરજી પર દિલ્હી હાઈકોર્ટમાં ૯ માર્ચે મહત્વની સુનાવણી

દિલ્હીના બહુચર્ચિત એક્સાઇઝ પોલિસી કેસમાં સીબીઆઈ દ્વારા ૯૭૪ પાનાની અત્યંત વિસ્તૃત અરજી દાખલ કરવામાં આવી છે. સીબીઆઈએ પોતાની અરજીમાં નીચલી અદાલત દ્વારા આપવામાં આવેલા નિર્દોષ છૂટવાના આદેશને આઘાતજનક અને ગેરકાયદેસર ગણાવીને પડકાર્યો છે. આ સંવેદનશીલ મામલે હવે દિલ્હી હાઈકોર્ટ ૯ માર્ચના રોજ વિશેષ સુનાવણી હાથ ધરશે.

 

 

એર ઇન્ડિયાનો મોટો નિર્ણય: મધ્ય પૂર્વની તંગદિલીને કારણે આજે ૧ માર્ચની લંડન, શિકાગો, ટોરોન્ટો અને ન્યૂયોર્ક સહિતની તમામ આંતરરાષ્ટ્રીય ફ્લાઈટ્સ રદ

મધ્ય પૂર્વમાં યુદ્ધની વણસી રહેલી પરિસ્થિતિ અને હવાઈ માર્ગોની અસુરક્ષાને કારણે રાષ્ટ્રીય વિમાન કંપની એર ઇન્ડિયાએ ૧ માર્ચના રોજ નિર્ધારિત અનેક આંતરરાષ્ટ્રીય ફ્લાઈટ્સ તાત્કાલિક અસરથી રદ કરવાની જાહેરાત કરી છે. કંપનીના આ નિર્ણયથી લંડન, શિકાગો, ટોરોન્ટો અને ન્યૂયોર્ક જતી મહત્વની ફ્લાઈટ્સ પર વ્યાપક અસર પડી છે અને મુસાફરોને વૈકલ્પિક વ્યવસ્થા શોધવાની ફરજ પડી છે.

 

 

અબુ ધાબી અને દુબઈના રહેણાંક વિસ્તારોમાં હવામાં નષ્ટ કરાયેલી મિસાઈલોનો કાટમાળ ખાબક્યો: અમીરાતે હુમલો નિષ્ફળ બનાવ્યાનો દાવો

સંયુક્ત આરબ અમીરાતની એર ડિફેન્સ સિસ્ટમ દ્વારા દુશ્મનની મિસાઈલોને હવામાં જ તોડી પાડવામાં આવી હોવાની સત્તાવાર જાહેરાત કરવામાં આવી છે. આ નષ્ટ કરાયેલી મિસાઈલો અને ડ્રોનનો કાટમાળ અબુ ધાબી અને દુબઈના કેટલાક વિસ્તારોમાં પડ્યો છે. જોકે, રાહતની વાત એ છે કે સત્તાવાર નિવેદન મુજબ આ ઘટનામાં હજુ સુધી કોઈ જાનહાનિ કે ગંભીર ઈજાના અહેવાલ પ્રાપ્ત થયા નથી.

 

 

ડીજીસીએની ૨ માર્ચ સુધી તાકીદની એડવાઈઝરી: તમામ ભારતીય એરલાઇન્સ કંપનીઓને ઈરાન, ઈરાક, ઇઝરાયેલ, જોર્ડન, લેબનોન, કુવૈત, સાઉદી અરેબિયા, સંયુક્ત આરબ અમીરાત, બહેરીન, કતાર અને ઓમાન ઉપરની મધ્ય પૂર્વની હવાઈ હદ ટાળવા કડક આદેશ

ડિરેક્ટોરેટ જનરલ ઓફ સિવિલ એવિએશન એટલે કે ડીજીસીએ દ્વારા ૨ માર્ચ સુધી એક અત્યંત તાકીદની એડવાઈઝરી જારી કરવામાં આવી છે. પેસેન્જરોની સુરક્ષાને પ્રાથમિકતા આપતા ડીજીસીએ દ્વારા તમામ ભારતીય એરલાઇન્સ કંપનીઓને ઈરાન, ઈરાક, ઇઝરાયેલ, જોર્ડન, લેબનોન, કુવૈત, સાઉદી અરેબિયા, સંયુક્ત આરબ અમીરાત, બહેરીન, કતાર અને ઓમાન ઉપરની હવાઈ હદનો ઉપયોગ સંપૂર્ણપણે ટાળવા કડક સૂચના આપવામાં આવી છે.

 

 

કેનેડાના વડાપ્રધાન અને ટાટા ગ્રુપના ચેરમેન વચ્ચે ઉચ્ચસ્તરીય મુલાકાત: ટેકનોલોજી અને એઆઈ ક્ષેત્રે ભાગીદારી અંગે મંથન

કેનેડાના વડાપ્રધાન માર્ક કાર્નીએ તેમની ભારત મુલાકાત દરમિયાન ટાટા ગ્રુપના ચેરમેન એન ચંદ્રશેખરન સાથે એક વિશેષ અને ઉચ્ચસ્તરીય બેઠક યોજી હતી. આ મહત્વપૂર્ણ મુલાકાત દરમિયાન ભારત અને કેનેડા આવનારા સમયમાં આધુનિક ટેકનોલોજી અને આર્ટિફિશિયલ ઈન્ટેલિજન્સ સહિતના વિવિધ ઔદ્યોગિક ક્ષેત્રોમાં કેવી રીતે લાંબા ગાળાની ભાગીદારી કરી શકે તે અંગે વિસ્તૃત અને સકારાત્મક ચર્ચા કરવામાં આવી હતી.

 

 

ગુજરાત સરકારની ભવિષ્યલક્ષી પહેલ: વર્ષ ૨૦૨૬ થી ૨૦૩૧ માટે નવી સાયન્સ, ટેકનોલોજી એન્ડ ઇનોવેશન પોલિસી જાહેર

ગુજરાત સરકાર દ્વારા રાજ્યમાં આધુનિક સંશોધન, સ્ટાર્ટઅપ્સ અને ટેકનોલોજીકલ વિકાસને વેગ આપવાના ઉમદા હેતુથી વર્ષ ૨૦૨૬ થી ૨૦૩૧ સુધીના પાંચ વર્ષના સમયગાળા માટે નવી અને અત્યાધુનિક સાયન્સ, ટેકનોલોજી એન્ડ ઇનોવેશન પોલિસીનું સત્તાવાર અનાવરણ કરવામાં આવ્યું છે. આ નવી નીતિના અમલીકરણથી રાજ્ય વૈશ્વિક સ્તરે ડિજિટલ અને તકનીકી ક્ષેત્રે નવી ઊંચાઈઓ સર કરશે તેવો વિશ્વાસ વ્યક્ત કરવામાં આવ્યો છે.