કુવૈત: મધ્ય પૂર્વમાં ચાલી રહેલા ભારે તણાવ અને સૈન્ય કાર્યવાહી વચ્ચે કુવૈત સરહદ નજીક અમેરિકી વાયુસેનાના અનેક લડાકુ વિમાનો દુર્ઘટનાગ્રસ્ત થયા હોવાના ચોંકાવનારા સમાચાર સામે આવ્યા છે. કુવૈતના સંરક્ષણ મંત્રાલયે સોમવારે સત્તાવાર નિવેદન જારી કરીને પુષ્ટિ કરી છે કે, 'કેટલાક અમેરિકી લશ્કરી વિમાનો ક્રેશ થયા છે, જોકે રાહતની વાત એ છે કે વિમાનમાં સવાર તમામ ક્રૂ મેમ્બર્સ સુરક્ષિત રીતે બચી ગયા છે.'
સોશિયલ મીડિયા પર વીડિયો વાયરલ
છેલ્લા ૩૦ કલાક દરમિયાન એક પછી એક અનેક અમેરિકી ફાઈટર જેટ્સ ક્રેશ થવાની ઘટનાઓ બની છે. સોશિયલ મીડિયા પર વાયરલ થયેલા દ્રશ્યોમાં અમેરિકી પાઈલટો વિમાન ક્રેશ થાય તે પહેલાં પેરાશૂટની મદદથી સફળતાપૂર્વક 'ઈજેક્ટ' થતા જોવા મળ્યા છે. અનેક લોકોએ આકાશમાંથી આગના ગોળાની જેમ નીચે ખાબકતા વિમાનોના ફોટોગ્રાફ્સ અને વીડિયો શેર કર્યા છે, જેનાથી સમગ્ર વિસ્તારમાં ભયનો માહોલ જોવા મળી રહ્યો છે.
તમામ ક્રૂ મેમ્બર્સ સુરક્ષિત
કુવૈતના સંરક્ષણ મંત્રાલયના પ્રવક્તાએ જણાવ્યું હતું કે, અકસ્માત બાદ તરત જ સર્ચ એન્ડ રેસ્ક્યુ ઓપરેશન હાથ ધરવામાં આવ્યું હતું. પાઈલટોને સલામત સ્થળે ખસેડવામાં આવ્યા છે અને તેમની તબીબી તપાસ કરવામાં આવી રહી છે. જોકે આ વિમાનો કેવી રીતે ક્રેશ થયા તે અંગે હજુ સુધી કોઈ સ્પષ્ટ કારણ આપવામાં આવ્યું નથી, પરંતુ મધ્ય પૂર્વમાં વધતા જતા સૈન્ય સંઘર્ષ અને 'ઓપરેશન એપિક ફ્યુરી' જેવી હિલચાલને કારણે આ ઘટનાઓ અત્યંત ગંભીર માનવામાં આવી રહી છે.
અમેરિકી દૂતાવાસ અને સરહદ પર એલર્ટ
દુર્ઘટના બાદ કુવૈત અને અમેરિકી સૈન્ય દળો વચ્ચે સીધું સંકલન સ્થાપિત કરવામાં આવ્યું છે. કુવૈત સ્થિત અમેરિકી દૂતાવાસની આસપાસ પણ ધુમાડાના ગોટેગોટા જોવા મળ્યા હોવાના અહેવાલો વચ્ચે સુરક્ષા વ્યવસ્થા કડક કરી દેવામાં આવી છે. અમેરિકી સેના આ મામલે ટૂંક સમયમાં સત્તાવાર વિગતો જારી કરી શકે છે.