નવી દિલ્હી: ઈરાન અને ઈઝરાયલ વચ્ચે વધી રહેલા ભયાનક તણાવને પગલે ભારતની સૌથી મોટી એરલાઇન ઈન્ડિગો (IndiGo) એ મુસાફરો માટે પોતાના ખજાનાના દ્વાર ખોલી દીધા છે. મધ્ય પૂર્વના અશાંત આકાશ અને સુરક્ષાના જોખમોને ધ્યાનમાં રાખીને એરલાઇને તેની પસંદગીની આંતરરાષ્ટ્રીય ફ્લાઇટ્સનું સ્થગિતકરણ (Suspension) લંબાવ્યું છે. જોકે, આ મુશ્કેલ સમયમાં મુસાફરોને આર્થિક ફટકો ન પડે તે માટે કંપનીએ 7 માર્ચ સુધીની ફ્લાઇટ્સ માટે 'ઝીરો કોસ્ટ' રિશેડ્યુલિંગ અને સંપૂર્ણ રિફંડની જાહેરાત કરી છે.
કોને મળશે આ સુવિધાનો લાભ?
ઈન્ડિગોની નવી ગાઈડલાઈન્સ મુજબ, જે મુસાફરોએ 28 ફેબ્રુઆરી, 2026 ના રોજ અથવા તે પહેલાં ટિકિટ બુક કરાવી હતી અને જેમની મુસાફરી 7 માર્ચ, 2026 સુધી નિર્ધારિત હતી, તેઓ આ સુવિધાનો લાભ લઈ શકશે.
•    ફ્રી રિશેડ્યુલિંગ: મુસાફરો કોઈપણ વધારાના ચાર્જ વિના પોતાની મુસાફરીની તારીખ બદલી શકે છે.
•    સંપૂર્ણ રિફંડ: જો કોઈ મુસાફર અત્યારે મુસાફરી કરવા માંગતા ન હોય, તો તેઓ ટિકિટ કેન્સલ કરાવીને પૂરેપૂરા પૈસા પાછા મેળવી શકે છે.
સુરક્ષા અને જવાબદારી સર્વોપરી
ઈન્ડિગોએ સોશિયલ મીડિયા પ્લેટફોર્મ 'X' પર જણાવ્યું હતું કે, "અમે પ્રાદેશિક ઘટનાક્રમ અને ફ્લાઇટ કામગીરી પર તેની અસરનું સતત મૂલ્યાંકન કરી રહ્યા છીએ. હાલની સ્થિતિમાં મુસાફરોની સલામતી જ અમારો સૌથી મોટો મંત્ર છે, અને તેથી જ અમે આંતરરાષ્ટ્રીય સેવાઓ સ્થગિત કરવાનો જવાબદાર નિર્ણય લીધો છે." એરલાઇને એ પણ સંકેત આપ્યા છે કે બદલાતી પરિસ્થિતિ મુજબ અન્ય કેટલીક ફ્લાઇટ્સ પર પણ તેની અસર પડી શકે છે.
મુસાફરો માટે મહત્વની સૂચના
એરલાઇને વિનંતી કરી છે કે મુસાફરો એરપોર્ટ પર જતાં પહેલાં વેબસાઇટ પર પોતાની ફ્લાઇટનું સ્ટેટસ (Flight Status) અચૂક ચેક કરી લે. જે મુસાફરોના બુકિંગ પ્રભાવિત થયા છે, તેમને ઈન્ડિગોની ટીમ સીધો સંપર્ક કરશે અને મુસાફરીના વૈકલ્પિક રસ્તાઓ વિશે માર્ગદર્શન આપશે. ઉપરાંત, એરલાઇને તેના મોબાઈલ એપ અને ઈમેલ દ્વારા પણ મુસાફરોને સતત અપડેટ રહેવા જણાવ્યું છે.
પશ્ચિમ એશિયાના દેશોમાં ફસાયેલા ભારતીયો અને ત્યાંથી ભારત આવવા માંગતા પ્રવાસીઓ માટે ઈન્ડિગોનો આ નિર્ણય એક મોટી રાહત સાબિત થશે.