દુબઈ: મધ્ય પૂર્વમાં વધતા યુદ્ધના તણાવને પગલે સંયુક્ત આરબ અમીરાત (UAE) એ તેના હવાઈ ક્ષેત્રની સુરક્ષાને ધ્યાનમાં રાખીને મોટો નિર્ણય લીધો છે. પ્રાદેશિક એરસ્પેસ બંધ થવાને કારણે સોમવારે પણ ફ્લાઇટ કામગીરી ઠપ્પ રહી હતી, અને હવે ઉડ્ડયન અધિકારીઓએ પુષ્ટિ કરી છે કે આ સસ્પેન્શન મંગળવાર, 3 માર્ચ સુધી લંબાવવામાં આવ્યું છે. દુબઈ ઇન્ટરનેશનલથી લઈને અબુ ધાબીના ઝાયેદ ઇન્ટરનેશનલ સુધીના તમામ મુખ્ય એરપોર્ટ પર અત્યારે સન્નાટો જોવા મળી રહ્યો છે.
કઈ એરલાઇન્સ કેટલો સમય બંધ રહેશે?
UAE ની મુખ્ય એરલાઇન્સે તેમના ઓપરેશનલ શિડ્યુલમાં ફેરફાર કર્યો છે:
•    અમીરાત (Emirates): 3 માર્ચ, મંગળવારના રોજ બપોરે 3:00 વાગ્યા સુધી તમામ ફ્લાઇટ્સ સ્થગિત.
•    એતિહાદ (Etihad): 3 માર્ચ, બપોરે 2:00 વાગ્યા સુધી અબુ ધાબીની સેવાઓ બંધ.
•    ફ્લાયદુબઈ અને એર અરેબિયા: આ કંપનીઓએ પણ મંગળવાર સુધી પોતાની ફ્લાઇટ્સ રદ કરી છે. મુસાફરો 20 દિવસની અંદર ફરીથી બુકિંગ કરાવી શકશે.
•    ભારતીય એરલાઇન્સ: એર ઇન્ડિયા, ઇન્ડિગો અને એર ઇન્ડિયા એક્સપ્રેસે પણ ખાડી દેશોની અનેક ફ્લાઇટ્સ રદ કરવાની જાહેરાત કરી છે.
મુસાફરો માટે 'ગૂડ ન્યૂઝ': સરકાર ઉઠાવશે ખર્ચ
આ મુશ્કેલ સમયમાં UAE ની જનરલ સિવિલ એવિએશન ઓથોરિટી (GCAA) એ માનવતાવાદી અભિગમ અપનાવ્યો છે. સરકારે જાહેરાત કરી છે કે એરસ્પેસ બંધ થવાને કારણે એરપોર્ટ પર ફસાયેલા અને ટ્રાન્ઝિટ મુસાફરોનો રહેવા, જમવા અને નાસ્તાનો તમામ ખર્ચ UAE સરકાર અને એરલાઇન્સ દ્વારા ઉઠાવવામાં આવશે. અત્યાર સુધીમાં અંદાજે 20,200 મુસાફરોને સુરક્ષિત રીતે હોટલ અને અન્ય આશ્રયસ્થાનોમાં ખસેડવામાં આવ્યા છે.
એરપોર્ટ જવાની ભૂલ ન કરતા!
દુબઈ એરપોર્ટ ઓથોરિટીએ મુસાફરોને કડક સૂચના આપી છે કે તેઓ અત્યારે ટર્મિનલ પર મુસાફરી ન કરે. એરપોર્ટ પર ભીડ વધવાને કારણે વ્યવસ્થા ખોરવાઈ શકે છે. મુસાફરોને સલાહ આપવામાં આવી છે કે તેઓ ઘરે બેઠા જ એરલાઇન્સની વેબસાઇટ અથવા મોબાઇલ એપ પર ફ્લાઇટનું સ્ટેટસ તપાસે. પરિસ્થિતિ સામાન્ય થતા જ કટોકટી પ્રતિભાવ યોજનાઓ હેઠળ કામગીરી ઝડપથી શરૂ કરવામાં આવશે.
GCAA એ સ્પષ્ટ કર્યું છે કે મુસાફરોની સુરક્ષા અને UAE એરસ્પેસનું રક્ષણ તેમની સર્વોચ્ચ પ્રાથમિકતા છે. જ્યાં સુધી સુરક્ષા મૂલ્યાંકન સંતોષકારક નહીં હોય, ત્યાં સુધી આકાશમાં વિમાનોની અવરજવર શરૂ કરવામાં આવશે નહીં.