નવી દિલ્હી: દિલ્હીમાં વસતી લાખો મહિલાઓ અને દીકરીઓ માટે આ વખતની હોળી ખુશીઓના રંગો લઈને આવી છે. દિલ્હીમાં ભાજપ સરકારના શાસનનું એક વર્ષ પૂર્ણ થવાના અવસરે, રાષ્ટ્રપતિ દ્રૌપદી મુર્મુએ ઈન્દિરા ગાંધી સ્ટેડિયમ ખાતેથી મહિલા સશક્તિકરણ માટે ચાર અત્યંત મહત્વકાંક્ષી યોજનાઓનું ઉદ્ઘાટન કર્યું છે. "સશક્ત મહિલા, સમૃદ્ધ દિલ્હી" ના સૂત્ર સાથે શરૂ કરાયેલા આ કાર્યક્રમમાં દિલ્હીના ઉપરાજ્યપાલ વી.કે. સક્સેના અને મુખ્યમંત્રી રેખા ગુપ્તા પણ ખાસ ઉપસ્થિત રહ્યા હતા.
1. 'સહેલી પિંક સ્માર્ટ કાર્ડ': બસ મુસાફરી હવે વધુ સ્માર્ટ
દિલ્હીની મહિલાઓ માટે હવે મુસાફરી વધુ સરળ બનશે. નવી યોજના હેઠળ 'સહેલી પિંક સ્માર્ટ કાર્ડ' જારી કરવામાં આવશે.
•    આ કાર્ડ દ્વારા DTC બસોમાં મફત મુસાફરી કરી શકાશે.
•    આ કાર્ડનો ઉપયોગ મેટ્રો અને RRTS જેવી જાહેર સેવાઓમાં પેઇડ મુસાફરી માટે પણ થઈ શકશે. આ કાર્ડનો તમામ ખર્ચ દિલ્હી સરકાર ભોગવશે.
2. દિલ્હી લખપતિ બિટિયા યોજના
દીકરીઓના જન્મ અને શિક્ષણને પ્રોત્સાહન આપવા માટે જૂની લાડલી યોજનાને નવું સ્વરૂપ આપવામાં આવ્યું છે.
•    હવે દીકરીના જન્મથી લઈને તેના ઉછેરના વિવિધ તબક્કે કુલ ₹56,000 જમા કરવામાં આવશે.
•    દીકરી ૨૧ વર્ષની થશે ત્યાં સુધીમાં વ્યાજ સાથે આ રકમ ₹1 લાખથી વધુ થઈ જશે, જે તેના ઉચ્ચ શિક્ષણ કે લગ્ન માટે મોટી મદદ સાબિત થશે.
3. હોળી-દિવાળી પર મફત LPG સિલિન્ડર
મોંઘવારીના જમાનામાં ગૃહિણીઓને રાહત આપતા સરકારે જાહેરાત કરી છે કે રેશનકાર્ડ ધરાવતા તમામ ૧.૫ મિલિયન પરિવારોને વર્ષમાં બે મફત LPG સિલિન્ડર (એક હોળી પર અને એક દિવાળી પર) આપવામાં આવશે. સિલિન્ડરની રકમ સીધી પરિવારના વડાના આધાર-લિંક્ડ બેંક ખાતામાં જમા કરવામાં આવશે.
4. 'મેરી પૂંજી મેરા અધિકાર'
આ યોજના હેઠળ ૪૦,૦૦૦ થી વધુ દીકરીઓને તેમની બાકી રહેલી પાકતી મુદતની રકમ (Maturity Amount) ફાળવવામાં આવી છે. રાષ્ટ્રપતિએ પોતે સોનલ, સીમા અને કિરણ જેવી દીકરીઓને ચેક આપીને આ યોજનાની શરૂઆત કરાવી હતી. આ અંતર્ગત અંદાજે ₹૧૦૦ કરોડની રકમ સીધી લાભાર્થીઓના ખાતામાં જમા કરવામાં આવી છે.
મુખ્યમંત્રી રેખા ગુપ્તાએ આ પ્રસંગે જણાવ્યું હતું કે, દિલ્હી સરકાર વડાપ્રધાનના "મહિલા પૂજા" ના મંત્રને અનુસરી રહી છે અને આ યોજનાઓ દિલ્હીની મહિલાઓને આત્મનિર્ભર બનાવવામાં માઈલસ્ટોન સાબિત થશે.