સીતાપુર (યુપી): ઉત્તર પ્રદેશના સીતાપુર જિલ્લામાં હોળીના તહેવારની તૈયારીઓ વચ્ચે રવિવાર અને સોમવારની રાત્રિ કાળમુખી સાબિત થઈ છે. જિલ્લાના અલગ-અલગ વિસ્તારોમાં સર્જાયેલા ભયાનક માર્ગ અકસ્માતોમાં રેશન ડીલર સહિત કુલ પાંચ લોકોએ પોતાના જીવ ગુમાવ્યા છે. તેજ રફ્તાર અને બેદરકારીને કારણે સર્જાયેલી આ ઘટનાઓએ અનેક પરિવારોની હોળીની ખુશીઓને માતમના માહોલમાં ફેરવી દીધી છે.
રેશન ડીલર અને બે મહિલાઓ કાળનો કોળિયો બની
માછરેહતા વિસ્તારમાં રવિવારે રાત્રે સૌથી વધુ કહેર જોવા મળ્યો હતો. મુસુઓલીના રહેવાસી ૪૮ વર્ષીય રેશન ડીલર અજિત શુક્લા ઉર્ફે બબલુ પોતાની બાઇક પર ઘરે પરત ફરી રહ્યા હતા, ત્યારે એક અજાણ્યા ઝડપી વાહને તેમને જોરદાર ટક્કર મારી હતી. હોસ્પિટલ પહોંચતા પહેલા જ તેમનું નિધન થયું હતું.
આ જ વિસ્તારના સાતલિયા ગામમાં વધુ એક હૃદયદ્રાવક ઘટના બની હતી. જળ જીવન મિશન માટે ખોદાયેલા રસ્તા પાસે ઘરની બહાર માટી સાફ કરી રહેલી ૩૫ વર્ષીય શાલુ પર એક બેકાબૂ કાર ફરી વળી હતી. આટલેથી ન અટકતા, કાર ચાલકે થોડે દૂર ઉભેલા ૫૫ વર્ષીય રામપતિને પણ કચડી નાખ્યા હતા. બંને મહિલાઓના ઘટનાસ્થળે જ કરુણ મોત નિપજ્યા હતા, જ્યારે કાર ચાલક અંધારાનો લાભ લઈ ફરાર થઈ ગયો હતો.
નશાની હાલતમાં બુલેટ ચલાવવી જીવલેણ સાબિત થઈ
સાંડા વિસ્તારમાં ૩૫ વર્ષીય મનોજ નામનો યુવક નશાની હાલતમાં પિતરાઈ ભાઈની બુલેટ લઈને નીકળ્યો હતો. સ્થાનિકોએ તેને રોકવાનો પ્રયાસ કર્યો હોવા છતાં તે ન માન્યો અને તેજ ઝડપે બુલેટ ચલાવી. થોડે દૂર જતાં બુલેટ પરથી કાબૂ ગુમાવતા તે સીધી વીજળીના થાંભલા સાથે અથડાઈ હતી. માથામાં ગંભીર ઈજા થવાને કારણે મનોજનું સ્થળ પર જ મોત થયું હતું. આ અકસ્માતમાં રસ્તે ઉભેલા અન્ય લોકો પણ ઘાયલ થયા હતા, જેમને સારવાર માટે લખનૌ રિફર કરવામાં આવ્યા છે.
ઘરે પરત ફરતી વખતે સર્જાયો અકસ્માત
ઇમાલિયા સુલતાનપુરના જગના ગામનો લક્ષ્મણ (૪૦) તેના ભત્રીજા રિંકુ સાથે લખીમપુરમાં મજૂરી કરતો હતો. બંને હોળી ઉજવવા માટે રવિવારે રાત્રે બાઇક પર ઘરે પરત ફરી રહ્યા હતા. નૌવા અંબરપુર પાસે વળાંક લેતી વખતે બાઇક બેકાબૂ થઈને ખાડામાં પલટી ગઈ હતી. આ અકસ્માતમાં લક્ષ્મણનું મોત થયું છે, જ્યારે ભત્રીજો રિંકુ અત્યારે હોસ્પિટલમાં જિંદગી અને મોત વચ્ચે જંગ લડી રહ્યો છે.
પોલીસે તમામ પાંચેય મૃતદેહોને પોસ્ટમોર્ટમ માટે મોકલી આપ્યા છે અને ફરાર વાહન ચાલકોની શોધખોળ માટે સીસીટીવી ફૂટેજ તપાસવાની તજવીજ હાથ ધરી છે.