વોશિંગ્ટન  : મધ્ય પૂર્વના રણમેદાનમાં અત્યારે બારૂદની ગંધ અને અમેરિકાના આક્રમક તેવર દુનિયાને હચમચાવી રહ્યા છે. અમેરિકી સંરક્ષણ સચિવ પીટ હેગસેથે એક સનસનાટીભરી પ્રેસ કોન્ફરન્સમાં ઈરાન વિરુદ્ધ નિર્ણાયક જંગનું એલાન કરી દીધું છે. તેમણે સ્પષ્ટ શબ્દોમાં કહ્યું કે, "અમે યુદ્ધ શરૂ નથી કર્યું, પણ અમે તેનો અંત લાવીશું." હેગસેથે ઉમેર્યું કે હવે કોઈ 'પોલિટિકલ કરેક્ટનેસ' કે મૂર્ખામીભર્યા નિયમો નહીં હોય; અમેરિકા હવે કોઈ દેશ-નિર્માણ કે લોકશાહી સ્થાપવાના દલદલમાં ફસાયા વગર માત્ર અને માત્ર જીતવા માટે લડી રહ્યું છે. જે સરકારો "અમેરિકા અને ઈઝરાયલનું મૃત્યુ" ઈચ્છતી હતી, તેમને હવે અમેરિકા તે જ 'ભેટ' આપી રહ્યું છે.

ટ્રમ્પ વહીવટીતંત્રની રણનીતિ હવે 'સર્જિકલ અને હેવી' એટેક પર કેન્દ્રિત છે. હેગસેથે ચેતવણી આપી છે કે ઈરાનની મિસાઈલ ફેક્ટરીઓ, નૌકાદળ અને સુરક્ષા માળખાને એવી રીતે તોડી પાડવામાં આવશે કે તેઓ ક્યારેય પરમાણુ શસ્ત્રો બનાવવાનું વિચારી પણ નહીં શકે. તેમણે પૂર્વ રાષ્ટ્રપતિ ઓબામાના સમયના પરમાણુ સોદાને 'ભયંકર ભૂલ' ગણાવીને કહ્યું કે ઈરાને અત્યાર સુધી અમેરિકાના માથા પર પરંપરાગત બંદૂક રાખીને જૂઠું બોલવાનું કામ કર્યું હતું, પણ હવે ટ્રમ્પના શાસનમાં તે ચાલશે નહીં. અમેરિકા હવે માફી માંગ્યા વિના અને કોઈપણ ખચકાટ વિના વિશ્વના કોઈપણ ખૂણે અમેરિકનોને ધમકી આપનારાઓનો શિકાર કરશે અને તેમને ઠાર મારશે.

પીટ હેગસેથે રાષ્ટ્રપતિ ડોનાલ્ડ ટ્રમ્પની હિંમતની પ્રશંસા કરતા જણાવ્યું કે, છેલ્લા 47 વર્ષોથી તેહરાનનું ઇસ્લામિક શાસન અમેરિકા વિરુદ્ધ છૂપો જંગ લડી રહ્યું હતું. બૈરૂતના કાર બોમ્બ બ્લાસ્ટથી લઈને ઇરાક-અફઘાનિસ્તાનમાં અમેરિકી સૈનિકોના લોહી વહેવડાવવા પાછળ ઈરાની કુદ્સ ફોર્સ અને IRGC નો હાથ રહ્યો છે. તેમણે ગર્જના કરી કે પાગલ ઇસ્લામિક ભ્રમણામાં રાચતી સરકારો પાસે પરમાણુ બોમ્બ હોઈ શકે નહીં. જેમ જેમ દિવસો પસાર થઈ રહ્યા છે, તેમ તેમ અમેરિકાની સૈન્ય ક્ષમતાઓ વધુ ધારદાર બની રહી છે અને ઈરાન નબળું પડી રહ્યું છે. આ નિવેદને સ્પષ્ટ કરી દીધું છે કે પશ્ચિમ એશિયામાં હવે શાંતિ નહીં, પણ સંપૂર્ણ સત્તા પલટો અમેરિકાનું લક્ષ્ય છે.