નવી દિલ્હી: ઈરાનના સર્વોચ્ચ નેતા આયાતુલ્લાહ અલી ખામેનીના અવસાન બાદ સમગ્ર વિશ્વ બે ભાગમાં વહેંચાઈ ગયું છે, પરંતુ તેની સૌથી વધુ અસર ભારતીય રાજકારણમાં જોવા મળી રહી છે. ચર્ચા દરમિયાન ભારત સરકારના વલણ પર તીખી પ્રતિક્રિયાઓ જોવા મળી હતી. વિપક્ષી નેતાઓ અને સંરક્ષણ નિષ્ણાતો માની રહ્યા છે કે આ યુદ્ધની સૌથી ગંભીર અસર ભારત પર પડી શકે છે.

 ચર્ચા દરમિયાન સંરક્ષણ નિષ્ણાત મેજર જનરલ બિશંબર દયાલે ચોંકાવનારું નિવેદન આપતા કહ્યું કે, "આ સમગ્ર યુદ્ધમાં ભારત સૌથી મોટો લૂઝર (નુકસાન વેઠનાર દેશ) સાબિત થઈ રહ્યો છે." તેમના મતે, મધ્ય પૂર્વમાં અસ્થિરતાને કારણે ભારતની ઉર્જા સુરક્ષા અને વ્યૂહાત્મક હિતો જોખમમાં છે. બીજી તરફ, આમ આદમી પાર્ટીના પ્રવક્તા સોમનાથ ભારતીએ પણ સરકાર પર પ્રહાર કરતા કહ્યું કે, ઈરાન મુદ્દે મૌન રહેવાથી ભારતને ભવિષ્યમાં મોટું નુકસાન થઈ શકે છે.
  ખામેનીના મૃત્યુ પછી દુનિયા સ્પષ્ટપણે બે ધ્રુવોમાં વહેંચાઈ ગઈ છે. એક તરફ અમેરિકા અને ઈઝરાયેલ આ ઘટનાને 'ન્યાય' ગણાવી રહ્યા છે, ત્યારે બીજી તરફ મોસ્કો (રશિયા) અને બેઇજિંગ (ચીન) એ વોશિંગ્ટનની કાર્યવાહીનો સખત વિરોધ કર્યો છે. રશિયાએ આ ઘટનાને 'અસ્વીકાર્ય હત્યા' ગણાવી છે, જે દર્શાવે છે કે આગામી દિવસોમાં વૈશ્વિક તણાવ હજુ વધશે.
સૌથી વધુ ચોંકાવનારા અહેવાલ એ છે કે ઈરાને હવે પાકિસ્તાનને પણ મિસાઈલ હુમલાની ધમકી આપી છે. એવું મનાય છે કે ઈરાન પોતાના નેતાના મૃત્યુ પાછળ પાકિસ્તાની સીમા પર રહેલી કેટલીક ગતિવિધિઓને શંકાની નજરે જોઈ રહ્યું છે. જો ઈરાન અને પાકિસ્તાન વચ્ચે સંઘર્ષ વધે છે, તો દક્ષિણ એશિયાની સુરક્ષા વ્યવસ્થા સંપૂર્ણપણે ખોરવાઈ શકે છે.
સોશિયલ મીડિયા અને કેટલાક આંતરરાષ્ટ્રીય મંચો પર એવી પણ અટકળો ચાલી રહી છે કે IRGC (ઈરાની રિવોલ્યુશનરી ગાર્ડ) એ ઈઝરાયેલના વડાપ્રધાન બેન્જામિન નેતન્યાહૂની ઓફિસને નિશાન બનાવી છે. જોકે, આ બાબતે હજુ સુધી કોઈ સત્તાવાર પુષ્ટિ મળી નથી, પરંતુ આવી અફવાઓ યુદ્ધની ભયાનકતામાં વધારો કરી રહી છે. ભારત અત્યારે 'રાષ્ટ્ર પ્રથમ' ની નીતિ સાથે ચાલી રહ્યું છે, પરંતુ ઘરઆંગણે વિપક્ષી દળો સરકારને શોક વ્યક્ત કરવા કે સ્પષ્ટ વલણ અપનાવવા દબાણ કરી રહ્યા છે