અમૃતસર: મધ્ય પૂર્વમાં ચાલી રહેલા ભીષણ સૈન્ય સંઘર્ષ અને વૈશ્વિક અસ્થિરતાનો લાભ ઉઠાવીને ભારતની પશ્ચિમી સરહદે અશાંતિ ફેલાવવાના પાકિસ્તાની મનસૂબા ફરી એકવાર બેનકાબ થયા છે. પંજાબના અમૃતસર સેક્ટરમાં આંતરરાષ્ટ્રીય સરહદ પર તૈનાત બોર્ડર સિક્યુરિટી ફોર્સ (BSF) ના જવાનોએ સોમવારે મોડી રાત્રે કાંટાળા તારની વાડ નજીક શંકાસ્પદ હાલતમાં ફરતા એક પાકિસ્તાની ઘૂસણખોરને દબોચી લીધો છે. પકડાયેલા શખ્સની ઓળખ પાકિસ્તાનના શેખુપુરા જિલ્લાના મુરીદકે ગામના રહેવાસી મોહમ્મદ અશફાક તરીકે થઈ છે. સર્ચ ઓપરેશન દરમિયાન તેની પાસેથી આઠ હજાર રૂપિયાનું પાકિસ્તાની ચલણ, એક મોબાઈલ ફોન અને ત્રણ અલગ-અલગ સીમકાર્ડ મળી આવતા સુરક્ષા એજન્સીઓના કાન સરવા થયા છે.

BSF ની ૧૮૧મી બટાલિયનના કમાન્ડન્ટ રાકેશ નેગીએ આપેલી માહિતી મુજબ, સરહદ ચોકી 'રાજાતાલ' નજીક રાત્રિ પેટ્રોલિંગ દરમિયાન જવાનોએ અંધારાનો લાભ ઉઠાવીને ભારતીય ક્ષેત્રમાં પ્રવેશવાનો પ્રયાસ કરી રહેલા આ શખ્સને પડકાર્યો હતો. સૈનિકોની સતર્કતાને કારણે ઘૂસણખોર ભાગી શકે તે પહેલા જ તેને ઝડપી પાડવામાં આવ્યો હતો. પ્રાથમિક પૂછપરછમાં તેણે પોતાને પાકિસ્તાની નાગરિક ગણાવ્યો છે, ત્યારબાદ તેને વધુ તપાસ માટે ઘરિંડા પોલીસ સ્ટેશનને સોંપવામાં આવ્યો છે. તપાસકર્તાઓ એ જાણવાનો પ્રયાસ કરી રહ્યા છે કે શું તેને સરહદના આ વિસ્તારમાં કોઈ સ્થાનિક મદદ મળી રહી હતી અથવા તે કોઈ મોટા જાસૂસી નેટવર્કનો હિસ્સો છે.

ચિંતાજનક બાબત એ છે કે છેલ્લા બે દિવસમાં પંજાબ સરહદે પાકિસ્તાની નાગરિક ઝડપાયાની આ સતત બીજી ઘટના છે. રવિવારે જ તરનતારનના ખેમકરણ સેક્ટરમાં BSF અને નાર્કોટિક્સ કંટ્રોલ બ્યુરો (NCB) એ એક સંયુક્ત ઓપરેશન હાથ ધરીને ૧૦ કિલો હેરોઈન સાથે અબુ બકર નામના પાકિસ્તાનીની ધરપકડ કરી હતી. અબુ બકરના મોબાઈલમાંથી અનેક શંકાસ્પદ નંબરો મળી આવ્યા છે અને તે પાકિસ્તાની ગુપ્તચર એજન્સી ISI તેમજ પ્રતિબંધિત આતંકવાદી સંગઠન 'ખાલિસ્તાન લિબરેશન ફોર્સ' માટે કામ કરતો હોવાનું ખુલ્યું છે. બે દિવસમાં બે ઘૂસણખોરો ઝડપાતા સરહદ પર સુરક્ષા વ્યવસ્થા અત્યંત કડક કરી દેવામાં આવી છે.

વર્તમાન વૈશ્વિક સ્થિતિને જોતા ભારતની પશ્ચિમી સરહદો પર હાઈ-એલર્ટ જાહેર કરવામાં આવ્યું છે. મધ્ય પૂર્વના યુદ્ધના કારણે આંતરરાષ્ટ્રીય ધ્યાન ભટક્યું છે, ત્યારે પાકિસ્તાન તેનો ઉપયોગ ડ્રગ્સની હેરાફેરી અને આતંકવાદી ઘૂસણખોરી માટે કરી શકે છે તેવી ભીતિ સેવવામાં આવી રહી છે. પંજાબ પોલીસ અને કેન્દ્રીય એજન્સીઓ હવે એ દિશામાં તપાસ કરી રહી છે કે શું આ બંને ધરપકડ વચ્ચે કોઈ કનેક્શન છે કે કેમ. સરહદ પર બીએસએફ દ્વારા લેસર ફેન્સિંગ અને ડ્રોન સર્વેલન્સ વધારી દેવામાં આવ્યું છે જેથી સીમાપારથી થતી કોઈપણ નાપાક હરકતને જડબાતોડ જવાબ આપી શકાય.