દુબઈ/અબુ ધાબી: મધ્ય પૂર્વમાં ઇઝરાયેલ-ઈરાન યુદ્ધ હવે ખાડી દેશોના સુરક્ષિત ગણાતા શહેરો સુધી પહોંચી ગયું છે. મંગળવારે મોડી રાત્રે દુબઈમાં અમેરિકી કોન્સ્યુલેટ નજીક થયેલા ભીષણ ડ્રોન હુમલાએ સમગ્ર વિશ્વને ચોંકાવી દીધું છે. ઈરાન દ્વારા અમેરિકી રાજદ્વારી મિશનને નિશાન બનાવીને કરવામાં આવેલા આ હુમલા બાદ કોન્સ્યુલેટ પરિસરમાં આગ ફાટી નીકળી હતી, જેને કાબૂમાં લેવા માટે કલાકો સુધી મથામણ કરવી પડી હતી. કુવૈત અને રિયાધ બાદ હવે દુબઈ અને અબુ ધાબી પર તોળાતા જોખમને જોતા યુએઈ સત્તાવાળાઓએ હાઈ-એલર્ટ જાહેર કર્યું છે. સુરક્ષા એજન્સીઓએ નાગરિકોને કડક સૂચના આપી છે કે આકાશમાંથી પડતા કોઈપણ કાટમાળ કે શંકાસ્પદ વસ્તુઓને સ્પર્શ ન કરવો કે તેના ફોટા ન પાડવા, કારણ કે તે જીવલેણ સાબિત થઈ શકે છે.

યુદ્ધની આ ભયાનક અસરો હવે વૈશ્વિક પરિવહન અને ઉડ્ડયન ક્ષેત્રે દેખાઈ રહી છે. અમીરાત એરલાઇન્સે ૪ માર્ચ સુધી અને એતિહાદ એરવેઝે ૫ માર્ચ સુધીની તમામ ફ્લાઈટ્સ રદ કરી દેતા દુબઈ અને અબુ ધાબી એરપોર્ટ પર યુદ્ધ જેવી સ્થિતિ સર્જાઈ છે. અમેરિકી વિદેશ મંત્રી માર્કો રુબિયોએ અત્યંત ગંભીર વલણ અપનાવતા યુએઈ, બહેરીન અને ઇજિપ્ત સહિત ૧૩ દેશોમાં રહેતા અમેરિકનોને તાત્કાલિક તે દેશો છોડી દેવા 'નાઉ લીવ' (Now Leave) ઓર્ડર જારી કર્યો છે. ફ્રાન્સ સરકાર પણ પોતાના નાગરિકોને પરત લાવવા માટે વિશેષ ફ્લાઈટ્સનું આયોજન કરી રહી છે. આ તરફ ભારતીય એરલાઇન્સ પણ ઓમાન અને સાઉદી અરેબિયા જેવા સુરક્ષિત ગણાતા માર્ગો દ્વારા ફસાયેલા ભારતીયોને એરલિફ્ટ કરવા માટે મર્યાદિત અને ખાસ ફ્લાઈટ્સ ચલાવી રહી છે.

આર્થિક મોરચે પણ ભારત સહિતના દેશોને મોટો ફટકો પડ્યો છે. મધ્ય પૂર્વમાં દરિયાઈ માર્ગો પર વધતા જોખમને કારણે જવાહરલાલ નેહરુ પોર્ટ ટ્રસ્ટ (JNPT) ખાતે ૫,૦૦૦થી વધુ નિકાસ કન્ટેનરો ફસાઈ ગયા છે. જેમાં ૧,૦૦૦ જેટલા કન્ટેનર કૃષિ પેદાશો અને જલદી બગડી જાય તેવી વસ્તુઓથી ભરેલા છે, જેના કારણે કરોડો રૂપિયાનું નુકસાન થવાની ભીતિ છે. પોર્ટ ઓથોરિટી દ્વારા આ કન્ટેનરોને સાચવવા માટે પ્લગ-ઇન સુવિધાઓ અને ફ્રી સ્ટોરેજની જાહેરાત કરવામાં આવી છે. બીજી તરફ, રાષ્ટ્રપતિ ડોનાલ્ડ ટ્રમ્પે સ્પષ્ટ કર્યું છે કે તેહરાનની પરમાણુ ક્ષમતાઓને ખતમ ન કરવામાં આવે ત્યાં સુધી અમેરિકા પીછેહઠ કરશે નહીં, જે સૂચવે છે કે આગામી દિવસોમાં આ સંઘર્ષ વધુ ઉગ્ર બની શકે છે.