મથુરા: વિશ્વભરમાં બ્રજની હોળીનો અનેરો મહિમા છે, પરંતુ શું તમે ક્યારેય કાદવ અને માટીથી રમાતી હોળી વિશે સાંભળ્યું છે? મથુરાના નૌહઝીલ અને સુરીર વિસ્તારમાં આજે એક એવી અનોખી પરંપરા જોવા મળી જે ભગવાન શ્રીકૃષ્ણ પ્રત્યેના નિખાલસ પ્રેમને પ્રતિબિંબિત કરે છે. અહીંના લોકો રંગોની હોળી રમ્યા બાદ બીજા દિવસે કાદવ અને ચીકણી માટીથી હોળી રમીને પરંપરાને જીવંત રાખે છે.
શ્રીકૃષ્ણના બાળપણની યાદો તાજી થઈ
માન્યતા છે કે ભગવાન શ્રીકૃષ્ણને હોળી અત્યંત પ્રિય હતી અને તેઓ ગોવાળો સાથે વ્રજની ગલીઓમાં માટી અને કાદવમાં રમીને આનંદ માણતા હતા. બ્રજવાસીઓ માટે આ માત્ર કાદવ નથી, પણ ઠાકોરજીનો પ્રસાદ છે. આધુનિક કેમિકલ યુક્ત રંગોના જમાનામાં પણ અહીંના શ્રદ્ધાળુઓ કુદરતી માટી અને કાદવથી એકબીજાને રંગીને ધન્યતા અનુભવે છે. આ દ્રશ્યો જોવા માટે દેશ-વિદેશના સેંકડો પ્રવાસીઓ ખાસ બ્રજ ધામમાં પડાવ નાખે છે.
પરંપરા અને ભક્તિનો સંગમ
બ્રજમાં હોળીના દરેક દિવસનું અલગ મહત્વ છે. ક્યાંક લઠ્ઠમાર હોળી તો ક્યાંક લાડુ અને ફૂલોની હોળી રમાય છે, પરંતુ નૌહઝીલની આ કાદવ વાળી હોળી સૌનું ધ્યાન ખેંચે છે. સ્થાનિકો જણાવે છે કે આ રીતે હોળી રમવાથી અહંકાર દૂર થાય છે અને માણસ પોતાની ધરતી સાથે જોડાયેલો રહે છે. ઢોલ-નગારાના તાલે જ્યારે હજારો ભક્તો માટીમાં લોટતા જોવા મળે છે, ત્યારે આખું વાતાવરણ ભક્તિમય બની જાય છે.
ગલીઓમાં ઉમટ્યો માનવ મહેરામણ
આજે સવારથી જ મથુરાની ગલીઓમાં ઉત્સાહનો માહોલ જોવા મળ્યો હતો. યુવાનોથી લઈને વડીલો સુધી સૌ કોઈ આ પરંપરામાં જોડાયા હતા. પર્યટન વિભાગના મતે, બ્રજની આ વૈવિધ્યસભર હોળી ભારતીય સંસ્કૃતિની ધરોહર છે. આ અનોખા ઉત્સવે સાબિત કરી દીધું છે કે કાન્હાના પ્રેમમાં રંગોની જરૂર નથી, અહીં તો માટી પણ સોના જેવી કિંમતી લાગે છે.