નવી દિલ્હી:   મધ્ય પૂર્વમાં સળગી રહેલી યુદ્ધની જ્વાળાઓ હવે ભારતીયોના ખિસ્સા પર સીધો પ્રહાર કરવા જઈ રહી છે. વિશ્વના સૌથી મોટા LNG નિકાસકાર કતારે અચાનક જ તેના ગેસ લિક્વિફેક્શન ઓપરેશન્સ સંપૂર્ણપણે બંધ કરવાની જાહેરાત કરીને વૈશ્વિક ઉર્જા બજારમાં ભૂકંપ લાવી દીધો છે. ઈરાન અને ઈઝરાયેલ વચ્ચે વધતા જતા તણાવને પગલે લેવાયેલા આ નિર્ણયથી ભારત માટે સંકટના વાદળો ઘેરાયા છે, કારણ કે ભારત પોતાની જરૂરિયાતનો મોટો હિસ્સો કતાર પાસેથી આયાત કરે છે. આ શટડાઉનને કારણે ગેસ સપ્લાય ચેઈન સંપૂર્ણપણે ખોરવાઈ ગઈ છે, જેની સીધી અસર આગામી દિવસોમાં ભારતીય બજારોમાં જોવા મળશે.

ભારત દર વર્ષે કતાર પાસેથી અંદાજે 27 મિલિયન ટન LNG ખરીદે છે, જે દેશની કુલ જરૂરિયાતના લગભગ 40% જેટલો જંગી હિસ્સો છે. કતારના આ પ્લાન્ટ્સ બંધ થવાથી સ્થાનિક બજારમાં ગેસના પુરવઠામાં રાતોરાત 40% સુધીનો ઘટાડો થવાની ભીતિ છે. જો આ સ્થિતિ લાંબો સમય ચાલશે, તો ગેસ વિતરણ કંપનીઓ પાસે ભાવ વધારવા સિવાય બીજો કોઈ વિકલ્પ નહીં રહે. નિષ્ણાતો માને છે કે એકવાર ઓપરેશન બંધ થયા પછી તેને ફરીથી પૂર્ણ ક્ષમતા પર લાવવામાં ઓછામાં ઓછા બે અઠવાડિયાનો સમય લાગે છે, જેનો અર્થ છે કે આગામી થોડા અઠવાડિયા સુધી ગેસની અછત વર્તાઈ શકે છે.

આ સંકટની સૌથી મોટી અસર સામાન્ય માણસ પર પડશે, કારણ કે CNG ના ભાવ વધવાથી પરિવહન મોંઘું થશે અને PNG ના ભાવ વધવાથી ઘરના બજેટ ખોરવાશે. શહેર ગેસ વિતરણ કંપનીઓ એ પહેલેથી જ ચેતવણી આપી દીધી છે કે જો આંતરરાષ્ટ્રીય સ્તરે સપ્લાય સુરક્ષિત નહીં થાય, તો ભાવમાં વધારો અનિવાર્ય છે. રસ્તાઓ પર દોડતી લાખો સીએનજી કાર અને હજારો ઉદ્યોગો જે કુદરતી ગેસ પર નિર્ભર છે, તેમના માટે આ સમાચાર કોઈ મોટા આંચકાથી ઓછા નથી. હવે ભારત સરકાર અન્ય વિકલ્પો અને વ્યૂહાત્મક અનામત ભંડાર તરફ નજર દોડાવી રહી છે જેથી સામાન્ય જનતાને આ મોંઘવારીના મારથી બચાવી શકાય.