કોલકાતા: ટી૨૦ વર્લ્ડ કપ ૨૦૨૬ની પ્રથમ સેમીફાઈનલમાં ન્યૂઝીલેન્ડે સાઉથ આફ્રિકા સામે એકતરફી વિજય મેળવીને ફાઈનલની ટિકિટ મેળવી લીધી છે. કોલકાતાના ઐતિહાસિક ઈડન ગાર્ડન્સ મેદાન પર રમાયેલા આ હાઈવોલ્ટેજ મુકાબલામાં કીવી ટીમે સાઉથ આફ્રિકાને ૯ વિકેટે પરાજય આપ્યો હતો. ન્યૂઝીલેન્ડના વિજયના હીરો રહેલા ઓપનર ફિન એલને ટી૨૦ વર્લ્ડ કપના ઇતિહાસનું સૌથી ઝડપી શતક ફટકારીને આફ્રિકન બોલરોની લાઇન-લેન્થ બગાડી નાખી હતી.
ફિન એલનનું વાવાઝોડું અને ઐતિહાસિક ભાગીદારી
૧૭૦ રનના પડકારજનક લક્ષ્યાંકનો પીછો કરવા ઉતરેલી ન્યૂઝીલેન્ડની ટીમે શરૂઆતથી જ આક્રમક વલણ અપનાવ્યું હતું. ફિન એલન અને ટિમ સાઈફર્ટે પ્રથમ વિકેટ માટે માત્ર ૫૫ બોલમાં ૧૧૭ રનની તોફાની ભાગીદારી કરી મેચને આફ્રિકાના હાથમાંથી છીનવી લીધી હતી. ટિમ સાઈફર્ટે ૩૩ બોલમાં ૫૮ રન બનાવી કાગિસો રબાડાનો શિકાર બન્યો હતો. જોકે, ફિન એલને બીજી છેડેથી પ્રહાર ચાલુ રાખ્યા હતા અને ૪૩ બોલ બાકી હતા ત્યારે જ ટીમને જીત અપાવી હતી. એલને આ મેચમાં વર્લ્ડ કપ ઇતિહાસની સૌથી ઝડપી સેન્ચુરી ફટકારી નવો કીર્તિમાન સ્થાપિત કર્યો હતો.
સાઉથ આફ્રિકાની બેટિંગ: શરૂઆતી ધબડકો અને યાનસનની લડત
અગાઉ ન્યૂઝીલેન્ડના કેપ્ટન મિશેલ સેન્ટનરે ટોસ જીતીને પ્રથમ બોલિંગ કરવાનો નિર્ણય કર્યો હતો. સાઉથ આફ્રિકાની શરૂઆત ખૂબ જ નબળી રહી હતી. ક્વિન્ટન ડી કોક (૧૦ રન) અને રયાન રિકલ્ટન (૦) વહેલા આઉટ થઈ ગયા હતા. કેપ્ટન એડન માર્કરામ (૧૮), ડેવાલ્ડ બ્રેવિસ (૩૪) અને ડેવિડ મિલર (૬) પણ સસ્તામાં પેવેલિયન ભેગા થતા આફ્રિકાએ ૭૭ રનમાં ૫ વિકેટ ગુમાવી દીધી હતી.
મુશ્કેલ સમયે ટ્રિસ્ટન સ્ટબ્સે ૨૯ રન અને માર્કો યાનસને વિસ્ફોટક બેટિંગ કરી બાજી સંભાળી હતી. યાનસને માત્ર ૩૦ બોલમાં ૫ છગ્ગા અને ૨ ચોગ્ગાની મદદથી અણનમ ૫૫ રન ફટકારીને ટીમને ૨૦ ઓવરમાં ૮ વિકેટે ૧૬૯ રનના સન્માનજનક સ્કોર સુધી પહોંચાડી હતી. ન્યૂઝીલેન્ડ તરફથી મેટ હેનરી, કોલ મેકાન્ચી અને રચિન રવીન્દ્રએ ૨-૨ વિકેટ ઝડપી હતી, જ્યારે લોકી ફર્ગ્યુસન અને જીમી નીશમે ૧-૧ વિકેટ લીધી હતી.
પ્લેઈંગ ઈલેવન અને વ્યૂહરચના
બંને ટીમો આ મહત્વની મેચમાં ફેરફાર સાથે ઉતરી હતી. ન્યૂઝીલેન્ડે મેટ હેનરી અને જીમી નીશમને પરત બોલાવ્યા હતા, જે સફળ સાબિત થયા હતા. સાઉથ આફ્રિકાએ પણ રબાડા, યાનસન અને મહારાજને ટીમમાં સ્થાન આપ્યું હતું, પરંતુ બેટિંગમાં ટોપ ઓર્ડરના નિષ્ફળ દેખાવ અને ફિન એલનની આક્રમકતા સામે તેમની વ્યુહરચના નિષ્ફળ રહી હતી. આ હાર સાથે સાઉથ આફ્રિકાનું વધુ એક વખત વર્લ્ડ કપ જીતવાનું સપનું રોળાયું છે અને ન્યૂઝીલેન્ડ હવે ટાઈટલ જીતવા માટે ફાઈનલમાં ટકરાશે.