નવી દિલ્હી, તા. ૦૫: વૈશ્વિક યુદ્ધની જ્વાળાઓ વચ્ચે રાજદ્વારી મોરચે પણ ગરમાવો આવી ગયો છે. અમેરિકા તરફથી એવો દાવો કરવામાં આવ્યો હતો કે તે ઈરાન પર મિસાઈલ હુમલા કરવા માટે ભારતીય બંદરો અને તેની સુવિધાઓનો ઉપયોગ કરી રહ્યું છે. જોકે, ભારતીય વિદેશ મંત્રાલયે (MEA) આ દાવાઓને સંપૂર્ણપણે પાયાવિહોણા અને સત્યથી વેગળા ગણાવીને અમેરિકાના જૂઠાણાનો પર્દાફાશ કર્યો છે.

આ વિવાદની શરૂઆત અમેરિકી અધિકારી મેકગ્રેગરના એક નિવેદનથી થઈ હતી, જેમાં તેમણે કહ્યું હતું કે, "ગલ્ફમાં અમારા તમામ સૈન્ય ઠેકાણા અને બંદર સુવિધાઓ નાશ પામી છે, તેથી હવે અમે ભારત અને ભારતીય બંદરો પર નિર્ભર છીએ." આ નિવેદને વૈશ્વિક સ્તરે ભારતની તટસ્થતા પર સવાલો ઉભા કર્યા હતા. પરંતુ વિદેશ મંત્રાલયે તુરંત પ્રતિક્રિયા આપતા સ્પષ્ટ કર્યું છે કે ભારતની ધરતી કે તેના બંદરોનો ઉપયોગ કોઈ પણ દેશ વિરુદ્ધ લશ્કરી કાર્યવાહી માટે કરવામાં આવી રહ્યો નથી.

ભારતે હંમેશા શાંતિ અને સંવાદનો પક્ષ લીધો છે. વિદેશ મંત્રાલયના પ્રવક્તાએ ભારપૂર્વક જણાવ્યું કે ભારત આ સંઘર્ષમાં કોઈનો પક્ષ લઈ રહ્યું નથી અને અમેરિકી દાવાઓ માત્ર ભ્રમ ફેલાવવા માટે કરવામાં આવ્યા છે. ભારતની સાર્વભૌમત્વ અને તેની વ્યૂહાત્મક સ્વાયત્તતા સાથે કોઈ બાંધછોડ કરવામાં આવશે નહીં તેવી કડક ચેતવણી પણ આપવામાં આવી છે. આ સ્પષ્ટતા બાદ હવે સ્પષ્ટ થઈ ગયું છે કે ભારત આ ભીષણ જંગમાં પોતાની ‘શાંતિદૂત’ ની છબી જાળવી રાખવા કટિબદ્ધ છે.