મુંબઈ, તા. ૦૫: ભારતની દિગ્ગજ સરકારી કંપની કોલ ઇન્ડિયા લિમિટેડ (CIL) ના શેરોએ આજે શેરબજારમાં જોરદાર ઉડાન ભરી છે. કેનેડા સાથે સંસાધન સુરક્ષા અને ટકાઉ ઉર્જા માટે થયેલી મહત્વપૂર્ણ વાતચીત બાદ કોલ ઇન્ડિયાના શેરમાં ૪% સુધીનો ઉછાળો જોવા મળ્યો છે. દિલ્હીમાં કેનેડાના વડાપ્રધાન માર્ક કાર્ની અને કોલ ઇન્ડિયાના ચેરમેન બી. સાઈરામ વચ્ચે થયેલી ઉચ્ચ સ્તરીય બેઠકે બજારમાં ઉત્સાહ જગાવ્યો છે.
આ ભાગીદારી માત્ર કોલસા પૂરતી મર્યાદિત નથી, પરંતુ તે ભારતના ભવિષ્યના 'નવા ઈંધણ' સમાન ખનિજો પર ધ્યાન કેન્દ્રિત કરશે. ભારત-કેનેડા લિથિયમ, કોબાલ્ટ અને દુર્લભ પૃથ્વી તત્વો (Rare Earth Elements) જેવા સંસાધનો મેળવવા માટે સાથે મળીને કામ કરશે. આ એવા ખનિજો છે જે ઇલેક્ટ્રિક વાહન (EV) અને સેમિકન્ડક્ટર ઉદ્યોગ માટે કરોડરજ્જુ સમાન માનવામાં આવે છે. આ ઉપરાંત, ભારતના સ્ટીલ ઉદ્યોગ માટે જરૂરી કોકિંગ કોલસાનો સતત પુરવઠો સુનિશ્ચિત કરવા માટે પણ કેનેડા સહયોગ કરશે.
રોકાણકારોમાં દિવાળી જેવો માહોલ
આ સમાચાર આવતાની સાથે જ BSE પર કોલ ઇન્ડિયાનો શેર તેના ૫૨-અઠવાડિયાના ઉચ્ચતમ સ્તર (₹૪૬૧.૨૦) ની એકદમ નજીક પહોંચી ગયો હતો. શેર આજે ₹૪૩૭.૪૫ પર ખુલીને જોતજોતામાં ₹૪૫૩.૪૦ સુધી પહોંચી ગયો હતો. છેલ્લા ત્રણ મહિનામાં આ સ્ટોકે ૧૯% થી વધુનું શાનદાર વળતર આપ્યું છે, જે સરકારી કંપનીઓ પ્રત્યે રોકાણકારોનો વધતો વિશ્વાસ દર્શાવે છે.
ટેકનોલોજી અને પર્યાવરણનો સંગમ
કેનેડા તેની અદ્યતન માઇનિંગ ટેકનોલોજી અને ESG (પર્યાવરણીય, સામાજિક અને શાસન) માળખામાં ભારતને મદદ કરશે. આ ભાગીદારી હેઠળ $૨.૬ બિલિયનના યુરેનિયમ સપ્લાય સોદા પર પણ હસ્તાક્ષર થયા છે, જે ભારતના પરમાણુ ઉર્જા કાર્યક્રમને નવું જોમ પૂરું પાડશે. બંને દેશો વચ્ચે મંત્રી સ્તરીય ઉર્જા સંવાદ ફરી શરૂ થવો એ આવનારા સમયમાં ઉર્જા ક્ષેત્રે ભારતની મજબૂત પકડના સંકેત આપે છે.