પટના, તા. ૦૫: રાજકારણમાં વર્ષો સુધી સત્તાના સર્વોચ્ચ શિખર પર રહ્યા પછી પણ વ્યક્તિ કેટલી સાદગીથી જીવી શકે છે, તેનું ઉદાહરણ બિહારના મુખ્યમંત્રી નીતિશ કુમારે પૂરું પાડ્યું છે. વર્ષ ૨૦૨૫ માટે જાહેર કરેલી પોતાની સંપત્તિની વિગતોમાં નીતિશ કુમારે જણાવ્યું છે કે તેમની પાસે માત્ર ₹૨૦,૫૫૨ રોકડ છે. આજના જમાનામાં જ્યાં નેતાઓની મિલકતો કરોડોમાં વધતી હોય છે, ત્યાં નીતિશ કુમારની બેંક બેલેન્સ અને સાદગીભર્યું જીવન ચર્ચાનો વિષય બન્યું છે.
પશુધન પ્રત્યેનો પ્રેમ અને ઘરગથ્થુ સાધનો
નીતિશ કુમારની જંગમ સંપત્તિમાં સૌથી આકર્ષક બાબત તેમનું પશુધન છે. તેમની પાસે ૧૦ ગાય અને ૧૩ વાછરડા છે, જેની કિંમત આશરે ₹૧.૪૫ લાખ આંકવામાં આવી છે. ફિટનેસ પ્રત્યે જાગૃત મુખ્યમંત્રી પાસે ₹૩૫,૦૦૦ની એક ટ્રેડમિલ અને વર્ષો જૂનું એક સ્પિનિંગ વ્હીલ પણ છે. વાહનોની વાત કરીએ તો, તેઓ આજે પણ ૨૦૧૫માં ખરીદેલી પોતાની ફોર્ડ ઇકોસ્પોર્ટ કારનો જ ઉપયોગ કરે છે. ઘરેણાંના નામે તેમની પાસે માત્ર બે સોનાની વીંટી અને એક ચાંદીની વીંટી છે.
દિલ્હીનો ફ્લેટ છે સૌથી કિંમતી મિલકત
મુખ્યમંત્રીની સૌથી મોટી સ્થાવર સંપત્તિ બિહારમાં નહીં પણ દેશની રાજધાની દિલ્હીમાં છે. દિલ્હીના દ્વારકા સેક્ટર-૫માં તેમનો ૧,૦૦૦ ચોરસ ફૂટનો એક ફ્લેટ છે, જે તેમણે ૨૦૦૪માં ₹૧૩.૭૮ લાખમાં ખરીદ્યો હતો. આજે આ ફ્લેટની બજાર કિંમત વધીને આશરે ₹૧.૪૮ કરોડ થઈ ગઈ છે. આશ્ચર્યની વાત એ છે કે, આટલા વર્ષો સુધી બિહારના મુખ્યમંત્રી પદ પર હોવા છતાં, બિહારમાં તેમની પાસે પોતાની કોઈ ખેતીલાયક કે રહેણાંક જમીન નથી.
સંપૂર્ણપણે દેવામુક્ત નેતા
નીતિશ કુમારે પોતાની જાહેર કરેલી વિગતોમાં ગર્વ સાથે જણાવ્યું છે કે તેઓ સંપૂર્ણપણે દેવામુક્ત છે. તેમના પર કોઈ બેંક લોન નથી કે કોઈ સરકારી વિભાગનું બિલ બાકી નથી. દર વર્ષે પોતાની સંપત્તિ જાહેર કરવાની આ પરંપરા દ્વારા તેમણે રાજકીય જીવનમાં પારદર્શિતા અને પ્રામાણિકતાનો મજબૂત સંદેશ આપ્યો છે. તેમની કુલ જંગમ સંપત્તિ અંદાજે ₹૧૭.૬૬ લાખ જેટલી થાય છે.