અબુ ધાબી: સંયુક્ત આરબ અમીરાત (યુ.એ.ઈ.) ની રાજધાની અબુ ધાબીમાં ગુરુવારે રાત્રે તે સમયે ફફડાટ ફેલાઈ ગયો જ્યારે ઝાયેદ ઇન્ટરનેશનલ એરપોર્ટ નજીક એક પછી એક અનેક વિસ્ફોટોના અવાજ સંભળાયા હતા. યુ.એ.ઈ.ના સંરક્ષણ મંત્રાલયના જણાવ્યા અનુસાર, એર ડિફેન્સ સિસ્ટમે મધ્ય આકાશમાં જ અનેક મિસાઇલો અને ડ્રોનને તોડી પાડ્યા હતા.

સત્તાવાર વિગતો મુજબ, મંત્રાલયે કુલ 7 બેલિસ્ટિક મિસાઇલો શોધી કાઢી હતી, જેમાંથી 6 મિસાઇલોને સફળતાપૂર્વક હવામાં જ નષ્ટ કરી દેવામાં આવી હતી, જ્યારે એક મિસાઇલ માનવરહિત વિસ્તારમાં પડી હતી. વિસ્ફોટના અવાજો એટલા પ્રચંડ હતા કે સ્થાનિક રહેવાસીઓમાં ભયનો માહોલ જોવા મળ્યો હતો. એરપોર્ટ પ્રશાસને મુસાફરોને સલાહ આપી છે કે જ્યાં સુધી એરલાઇન દ્વારા સીધી સૂચના ન મળે ત્યાં સુધી એરપોર્ટ પર ન આવવું. આ હુમલાઓ પાછળ પ્રાદેશિક તણાવ જવાબદાર હોવાનું મનાઈ રહ્યું છે.