નવી દિલ્હી (ન્યુઝફર્સ્ટ):ભારતના રાષ્ટ્રપતિ ભવન દ્વારા આજે દેશના વિવિધ રાજ્યોના રાજ્યપાલો અને કેન્દ્રશાસિત પ્રદેશોના લેફ્ટનન્ટ ગવર્નરો (LG) ની મહત્વની નિમણૂકો અને ફેરબદલની સત્તાવાર જાહેરાત કરવામાં આવી છે. આ વ્યાપક ફેરબદલમાં અનેક કદાવર નેતાઓ અને વહીવટકર્તાઓને નવી જવાબદારીઓ સોંપવામાં આવી છે.

રાજ્યપાલોની નવી નિમણૂકો અને ફેરબદલ:
રાષ્ટ્રપતિ કચેરી દ્વારા જાહેર કરાયેલી યાદી મુજબ:

 * તેલંગાણા: હિમાચલ પ્રદેશના વર્તમાન રાજ્યપાલ શિવ પ્રતાપ શુક્લાની તેલંગાણાના રાજ્યપાલ તરીકે નિમણૂક કરવામાં આવી છે.

 * મહારાષ્ટ્ર: તેલંગાણાના રાજ્યપાલ જિષ્ણુ દેવ વર્માને હવે મહારાષ્ટ્રના રાજ્યપાલ પદે ખસેડવામાં આવ્યા છે.

 * બિહાર: બિહારના નવા રાજ્યપાલ તરીકે નિવૃત્ત લેફ્ટનન્ટ જનરલ સૈયદ અતા હસનૈનની વરણી કરવામાં આવી છે.

 * પશ્ચિમ બંગાળ: તામિલનાડુના રાજ્યપાલ આર.એન. રવિને હવે પશ્ચિમ બંગાળની જવાબદારી સોંપાઈ છે.

 * નાગાલેન્ડ: નંદ કિશોર યાદવની નાગાલેન્ડના નવા રાજ્યપાલ તરીકે નિમણૂક કરવામાં આવી છે.

 * હિમાચલ પ્રદેશ: લદ્દાખના લેફ્ટનન્ટ ગવર્નર કવિન્દ્ર ગુપ્તાને હિમાચલ પ્રદેશના રાજ્યપાલ બનાવવામાં આવ્યા છે.

કેન્દ્રશાસિત પ્રદેશોમાં મહત્વના ફેરફાર:
દિલ્હી અને લદ્દાખ જેવા સંવેદનશીલ કેન્દ્રશાસિત પ્રદેશોના વહીવટી વડાઓમાં પણ ફેરફાર કરાયા છે:

 * દિલ્હી: તરનજીત સિંહ સંધુની દિલ્હીના નવા લેફ્ટનન્ટ ગવર્નર તરીકે નિમણૂક કરવામાં આવી છે.

 * લદ્દાખ: દિલ્હીના વર્તમાન એલજી વી. કુમાર સક્સેનાને હવે લદ્દાખના લેફ્ટનન્ટ ગવર્નર તરીકે નિયુક્ત કરાયા છે.

તામિલનાડુ અને કે. કૈલાશનાથન અંગે સસ્પેન્સ:
તામિલનાડુમાં કાયમી રાજ્યપાલની નિમણૂક અંગે હજુ પણ ઉત્સુકતા જળવાઈ રહી છે. કેરળના રાજ્યપાલ રાજેન્દ્ર વિશ્વનાથ અર્લેકરને તામિલનાડુના રાજ્યપાલ તરીકેનો વધારાનો હવાલો સોંપવામાં આવ્યો છે. લાંબા સમયથી જેમના નામની ચર્ચા હતી તેવા કે. કૈલાશનાથનની ભૂમિકા અંગે અત્યારે કોઈ સ્પષ્ટતા કરવામાં આવી નથી, જેના કારણે રાજકીય વર્તુળોમાં સસ્પેન્સ યથાવત રહ્યું છે.