મુંબઈ:   ભારતના લિકર માર્કેટમાં અત્યારે એક મોટું પરિવર્તન જોવા મળી રહ્યું છે, જ્યાં ગ્રાહકો હવે માત્ર દારૂ નહીં પણ 'પ્રીમિયમ અનુભવ' પાછળ ખર્ચ કરવા તૈયાર છે. વિશ્વ વિખ્યાત બ્રાન્ડ 'જેક ડેનિયલ' બનાવતી અમેરિકન કંપની બ્રાઉન-ફોરમેને જાહેરાત કરી છે કે તેઓ આગામી બે થી ત્રણ વર્ષમાં ભારતીય બજારમાં અનેક નવી આંતરરાષ્ટ્રીય બ્રાન્ડ્સ લોન્ચ કરશે. કંપનીના પ્લાન મુજબ, ભારતીયોને હવે 'એલ જીમાડોર' અને 'હેરાદુરા' જેવી પ્રીમિયમ ટેકીલા તેમજ 'બેનરિયાચ' જેવી હાઈ-એન્ડ વ્હિસ્કીનો સ્વાદ માણવા મળશે. કંપની ભારતને તેના સૌથી મહત્વપૂર્ણ આંતરરાષ્ટ્રીય બજારોમાંના એક તરીકે જોઈ રહી છે, કારણ કે અહીં પ્રીમિયમ પીણાંની માંગમાં અભૂતપૂર્વ ઉછાળો આવ્યો છે.

આર્થિક વિશ્લેષકો અને IWSR ના રિપોર્ટ મુજબ, ભારત વર્ષ 2032 સુધીમાં વિશ્વનું સૌથી મોટું દારૂનું બજાર બની શકે છે. દર વર્ષે અંદાજે 1.5 થી 2 કરોડ નવા ગ્રાહકો આ માર્કેટમાં જોડાઈ રહ્યા છે, જે ચીન જેવા દેશોને પણ પાછળ છોડી દેશે. બ્રાઉન-ફોર્મન ઇન્ડિયાના મેનેજિંગ ડિરેક્ટર ગૌરવ સભરવાલના મતે, અગાઉ ભારતીયો પાસે મોંઘી બ્રાન્ડ્સ ખરીદવાની ઈચ્છા હતી પણ પૂરતી આવક કે બ્રાન્ડ્સની ઉપલબ્ધતા નહોતી. હવે વધતી જતી માથાદીઠ આવક અને ગ્લોબલ એક્સપોઝરને કારણે લોકો 'વુડફોર્ડ રિઝર્વ' અને 'જિન મેર' જેવી લક્ઝરી બ્રાન્ડ્સ પર પસંદગી ઉતારી રહ્યા છે. હાલમાં કંપની 10 બ્રાન્ડ્સ વેચે છે, જેમાં ટૂંક સમયમાં વધુ 4 પ્રીમિયમ બ્રાન્ડ્સનો ઉમેરો થશે.

જોકે, ભારતીય બજારમાં પગપેસારો કરવો એટલો સરળ પણ નથી. અહીં દરેક રાજ્યની પોતાની અલગ દારૂ નીતિ, ઊંચા ટેક્સ અને જાહેરાતો પરના કડક નિયમો કંપનીઓ માટે મોટો પડકાર છે. તેમ છતાં, ભારતીય યુવાનો અને મધ્યમ વર્ગની બદલાતી આદતોને જોતા વિદેશી કંપનીઓ અહીં મોટાપાયે રોકાણ કરવા આતુર છે. પ્રીમિયમાઈઝેશનના આ યુગમાં હવે સાદી વ્હિસ્કીના બદલે લોકો ક્વોલિટી અને બ્રાન્ડ વેલ્યુને વધુ મહત્વ આપી રહ્યા છે. આગામી વર્ષોમાં ભારતના બાર અને રિટેલ સ્ટોર્સમાં આંતરરાષ્ટ્રીય બ્રાન્ડ્સનો દબદબો જોવા મળશે, જે ભારતીય આલ્કોહોલ ઉદ્યોગ માટે એક નવા સુવર્ણ યુગની શરૂઆત માનવામાં આવે છે.