દુબઈ: તા.૦૬ ઈરાન અને ઈઝરાયલ વચ્ચે ચાલી રહેલા ભીષણ જંગની અસર હવે દુબઈના આકાશમાં પણ જોવા મળી રહી છે. શુક્રવારે દુબઈના લાખો રહેવાસીઓના મોબાઈલ ફોન એકાએક ઈમરજન્સી એલર્ટથી ધણધણી ઉઠ્યા હતા. યુએઈ (UAE) ના ગૃહ મંત્રાલય દ્વારા જારી કરવામાં આવેલા આ સત્તાવાર સંદેશાએ સમગ્ર શહેરમાં ફફડાટ ફેલાવી દીધો છે. આ સંદેશામાં સ્પષ્ટપણે 'સંભવિત મિસાઈલ ખતરા'ની ચેતવણી આપવામાં આવી હતી, જે દર્શાવે છે કે પશ્ચિમ એશિયાનો સંઘર્ષ હવે અત્યંત નાજુક તબક્કે પહોંચી ગયો છે.
સ્થાનિક સત્તાવાળાઓએ રહેવાસીઓને તાત્કાલિક અસરથી ખુલ્લા વિસ્તારો છોડી દેવા અને નજીકના મજબૂત બાંધકામ ધરાવતા મકાનોમાં આશ્રય લેવા વિનંતી કરી છે. સૂચનામાં ખાસ ભાર મૂકવામાં આવ્યો છે કે લોકોએ કાચની બારીઓ, દરવાજા અને બાલ્કનીઓથી દૂર રહેવું, જેથી કોઈ પણ અણધારી હોનારત સમયે ઈજાથી બચી શકાય. ઈરાન દ્વારા તેના 'પ્રતિશોધ અભિયાન' હેઠળ ગલ્ફ વિસ્તારમાં વધી રહેલી ગતિવિધિઓને પગલે આ સુરક્ષા પગલાં લેવામાં આવ્યા હોવાનું મનાય છે.
આ ભયાનક તણાવની સીધી અસર આંતરરાષ્ટ્રીય હવાઈ સેવાઓ પર પણ પડી છે. દુબઈ દુનિયાનું સૌથી વ્યસ્ત ટ્રાવેલ હબ હોવા છતાં, સુરક્ષાના કારણોસર અનેક એરસ્પેસ બંધ કરી દેવામાં આવ્યા છે. એર ઈન્ડિયા, ઈન્ડિગો અને એમિરેટ્સ જેવી મોટી એરલાઈન્સના શિડ્યુલ ખોરવાઈ ગયા છે. જોકે, ફસાયેલા મુસાફરોને બહાર કાઢવા માટે મર્યાદિત સંખ્યામાં રિપેટ્રિએશન ફ્લાઈટ્સ ચલાવવામાં આવી રહી છે, પરંતુ સુરક્ષાની સ્થિતિ ગમે ત્યારે બદલાઈ શકે તેમ હોવાથી એરપોર્ટ પર ભારે અરાજકતાનો માહોલ જોવા મળી રહ્યો છે.