મુંબઈ: તા.૦૬ પશ્ચિમ એશિયામાં ચાલી રહેલા ભારે તણાવ અને હવાઈ ક્ષેત્રના અવરોધો વચ્ચે ભારતની સૌથી મોટી એરલાઇન ઈન્ડિગો (IndiGo) એ મોટી રાહત આપી છે. ઈન્ડિગોએ જાહેરાત કરી છે કે શુક્રવાર, ૬ માર્ચના રોજ તે મધ્ય પૂર્વના ૮ મુખ્ય સ્થળો માટે ૧૭ પ્રસ્થાનો (કુલ ૩૪ સેક્ટર્સ) નું સંચાલન કરશે. આ નિર્ણય એવા સમયે લેવાયો છે જ્યારે હજારો મુસાફરો ફ્લાઇટ્સ રદ થવાને કારણે ફસાયેલા છે. એરલાઇન અત્યારે પરિસ્થિતિ પર બારીકાઈથી નજર રાખી રહી છે અને સરકારી અધિકારીઓના સતત સંપર્કમાં છે.
ઈન્ડિગોએ જે રૂટ પર ફ્લાઇટ્સ શરૂ કરી છે તેમાં મુંબઈ-મદીના, દિલ્હી-જેદ્દાહ, બેંગલુરુ-જેદ્દાહ અને હૈદરાબાદ-મસ્કત જેવી મહત્વની સેવાઓનો સમાવેશ થાય છે. આ ઉપરાંત, દુબઈ, શારજાહ, અબુ ધાબી, ફુજૈરાહ અને રાસ અલ ખૈમાહ માટે પણ વિશેષ ઉડાનનું આયોજન કરવામાં આવ્યું છે. એરલાઇને સ્પષ્ટ કર્યું છે કે આ તમામ ફ્લાઇટ્સ વર્તમાન સુરક્ષા પરિસ્થિતિને આધીન રહેશે અને જો સ્થિતિ વણસશે તો શિડ્યુલમાં તાત્કાલિક ફેરફાર પણ થઈ શકે છે.
મુસાફરો માટે ખાસ સૂચના જારી કરતા ઈન્ડિગોએ જણાવ્યું છે કે, જે ગ્રાહકોની ફ્લાઇટ કન્ફર્મ છે તેમનો એરલાઇન દ્વારા સીધો સંપર્ક કરવામાં આવશે. મુસાફરોને વિનંતી કરવામાં આવી છે કે જ્યાં સુધી તેમને સત્તાવાર પુષ્ટિ ન મળે ત્યાં સુધી એરપોર્ટ પર ન જાય, જેથી ત્યાં ભીડ અને અરાજકતા ટાળી શકાય. જે મુસાફરોની ફ્લાઇટ હજુ પણ પ્રભાવિત છે, તેઓ ઈન્ડિગોની વેબસાઈટ પર જઈને રિફંડ અથવા ફ્રી રિબુકિંગના વિકલ્પો પસંદ કરી શકે છે.
 
ઈન્ડિગોનું આજનું મુખ્ય ફ્લાઇટ લિસ્ટ:
•    જેદ્દાહ રૂટ: દિલ્હી, બેંગલુરુ, હૈદરાબાદ, મુંબઈ અને કોઝિકોડથી.
•    મસ્કત-અબુ ધાબી: કોચી, હૈદરાબાદ અને મુંબઈથી.
•    દુબઈ-શારજાહ: લખનૌ, મુંબઈ અને દિલ્હીથી.
•    અન્ય: મુંબઈથી ફુજૈરાહ અને રાસ અલ ખૈમાહ.