મુંબઈ: તા.૦૬ પશ્ચિમ એશિયામાં ચાલી રહેલા સંઘર્ષ અને મિસાઈલ હુમલાના જોખમો વચ્ચે હવાઈ મુસાફરો માટે આશાનું કિરણ દેખાયું છે. ભારતીય એરલાઇન્સ કંપનીઓ ઈન્ડિગો અને એર ઈન્ડિયાએ મધ્ય પૂર્વના દેશો માટે પોતાની કામગીરી તબક્કાવાર રીતે પુનઃસ્થાપિત કરવાની જાહેરાત કરી છે. સાઉદી અરેબિયા અને ઓમાન ઉપરનું એરસ્પેસ ઉડાન માટે સુરક્ષિત હોવાનું જણાતા એર ઈન્ડિયાએ જેદ્દાહ અને મસ્કતની સેવાઓ ફરી શરૂ કરી દીધી છે. જોકે, સાવચેતીના ભાગરૂપે પશ્ચિમ એશિયાના અન્ય સ્થળો માટેની નિયમિત ફ્લાઇટ્સ ૧૦ માર્ચ સુધી સ્થગિત રાખવામાં આવી છે.
ઈન્ડિગોએ પણ આક્રમક આયોજન સાથે ૬ માર્ચના રોજ મધ્ય પૂર્વના ૮ મહત્વના સ્થળો માટે ૧૭ ફ્લાઇટ્સ (૩૪ સેક્ટર્સ) દોડાવવાનું નક્કી કર્યું છે. એરલાઇને સ્પષ્ટતા કરી છે કે મુસાફરોની સલામતી સર્વોપરી છે અને તેઓ સતત સરકારી અધિકારીઓના સંપર્કમાં છે. જે મુસાફરો ફસાયેલા છે, તેમના માટે એર ઈન્ડિયા અને સ્પાઇસજેટ દ્વારા દુબઈ અને રાસ અલ ખૈમાહથી ખાસ એડ-હોક ફ્લાઇટ્સ ચલાવવામાં આવી રહી છે. ખાસ કરીને ૪ માર્ચ સુધી ટિકિટ બુક કરાવનારા મુસાફરોને કોઈપણ વધારાના ચાર્જ વગર રિબુકિંગ કરવાની સુવિધા પણ આપવામાં આવી છે.
વૈશ્વિક સ્તરે વાત કરીએ તો, એરસ્પેસ બંધ થવાને કારણે અત્યાર સુધીમાં અંદાજે ૨૫,૦૦૦ થી વધુ ફ્લાઇટ્સ રદ થઈ છે, જેનાથી યુરોપ અને એશિયા વચ્ચેનો હવાઈ વ્યવહાર ખરાબ રીતે ખોરવાયો છે. એમિરેટ્સ અને એતિહાદ જેવી મોટી કંપનીઓએ પણ મર્યાદિત સમયપત્રક સાથે કાર્યરત થવાની કોશિશ શરૂ કરી છે. દુબઈ એરપોર્ટ પર ટ્રાફિકમાં સામાન્ય સુધારો જોવા મળ્યો છે, પરંતુ તે હજુ પણ તેની મૂળ ક્ષમતાના માત્ર ૨૫% પર જ કામ કરી રહ્યું છે. મુસાફરોને સલાહ આપવામાં આવી છે કે તેઓ એરપોર્ટ પર ધસારો કરવાને બદલે એરલાઇન્સના સત્તાવાર સંદેશની રાહ જુએ.