મુંબઈ: તા.૦૬ ઈરાનના સર્વોચ્ચ નેતા અલી ખામેનીના અવસાન અને તે બાદ ઉભી થયેલી ભૌગોલિક રાજકીય સ્થિતિની અસર હવે મુંબઈના રસ્તાઓ પર જોવા મળી રહી છે. મુંબઈના મલાડ (પશ્ચિમ) ના માલવણી વિસ્તારમાં ગત રાત્રે સેંકડો લોકોએ રસ્તા પર ઉતરીને ઉગ્ર વિરોધ પ્રદર્શન કર્યું હતું. સોશિયલ મીડિયા પર વાયરલ થયેલા વિડીયોમાં પ્રદર્શનકારીઓ અલી ખામેનીના પોસ્ટરો અને પ્લેકાર્ડ્સ સાથે "અમેરિકા મુર્દાબાદ" અને "ઇઝરાયલ મુર્દાબાદ" ના આક્રમક નારા લગાવતા સ્પષ્ટ જોઈ શકાય છે.
આ અશાંતિ માત્ર મલાડ પૂરતી મર્યાદિત નથી. અગાઉ ગોવંડી વિસ્તારમાં પણ 'મુસ્લિમ યુવા મોરચા' દ્વારા વિશાળ સભાનું આયોજન કરવામાં આવ્યું હતું. જોકે પોલીસે સંવેદનશીલતાને ધ્યાનમાં રાખીને આંબેડકર ગ્રાઉન્ડ પર પરવાનગી ન આપતા, ૫૦૦ થી ૬૦૦ લોકોએ આંતરિક રસ્તાઓ પર ઉતરીને પોતાનો રોષ ઠાલવ્યો હતો. શિયા ધર્મગુરુઓએ આ ઘટનાને ઇસ્લામિક વિશ્વના નેતૃત્વ પરના હુમલા સમાન ગણાવી છે અને ખામેનીને 'શહીદ' તરીકે સંબોધ્યા છે.
ધાર્મિક નેતા સૈયદ સૈફ અબ્બાસ નકવી અને ઓલ ઈન્ડિયા શિયા પર્સનલ લો બોર્ડના જનરલ સેક્રેટરી મૌલાના યાસુબ અબ્બાસે પણ આ મામલે કડક પ્રતિક્રિયા આપી છે. તેમણે આરોપ લગાવ્યો છે કે પવિત્ર રમઝાન મહિનામાં થયેલા હુમલાઓમાં નિર્દોષ બાળકો અને નાગરિકોના મોત થયા છે, જે એક અક્ષમ્ય ગુનો છે. મુંબઈ પોલીસ હાલ સતર્ક છે અને સોશિયલ મીડિયા પરની ગતિવિધિઓ પર ચાંપતી નજર રાખી રહી છે જેથી શહેરમાં કાયદો અને વ્યવસ્થાની સ્થિતિ જળવાઈ રહે.