બેંગલુરુ: તા.૦૬ કર્ણાટકના મુખ્યમંત્રી સિદ્ધારમૈયાએ શુક્રવારે વિધાનસભામાં રાજ્યનું બજેટ રજૂ કરતા લઘુમતી સમુદાયો માટે કલ્યાણકારી યોજનાઓની હારમાળા સર્જી છે. શિક્ષણ અને આર્થિક સશક્તિકરણને કેન્દ્રમાં રાખીને મુખ્યમંત્રીએ લઘુમતી વિદ્યાર્થીઓ માટે તિજોરીના દ્વાર ખોલી દીધા છે. ખાસ કરીને ગ્રામીણ અને આર્થિક રીતે નબળા વર્ગના યુવાનોને મુખ્ય પ્રવાહમાં લાવવા માટે અનેક નવી શાળાઓ અને છાત્રાલયોની જાહેરાત કરવામાં આવી છે.

બજેટની સૌથી મોટી જાહેરાત મુજબ, હવે ૨૫ મોરારજી દેસાઈ રહેણાંક શાળાઓમાં સાયન્સ અને કોમર્સના પ્રવાહો શરૂ કરવામાં આવશે, જેથી ગરીબ વિદ્યાર્થીઓ ડોક્ટર કે એન્જિનિયર બનવાનું સપનું પૂરું કરી શકે. એટલું જ નહીં, લાયક વિદ્યાર્થીઓને K-CET, JEE અને NEET જેવી સ્પર્ધાત્મક પરીક્ષાઓ માટે મફત અને ગુણવત્તાયુક્ત કોચિંગ આપવા માટે ચાર ખાસ 'સેન્ટર ઓફ એક્સલન્સ' (શ્રેષ્ઠતા કેન્દ્રો) સ્થાપવામાં આવશે. ડિજિટલ શિક્ષણને વેગ આપવા માટે ૫,૦૦૦ મેધાવી વિદ્યાર્થીઓને લેપટોપ ખરીદવા માટે ₹૫૦,૦૦૦ની સહાય આપવામાં આવશે.

રોજગારના ક્ષેત્રે પણ સરકારે ઉદારતા બતાવી છે. લઘુમતી યુવાનો માટે 'ફાસ્ટ ફૂડ ટ્રક' કે 'મોબાઇલ કિચન' શરૂ કરવા માટે ₹૩ લાખ સુધીની સબસિડી આપવામાં આવશે. આ ઉપરાંત, બેંગલુરુમાં કામ કરતી મહિલાઓ માટે ચાર નવી હાઈ-ટેક હોસ્ટેલ બનાવવાની જાહેરાત કરાઈ છે. જૈન, બૌદ્ધ અને શીખ સમુદાયના વિકાસ માટે ₹૧૦૦ કરોડ ફાળવ્યા છે, જ્યારે બૌદ્ધ ધમ્મચારીઓને દર મહિને ₹૬,૦૦૦નું માનદ વેતન આપવાનો નિર્ણય લેવાયો છે. હુબલી અને કલબુર્ગીમાં નવા હજ ભવનનું નિર્માણ પણ આ બજેટનો હિસ્સો છે.

જોકે, આ જાહેરાતો બાદ રાજ્યમાં રાજકીય ગરમાવો વધી ગયો છે. ભારતીય જનતા પાર્ટીએ આ બજેટને "વોટ બેંકની રાજનીતિ" ગણાવ્યું છે. ભાજપના નેતાઓએ આક્ષેપ કર્યો છે કે સિદ્ધારમૈયા સરકાર તુષ્ટિકરણ કરી રહી છે અને રાજ્યની તિજોરીનો મોટો હિસ્સો માત્ર ચોક્કસ વર્ગ પાછળ ખર્ચી રહી છે. હવે જોવાનું એ રહેશે કે આ યોજનાઓથી જમીની સ્તર પર કેટલો બદલાવ આવે છે.