નવી દિલ્હી: પશ્ચિમ એશિયા અત્યારે વિનાશના આરે ઉભું છે. અમેરિકા અને ઇઝરાયલ વિરુદ્ધ ઈરાન વચ્ચે છેડાયેલા આ મહાયુદ્ધ અંગે ભારતીય ગુપ્તચર સંસ્થા ‘રો’ (RAW) ના પૂર્વ ચીફ વિક્રમ સૂદે એક અત્યંત મહત્વનું નિવેદન આપ્યું છે. સૂદના મતે, અમેરિકાએ આશા રાખી હતી કે તે ‘ટૂંકા અને તીક્ષ્ણ’ પ્રહાર કરીને બહાર નીકળી જશે, પરંતુ ઈરાન એક અલગ જ સ્તરની રમત રમી રહ્યું છે. તેમણે ચેતવણી આપી છે કે ઈરાની સૈનિકો અને નાગરિકો પોતાના દેશ માટે ‘મરવા તૈયાર છે’, જ્યારે અમેરિકન સેનામાં આવી તૈયારીનો અભાવ હોવાથી આ યુદ્ધ અપેક્ષા કરતાં ઘણું લાંબું ખેંચાઈ શકે છે.

ઈરાન અત્યારે ચોતરફથી હુમલાઓનો સામનો કરી રહ્યું છે. ઈરાનના નાયબ વિદેશ મંત્રી સઈદ ખાતીબઝાદેહે ‘ANI’ ને આપેલા ઇન્ટરવ્યુમાં જણાવ્યું હતું કે તેહરાન અને અન્ય શહેરો પર અત્યારે અમેરિકા અને ઇઝરાયલ દ્વારા ભીષણ ‘કાર્પેટ બોમ્બિંગ’ કરવામાં આવી રહ્યું છે. તેમણે આ સંઘર્ષને ‘વીર રાષ્ટ્રવાદી સંરક્ષણ’ ગણાવતા શપથ લીધા છે કે તેમનું રાષ્ટ્ર ‘છેલ્લી ગોળી’ અને ‘છેલ્લા સૈનિક’ સુધી આ અત્યાચાર સામે આત્મસમર્પણ નહીં કરે. ઈરાન આ લડાઈને માત્ર પોતાની અસ્મિતા જ નહીં, પણ આંતરરાષ્ટ્રીય કાયદાના રક્ષણની લડાઈ ગણાવી રહ્યું છે.

૨૮ ફેબ્રુઆરીની એ કાળી રાત: કેવી રીતે શરૂ થયું યુદ્ધ?

આ ભયાનક સંઘર્ષની શરૂઆત ૨૮ ફેબ્રુઆરી ૨૦૨૬ ના રોજ થઈ હતી, જ્યારે અમેરિકા અને ઇઝરાયલે એક સંયુક્ત ઓપરેશનમાં ઈરાની ધરતી પર હુમલો કરી તેના સુપ્રીમ લીડર આયાતુલ્લાહ અલી ખામેની સહિત અનેક વરિષ્ઠ નેતાઓને મોતને ઘાટ ઉતાર્યા હતા. આ હુમલાએ ઈરાનને સ્તબ્ધ કરી દીધું અને તેહરાને તાત્કાલિક વળતો પ્રહાર શરૂ કર્યો. આજે યુદ્ધના સાતમા દિવસે, ઈરાને સમગ્ર આરબ પ્રદેશમાં ફેલાયેલા અમેરિકન લશ્કરી થાણાઓ અને ઇઝરાયલી મિલકતો પર સેંકડો ડ્રોન અને મિસાઈલ હુમલા કરીને આખા પ્રદેશને યુદ્ધની જ્વાળામાં હોમી દીધો છે.

વૈશ્વિક નિષ્ણાતો માને છે કે જો આ સંઘર્ષ જલ્દી નહીં અટકે, તો તેની અસર વિશ્વના તેલ પુરવઠા અને અર્થતંત્ર પર પણ વિનાશક રીતે પડશે. વિક્રમ સૂદનું વિશ્લેષણ એ વાત તરફ ઈશારો કરે છે કે ઈરાન અમેરિકાના સાથી દેશોને નિશાન બનાવીને ત્યાં આંતરિક અશાંતિ પેદા કરવાની રણનીતિ અપનાવી રહ્યું છે, જે યુએસ પ્રશાસન માટે મોટી માથાભારે સાબિત થઈ શકે છે.