કોલકાતા:  પશ્ચિમ બંગાળમાં આગામી રાજકીય પરિવર્તનના નારા સાથે ભારતીય જનતા પાર્ટીએ આજે રાજ્યવ્યાપી 'પોરીબોરતન યાત્રા' (પરિવર્તન યાત્રા) રેલીઓનો પ્રચંડ પ્રારંભ કર્યો છે. રાજ્યના ખૂણેખૂણે પરિવર્તનનો સંદેશ પહોંચાડવા માટે કેન્દ્રીય મંત્રીઓ, સાંસદો અને ધારાસભ્યોની મોટી ફોજ મેદાનમાં ઉતરી છે. પશ્ચિમ મેદિનીપુરના નારાયણગઢ ખાતે કેન્દ્રીય મંત્રી ગિરિરાજ સિંહે વિરોધ પક્ષના નેતા સુવેન્દુ અધિકારીની હાજરીમાં આ યાત્રાને લીલી ઝંડી આપી હતી, જ્યારે અલીપુરદુઆરમાં કેન્દ્રીય રાજ્ય મંત્રી ડૉ. સુકાંત મજુમદારે મોરચો સંભાળ્યો હતો.

જોકે, આ રાજકીય ગરમાવા વચ્ચે હિંસાના અહેવાલોએ ચિંતા જગાવી છે. પુરુલિયા જિલ્લાના બલરામપુરમાં ભાજપના ધારાસભ્ય બાણેશ્વર મહતો જ્યારે યાત્રામાં સહભાગી થયા હતા, ત્યારે તેમના પર અચાનક હુમલો કરવામાં આવ્યો હતો. આ અથડામણમાં ભાજપના ૬ કાર્યકરો ગંભીર રીતે ઘાયલ થયા હોવાનું જાણવા મળ્યું છે. ભાજપે આ હુમલા પાછળ સત્તાધારી પક્ષનો હાથ હોવાનો આરોપ લગાવ્યો છે, જેના કારણે રાજ્યમાં કાયદો અને વ્યવસ્થાની સ્થિતિ વધુ તણાવપૂર્ણ બની છે.

બીજી તરફ, તૃણમૂલ કોંગ્રેસના સુપ્રીમો અને મુખ્યમંત્રી મમતા બેનર્જીએ પણ ભાજપને વળતો જવાબ આપવા માટે મેદાનમાં ઉતર્યા છે. સ્પેશિયલ ઇન્ટેન્સિવ રિવિઝન (SIR) ના વિરોધમાં મમતા બેનર્જીએ કોલકાતાના એસ્પ્લેનેડ વિસ્તારમાં ધરણા પ્રદર્શન શરૂ કર્યું છે. એક બાજુ ભાજપની રથયાત્રાઓ અને બીજી બાજુ મમતા બેનર્જીના ધરણા — આ જોતા લાગે છે કે બંગાળનું રાજકારણ અત્યારે પરાકાષ્ઠાએ પહોંચ્યું છે. આગામી દિવસોમાં આ સંઘર્ષ વધુ ઉગ્ર બને તેવી પૂરેપૂરી શક્યતા છે.