પટણા: બિહારના રાજકારણમાં છેલ્લા બે દાયકાથી જેની કલ્પના પણ નહોતી કરી શકી, તેવો વળાંક અત્યારે જોવા મળી રહ્યો છે. બિહારના શક્તિશાળી મુખ્યમંત્રી નીતિશ કુમારે અચાનક પદ છોડીને રાજ્યસભામાં જવાનો નિર્ણય લેતા આખું રાજ્ય સ્તબ્ધ છે. પટણાના બીરચંદ પટેલ માર્ગ પર આવેલા જેડીયુ કાર્યાલય ખાતે કાર્યકરોએ વિરોધ પ્રદર્શન શરૂ કર્યું છે અને પોસ્ટરો લગાવીને નીતિશ કુમારને પોતાનો નિર્ણય પાછો ખેંચવા વિનંતી કરી રહ્યા છે. પરંતુ સવાલ એ છે કે, જે નેતાએ આખી જિંદગી ‘પરિવારવાદ’ નો વિરોધ કર્યો, તેમણે અચાનક કેમ આ માર્ગ પસંદ કર્યો?

સૂત્રોના જણાવ્યા અનુસાર, છેલ્લા એક વર્ષથી નીતિશ કુમાર પર તેમના પુત્ર નિશાંત કુમારને રાજકારણમાં લાવવા માટે ભારે દબાણ હતું. શરૂઆતમાં નીતિશ આ વાતના વિરોધમાં હતા અને લાલુ પ્રસાદ યાદવના વંશવાદના ઉદાહરણો આપીને પ્રસ્તાવ ફગાવી દેતા હતા. પરંતુ જાન્યુઆરી ૨૦૨૬ થી સમીકરણો બદલાયા. ૧ માર્ચે નીતિશના ૭૫મા જન્મદિવસે જ્યારે નિશાંતે પિતાને કેક ખવડાવી, ત્યારે જેડીયુના વરિષ્ઠ નેતાઓએ નિશાંતને બિહારના રાજકારણમાં સક્રિય કરવાની માંગણી પ્રબળ બનાવી હતી.

પુત્ર માટે શરત અને હોળીનો ‘રંગ’

એન્જિનિયરિંગ ગ્રેજ્યુએટ નિશાંત કુમારે ઈચ્છા વ્યક્ત કરી હતી કે જો તેઓ રાજકારણમાં જોડાશે તો દિલ્હીથી નહીં પણ બિહારથી જ શરૂઆત કરશે. આ સાંભળીને નીતિશ કુમારે એક આકરી શરત મૂકી કે જો નિશાંત બિહાર સંભાળશે, તો તેઓ પોતે દિલ્હી (કેન્દ્ર) માં જશે. ૪ માર્ચે જ્યારે દેશ હોળીના રંગોમાં ડૂબેલો હતો, ત્યારે જ નીતિશ કુમારે પોતાનો ‘રાજકીય રંગ’ બદલવાની તૈયારી કરી લીધી હતી. તેમણે ભાજપના મોવડીમંડળ સાથે ચર્ચા કરીને રાજ્યસભામાં જવાનો નિર્ણય ફાઈનલ કરી દીધો છે.

નીતિશ કુમારના આ નિર્ણયથી તેમના નજીકના સાથીઓ પણ ચોંકી ગયા છે. સમર્થકો રસ્તા પર ઉતરી આવ્યા છે, પરંતુ નીતિશ અડગ છે. તેમણે સ્પષ્ટ કહી દીધું છે કે, "મેં ભાજપને શબ્દ આપ્યો છે." આમ, બિહારના રાજકારણમાં એક યુગનો અંત આવી રહ્યો છે અને નિશાંત કુમારના રૂપમાં એક નવા યુગની શરૂઆત થઈ રહી છે. હવે જોવાનું એ રહેશે કે નીતિશ કુમારના ગયા પછી બિહારની ગાદી કોણ સંભાળશે અને નિશાંત કુમાર પિતાના વારસાને કેવી રીતે આગળ ધપાવશે.