નવી દિલ્હી: મધ્ય પૂર્વ (મિડલ ઈસ્ટ) માં સર્જાયેલી પ્રાદેશિક અસ્થિરતા અને તણાવપૂર્ણ સ્થિતિને કારણે હજારો ભારતીય મુસાફરો ગલ્ફ દેશોમાં ફસાયા છે. આ કટોકટીના સમયે ભારતીય એરલાઇન્સે માનવતાવાદી અભિગમ અપનાવીને 7 માર્ચના રોજ વધારાની અને ખાસ 'રેસ્ક્યુ' ફ્લાઇટ્સ ચલાવવાની જાહેરાત કરી છે. ઇન્ડિગો, એર ઇન્ડિયા, એર ઇન્ડિયા એક્સપ્રેસ અને સ્પાઇસજેટ જેવી કંપનીઓ મુસાફરોને સુરક્ષિત રીતે ભારત પરત લાવવા માટે દિવસ-રાત કામ કરી રહી છે.
ઇન્ડિગોનું 'મિશન રી-યુનિયન'
ઇન્ડિગોએ ખાસ કરીને પાંચ મુખ્ય ગલ્ફ સ્થળો માટે તેની સેવાઓ તેજ કરી છે. એરલાઇને એક ભાવુક એડવાઇઝરીમાં જણાવ્યું હતું કે, "ઘણા મુસાફરો હજુ પણ તેમના પરિવારથી દૂર છે અને અમે તેમને ફરીથી મેળવવા માટે કટિબદ્ધ છીએ." જોકે, આ તમામ ફ્લાઇટ્સ સુરક્ષા સ્થિતિ અને નિયમનકારી મંજૂરીઓને આધિન રહેશે, કારણ કે ક્રૂ અને મુસાફરોની સુરક્ષા સૌથી ઉપર છે.
એર ઇન્ડિયા અને એક્સપ્રેસની સજ્જતા
એર ઇન્ડિયાએ જેદ્દાહ અને મસ્કતને સુરક્ષિત ગણાવી ત્યાંથી નિયમિત ઉડાન ચાલુ રાખી છે. આ ઉપરાંત, અબુ ધાબી, દુબઈ, રાસ અલ ખૈમાહ અને શારજાહથી ફસાયેલા લોકોને લાવવા માટે 'નોન-શિડ્યુલ' વધારાની ફ્લાઇટ્સનું આયોજન કરવામાં આવ્યું છે. એર ઇન્ડિયા એક્સપ્રેસે પણ મસ્કત અને ભારત વચ્ચેની તમામ કામગીરી ફરી શરૂ કરી દીધી છે, જે મુસાફરો માટે મોટી રાહત સમાન છે.
હવામાનનો પડકાર અને સ્પાઇસજેટની સેવા
બીજી તરફ, સ્પાઇસજેટ ફુજૈરાહ (દુબઈ) થી ખાસ ફ્લાઇટ્સ ચલાવી રહી છે. જોકે, એરલાઇને મુસાફરોને ચેતવણી આપી છે કે ફુજૈરાહમાં ખરાબ હવામાનને કારણે ફ્લાઇટ્સ મોડી પડી શકે છે. મુસાફરોને એરપોર્ટ પર નીકળતા પહેલા વેબસાઇટ પર સ્ટેટસ ચેક કરી લેવા વિનંતી કરવામાં આવી છે.
આ ખાસ ફ્લાઇટ્સનો મુખ્ય હેતુ એરસ્પેસ પ્રતિબંધોને કારણે સર્જાયેલા મુસાફરોના બેકલોગને ઘટાડવાનો છે. ભારતીય એરલાઇન્સ મધ્ય પૂર્વની પળેપળની સ્થિતિ પર નજર રાખી રહી છે અને જરૂર પડે તેમ ફ્લાઇટ શેડ્યૂલમાં ફેરફાર કરી રહી છે.