મુંબઈ: આગામી સોમવારે જ્યારે શેરબજાર ખુલશે, ત્યારે યસ બેંક (YES Bank) ના શેર રોકાણકારો માટે ચર્ચાનું કેન્દ્ર બનશે. શુક્રવારે બજાર બંધ થયા પછી બેંક દ્વારા કરવામાં આવેલી એક મોટી જાહેરાત સોમવારે સ્ટોક પ્રાઇસ પર સીધી અસર કરી શકે છે. બેંકે સત્તાવાર રીતે જણાવ્યું છે કે રિઝર્વ બેંક ઓફ ઈન્ડિયા (RBI) એ વિનય મુરલીધર ટોંસેને નવા મેનેજિંગ ડિરેક્ટર અને CEO તરીકે નિયુક્ત કરવાની મંજૂરી આપી દીધી છે.
SBI ના અનુભવી ખેલાડી હવે યસ બેંકના મેદાનમાં
વિનય મુરલીધર ટોંસે બેંકિંગ ક્ષેત્રનું જાણીતું નામ છે. તેમણે 1988 માં સ્ટેટ બેંક ઓફ ઈન્ડિયા (SBI) માં પ્રોબેશનરી ઓફિસર તરીકે કારકિર્દી શરૂ કરી હતી અને નવેમ્બર 2025 સુધી SBI ના રિટેલ બિઝનેસના મેનેજિંગ ડિરેક્ટર તરીકે સેવા આપી હતી. હવે તેઓ પ્રશાંત કુમારનું સ્થાન લેશે. ટોંસે 12 માર્ચથી કાર્યભાર સંભાળશે અને 6 એપ્રિલ, 2026 થી પૂર્ણ-સમયના MD અને CEO તરીકેની જવાબદારી સંભાળશે. બજારના નિષ્ણાતો માની રહ્યા છે કે તેમના બહોળા અનુભવનો લાભ યસ બેંકના ગ્રોથને નવી ઊંચાઈએ લઈ જશે.
શેરની ચાલ અને કમાણીનો આંકડો
ગયા શુક્રવારે યસ બેંકનો શેર ₹20.13 પર બંધ થયો હતો. જોકે છેલ્લા કેટલાક દિવસોથી શેરમાં થોડો ઘટાડો જોવા મળ્યો છે, પરંતુ છેલ્લા એક વર્ષમાં રોકાણકારોને 18% વળતર મળ્યું છે. બેંકના નાણાકીય પરિણામો પણ પ્રોત્સાહક રહ્યા છે; ત્રીજા ક્વાર્ટરમાં બેંકનો નફો 55% વધીને ₹952 કરોડ થયો છે. લોન વિતરણમાં 5.2% નો વધારો અને વ્યાજની આવકમાં થયેલો સુધારો દર્શાવે છે કે બેંક ધીમે ધીમે મજબૂત થઈ રહી છે.
રોકાણકારો માટે શું છે સંકેત?
બેંકિંગ ક્ષેત્રમાં જ્યારે પણ કોઈ મજબૂત નેતૃત્વની નિમણૂક થાય છે, ત્યારે બજાર તેને સકારાત્મક રીતે લેતું હોય છે. સોમવારે જ્યારે ટ્રેડિંગ શરૂ થશે ત્યારે ₹21 ના સ્તરને વટાવવા માટે આ 'લીડરશિપ કાર્ડ' ગેમ ચેન્જર સાબિત થઈ શકે છે. જોકે, ગ્રેચ્યુટી માટે કરાયેલી ₹155 કરોડની જોગવાઈ અને બજારના સેન્ટિમેન્ટ પણ જોવાની જરૂર રહેશે. ટૂંકા ગાળાના રોકાણકારો માટે યસ બેંકનો શેર હવે હાઈ-એલર્ટ ઝોનમાં છે.