તિરુવનંતપુરમ:  કેરળ વિધાનસભાની આગામી ચૂંટણીઓ પહેલા કોંગ્રેસ પક્ષની અંદર એક મોટો રાજકીય ભૂકંપ આવવાના સંકેતો મળી રહ્યા છે. પક્ષના આંતરિક સર્વે અને સંગઠનાત્મક સમીકરણો બાદ હવે ચર્ચા છે કે હાઈકમાન્ડના સૌથી વિશ્વસનીય નેતા અને AICC મહાસચિવ કે.સી. વેણુગોપાલને કેરળના રાજકારણમાં સક્રિય કરવામાં આવશે. આ હિલચાલને લોકપ્રિય નેતા શશી થરૂરની વધતી મહત્વકાંક્ષાઓને સંતુલિત કરવાના કોંગ્રેસના 'પ્લાન-બી' તરીકે જોવામાં આવી રહી છે.
  સૂત્રોના જણાવ્યા અનુસાર, કે.સી. વેણુગોપાલને તેમની જૂની અને પ્રભાવશાળી બેઠક અલાપ્પુઝાથી વિધાનસભાની ચૂંટણી લડાવવાની યોજના ઘડાઈ રહી છે. છેલ્લા કેટલાક સમયથી વેણુગોપાલ આ વિસ્તારમાં અત્યંત સક્રિય થયા છે અને સ્થાનિક સ્તરે જનસંપર્ક વધારી રહ્યા છે. જો યુનાઇટેડ ડેમોક્રેટિક ફ્રન્ટ (UDF) સત્તા પર આવે છે, તો વેણુગોપાલ મુખ્યમંત્રી પદ માટે પક્ષની પ્રથમ પસંદગી બની શકે છે.
 શશી થરૂરની આંતરરાષ્ટ્રીય સ્તરે લોકપ્રિયતા અને કેરળના યુવાનોમાં તેમનો ક્રેઝ પક્ષના સ્થાપિત નેતા માટે ચિંતાનો વિષય રહ્યો છે. થરૂર પોતે કેરળના મુખ્યમંત્રી બનવાની ઈચ્છા આડકતરી રીતે વ્યક્ત કરી ચૂક્યા છે. આવી સ્થિતિમાં, સંગઠન પર મજબૂત પકડ ધરાવતા વેણુગોપાલને મેદાનમાં ઉતારીને હાઈકમાન્ડ સત્તાનું સંતુલન પોતાના હાથમાં રાખવા માંગે છે.
 સામાન્ય રીતે કોંગ્રેસ વર્તમાન સાંસદોને વિધાનસભાની ચૂંટણીમાં ઉતારવાનું ટાળે છે, પરંતુ કેરળમાં સત્તામાં વાપસી માટે પક્ષ આ વખતે 'અપવાદ' કરી શકે છે. હાઈકમાન્ડના વિશ્વાસુ હોવાને કારણે વેણુગોપાલ માટે દિલ્હીથી લીલી ઝંડી મળવી લગભગ નિશ્ચિત માનવામાં આવે છે. પક્ષના કાર્યકરોમાં પણ એવી ચર્ચા છે કે જો વેણુગોપાલ જેવો કદાવર નેતા રાજ્યમાં પરત ફરે તો જૂથબંધીમાં વહેંચાયેલી કેરળ કોંગ્રેસ એક થઈ શકે છે. આગામી દિવસોમાં કોંગ્રેસ આ 'ગુપ્ત યોજના' ને સત્તાવાર જાહેર કરે છે કે કેમ, તેના પર માત્ર કેરળ જ નહીં પરંતુ સમગ્ર દેશના રાજકીય વિશ્લેષકોની નજર ટકેલી છે.