ન્યૂ યોર્ક: અમેરિકાના ન્યૂ યોર્ક શહેરમાં સ્થિત મેયર ઝોહરાન મમદાનીના સત્તાવાર નિવાસસ્થાન 'ગ્રેસી મેન્શન' ખાતે એક અત્યંત ચોંકાવનારી ઘટના સામે આવી છે. રમઝાનના પવિત્ર મહિના દરમિયાન ઇસ્લામ વિરોધી પ્રદર્શનકારીઓ દ્વારા કરવામાં આવેલા વિરોધ પ્રદર્શન દરમિયાન સ્થિતિ બેકાબૂ બની હતી. જમણેરી પ્રભાવક જેક લેંગના નેતૃત્વમાં થયેલા આ ઇસ્લામ વિરોધી પ્રદર્શનમાં અચાનક હિંસા ભભૂકી ઉઠી હતી. સ્થિતિ એટલી વણસી ગઈ કે કેટલાક પ્રદર્શનકારીઓએ કાળા ટેપમાં લપેટાયેલી, નટ-બોલ્ટ અને ફ્યુઝ ધરાવતી બોમ્બ જેવી શંકાસ્પદ વસ્તુઓ ફેંકી હતી, જેનાથી સમગ્ર વિસ્તારમાં ભયનું વાતાવરણ છવાઈ ગયું હતું.

ઘટનાસ્થળે હાજર ન્યૂ યોર્ક પોલીસ (NYPD) ના જણાવ્યા મુજબ, વિરોધ દરમિયાન એક 18 વર્ષીય યુવાને સળગતું વિસ્ફોટક ઉપકરણ ભીડ તરફ ફેંક્યું હતું, જે બાદમાં પોલીસ બેરિકેડ પાસે જઈને બુઝાયું હતું. આ આખી ઘટનાનો વીડિયો સોશિયલ મીડિયા પર વાયરલ થયો છે, જેમાં સ્પષ્ટ દેખાય છે કે કઈ રીતે એક શંકાસ્પદ બીજા સાથીને નવું વિસ્ફોટક ઉપકરણ આપે છે. ઘટનાના પગલે પોલીસે તાત્કાલિક કાર્યવાહી કરતા કુલ છ લોકોની અટકાયત કરી છે, જેમાંથી બે મુખ્ય શંકાસ્પદોની બોમ્બ હુમલાના પ્રયાસ બદલ ધરપકડ કરવામાં આવી છે. મેયર ઝોહરાન મમદાની અને તેમના પત્ની રામા દુવાજી સુરક્ષિત છે, પરંતુ પ્રવક્તાએ આ હુમલાને 'ઇસ્લામોફોબિક' ગણાવીને સખત શબ્દોમાં વખોડી કાઢ્યો છે.

આ સમગ્ર મામલાને પગલે NYPD કમિશનર જેસિકા એસ. ટિશે જણાવ્યું હતું કે તપાસકર્તાઓ અત્યારે એ વાતની પુષ્ટિ કરી રહ્યા છે કે આ વિસ્ફોટક ઉપકરણમાં વાસ્તવિક 'ઊર્જાવાન સામગ્રી' હતી કે તે માત્ર ડર ફેલાવવા માટે બનાવેલું નકલી સાધન હતું. પોલીસે આ ઘટનાને કોઈ આંતરરાષ્ટ્રીય કાવતરા સાથે જોડવાને બદલે એક 'ઘરેલુ વિવાદ' ગણાવ્યો છે. ગવર્નર કેથી હોચુલે પણ આ ઘટના પર તીખી પ્રતિક્રિયા આપતા કહ્યું કે શાંતિપૂર્ણ વિરોધ લોકશાહીનો અધિકાર છે, પરંતુ નફરત કે હિંસા માટે અમેરિકામાં કોઈ સ્થાન નથી. ન્યૂ યોર્ક પોલીસે ગ્રેસી મેન્શનની સુરક્ષામાં ધરખમ વધારો કરી દીધો છે.