અબુ ધાબી: મધ્ય પૂર્વમાં યુદ્ધના વાદળો વધુ ઘેરા બન્યા છે ત્યારે સંયુક્ત આરબ અમીરાત (UAE) એ વૈશ્વિક મંચ પરથી ઈરાનને અત્યંત કડક શબ્દોમાં ચેતવણી આપી છે. UAE ના વિદેશ મંત્રાલયે સત્તાવાર રીતે પુષ્ટિ કરી છે કે તેઓ ઈરાન દ્વારા કરવામાં આવેલા અવિચારી અને ક્રૂર હુમલાઓના જવાબમાં 'સ્વ-બચાવ' (Self-Defense) હેઠળ કાર્યવાહી કરી રહ્યા છે. અત્યાર સુધીમાં 1,400 થી વધુ બેલિસ્ટિક મિસાઈલો અને ડ્રોન દ્વારા UAE ના નાગરિક વિસ્તારો અને માળખાગત સુવિધાઓને નિશાન બનાવવામાં આવતા આ નિર્ણય લેવાયો છે.
આંતરરાષ્ટ્રીય કાયદાનો સરેઆમ ભંગ
વિદેશ મંત્રાલય દ્વારા જારી કરાયેલા નિવેદનમાં જણાવાયું છે કે ઈરાનના આ ઉશ્કેરણી વગરના હુમલામાં અનેક નિર્દોષ નાગરિકોના મોત થયા છે અને અનેક લોકો ઘાયલ થયા છે. આ કૃત્ય માત્ર અમાનવીય નથી, પરંતુ આંતરરાષ્ટ્રીય કાયદા અને સંયુક્ત રાષ્ટ્ર (UN) ના ચાર્ટરનું ગંભીર ઉલ્લંઘન છે. UAE એ સ્પષ્ટપણે જણાવ્યું છે કે આ હુમલાઓ તેમની પ્રાદેશિક અખંડિતતા અને સાર્વભૌમત્વ પર સીધો પ્રહાર છે, જેને કોઈ પણ સંજોગોમાં ચલાવી લેવામાં આવશે નહીં.
શાંતિની ઈચ્છા, પણ ઝૂકવાની મનાઈ
UAE એ દુનિયા સમક્ષ પોતાનો ઈરાદો સ્પષ્ટ કરતા કહ્યું છે કે, તેમનો દેશ કોઈ પણ પ્રકારના સંઘર્ષ કે પ્રાદેશિક અસ્થિરતામાં ફસાવવા માંગતો નથી. UAE હરહંમેશ શાંતિ અને સંયમનો પક્ષધર રહ્યો છે. પરંતુ, જ્યારે વાત પોતાના નાગરિકો, રહેવાસીઓ અને રાષ્ટ્રીય સુરક્ષા પર આવે છે, ત્યારે તે યુએન ચાર્ટર હેઠળ મળેલા સ્વ-બચાવના અધિકારનો ઉપયોગ કરવા માટે સંપૂર્ણપણે સક્ષમ અને પ્રતિબદ્ધ છે.
સુરક્ષા માટે કડક પગલાંના સંકેત
મંત્રાલયે ભારપૂર્વક જણાવ્યું છે કે દેશની સુરક્ષા અને સ્થિરતા જાળવવા માટે જે પણ જરૂરી હશે તે તમામ પગલાં લેવાનો અધિકાર UAE અનામત રાખે છે. હાલમાં સમગ્ર દેશમાં હાઈ-એલર્ટ જાહેર કરવામાં આવ્યું છે અને એર ડિફેન્સ સિસ્ટમને વધુ મજબૂત બનાવવામાં આવી છે. ગલ્ફ દેશોના આ બદલાતા મિજાજને કારણે હવે ઈરાન પર આંતરરાષ્ટ્રીય દબાણ વધે તેવી પૂરેપૂરી શક્યતા છે.