કેનેડિયન્સ ગ્રોસરી ખરીદવા પણ ક્રેડિટ કાર્ડ સ્વાઈપ કરાવવા લાગ્યા !
કેનેડામાં મોંઘવારી એ હદે વધી ગઈ છે કે લોકો ત્રાહિમામ પોકારી ગયા : ગ્રોસરીની કિમત ના પોસાતા લોકોએ તેની ખરીદીનું પ્રમાણ ઘટાડ્યું, પેટ ભરવા માટે અન્ય બિલ્સની ચૂકવણીમાં પણ મોડું કરી રહી છે પબ્લિક
ટોરેન્ટો તા.૯: એક સમયે જેની ગણના ગુજરાતીઓ માટે સપનાનાં દેશ તરીકે થતી હતી તેવા કેનેડામાં મોંઘવારી એ હદે વધી ગઈ છે કે લોકો તેનાથી ત્રાહિમામ પોકારી ગયા છે. હાલ એવી સ્થિતિ છે કે પબ્લિકને ગ્રોસરી પણ ક્રેડિટ કાર્ડ પર ખરીદવી પડી રહી છે. મોંઘવારી જે પ્રમાણમાં વધી રહી છે તે અનુસાર લોકોની આવક ના વધતી હોવાથી હવે તો ઘણા કેનેડિયન્સ જમવામાં પણ કાપ મૂકી રહ્યા છે. એક સરવે અનુસાર લગભગ ૫૩ ટકા કેનેડિયન્સ ક્રેડિટ કાર્ડ અને બાય નાઉ-પે લેટર જેવી સર્વિસ દ્વારા ગ્રોસરી ખરીદે છે અને છેલ્લા છ મહિનામાં તો આ સ્થિતિ ખૂબ જ ગંભીર બની ગઈ છે.
ઈન્સોલવન્સી અને ડેટ રિલીફ ફર્મ સ્પર્જેલ દ્વારા આ સરવે કરવામાં આવ્યો હતો જેમાં ભાગ લેનારા ૪૦ ટકા લોકોએ એવું પણ જણાવ્યું હતું કે ફુડ અફોર્ડ કરી શકાય તે માટે પોતે અન્ય બિલ્સ પે કરવામાં મોડું કરી રહ્યા છે. સ્પર્જેલ સાથે સંકળાયેલા રોબ કિલનરે આ બાબતે ટોરન્ટો સ્ટાર સાથે વાત કરતા જણાવ્યું હતું કે ૨૦ વર્ષની કરિયરમાં પોતે ફુડ માટે લોકોને આ હદે સ્ટ્રગલ કરતાં ના તો ક્યારેય જોયા છે કે ના તો તેમને આવી પણ સ્થિતિ ઉભી થઈ શકે તેનો ક્યારેય વિચાર સુદ્ધા આવ્યો હતો. જો સર્વાઈવલ માટે પણ ક્રેડિટ કાર્ડના આશરે રહેવું પડે તો તેનો સીધો મતલબ છે કે દેશના માળખામાં કોઈ ખામી છે.
મોંઘવારી વધતા કેનેડિયન્સની ફુડ ખરીદવાની પેટર્ન પણ બદલાઈ છે, આ સરવેમાં ભાગ લેનારા અડધોઅડધ લોકોએ જણાવ્યું હતું કે હવે તેઓ ઓછું મીટ અથવા પ્રોટિન ખરીદી રહ્યા છે જ્યારે ૪૪.૨ ટકા લોકોએ ફ્રુટ્સ અને શાકભાજી ખરીદવાનું ઓછું કરી દીધું હોવાનું સ્વીકાર્યું હતું. આ બાબત એ પણ દર્શાવે છે કે કેનેડિયન્સ માટે હેલ્ધી ફુડ ખરીદવું ખૂબ જ એક્સપેન્સિવ બની રહ્યું છે. સરવે કરાવનારા રોબ કિલનરે આ બાબતે એવો મત વ્યક્ત કર્યો હતો કે જ્યારે લોકો બેસિક લિવિગ અફોર્ડ નથી કરી શકતા ત્યારે તેમની હેલ્થ પર પણ તેની સીધી અસર થાય છે, અને જો હેલ્થ ખરાબ થાય તો વધારે મોટો પ્રોબ્લેમ ઉભો થાય છે.
કેનેડાની સરકારે ૨૦૨૬માં જ ગ્રોસરી રિબેટ સ્કીમ લોન્ચ કરી હતી પરંતુ તેનાથી મોંઘવારીમાં જરાય ઘટાડો નથી થયો. કેનેડિયન ફુડ ઈકોનોમિસ્ટ અને ડેલહાઉઝી યુનિવર્સિટીના પ્રોફેસર સિલ્વેન કાર્લેબોઈસ આ અંગે એવું જણાવે છે કે માર્કેટ જે રીતે સ્ટ્રક્ચર્ડ છે તેના કારણે ગ્રોસરી મોંઘી થઈ રહી છે, ગ્રોસરી વેચતા લોકો ખોટી રીતે તેની કિમત વધારી રહ્યા છે તેવા આક્ષેપને પણ તેમણે ખોટા ગણાવ્યા હતા, તેની પાછળ તેમણે એવો તર્ક આપ્યો હતો કે ગ્રોસરી ભલે મોંઘી થઈ રહી હોય પરંતુ તેનાથી ગ્રોસર્સનું માર્જિન નથી વધ્યું.
(10:19 AM IST)
છેલ્લા 8 દિવસમાં સૌથી લોકપ્રિય 
