*ઇરાન સાથેના યુદ્ધનો અંત લાવવાનો નિર્ણય નેતન્યાહુ સાથે મળીને "પરસ્પર" લેવાશે: ડોનાલ્ડ ટ્રમ્પ

ન્યૂયોર્ક: અમેરિકી રાષ્ટ્રપતિ ડોનાલ્ડ ટ્રમ્પે રવિવારે 'ધ ટાઇમ્સ ઓફ ઇઝરાયેલ' સાથેની ટેલિફોનિક વાતચીતમાં સ્પષ્ટ કર્યું છે કે ઇરાન સાથે ચાલી રહેલા યુદ્ધનો અંત ક્યારે લાવવો તેનો નિર્ણય ઇઝરાયેલના વડાપ્રધાન બેન્જામિન નેતન્યાહુ સાથે પરસ્પર ચર્ચા કરીને લેવામાં આવશે. 

ટ્રમ્પે જણાવ્યું કે, "મને લાગે છે કે આ નિર્ણય થોડો પરસ્પર રહેશે. અમે સતત વાતચીત કરી રહ્યા છીએ અને યોગ્ય સમયે હું નિર્ણય લઈશ." નોંધનીય છે કે ૨૮ ફેબ્રુઆરી ૨૦૨૬ના રોજ અમેરિકા અને ઇઝરાયેલે સંયુક્ત લશ્કરી કાર્યવાહી શરૂ કરી હતી, જેમાં ઇરાનના સર્વોચ્ચ નેતા અલી ખામેનેઈ માર્યા ગયા હતા. વ્હાઇટ હાઉસના પ્રેસ સેક્રેટરી કેરોલિન લેવિટના જણાવ્યા અનુસાર, આ યુદ્ધ ૪ થી ૬ અઠવાડિયા સુધી ચાલે તેવી શક્યતા છે. આ દરમિયાન ઇરાનની એસેમ્બલી ઓફ એક્સપર્ટ્સે મોજતબા ખામેનેઈને પોતાના નવા સર્વોચ્ચ નેતા તરીકે પસંદ કર્યા છે.*

*અમેરિકામાં મધ્યસત્ર ચૂંટણીઓને ૨૩૯ દિવસ બાકી:  ભારતમાં ૪ રાજ્યો અને ૧ કેન્દ્રશાસિત પ્રદેશની ચૂંટણીની જાહેરાત થશે

એક તરફ અમેરિકામાં નવેમ્બર ૨૦૨૬માં યોજાનારી મધ્યસત્ર ચૂંટણીઓને હવે માત્ર ૨૩૯ દિવસ બાકી રહ્યા છે, ત્યારે ભારતમાં પણ ચૂંટણીનો માહોલ ગરમાયો છે. ભારતીય ચૂંટણી પંચ (ઇલેક્શન કમિશન ઓફ ઇન્ડિયા) આ સપ્તાહે દેશના ૪ રાજ્યો અને ૧ કેન્દ્રશાસિત પ્રદેશની વિધાનસભા ચૂંટણીના કાર્યક્રમની સત્તાવાર જાહેરાત કરશે. સત્તાવાર માહિતી અનુસાર, આસામ, કેરળ, તમિલનાડુ અને પશ્ચિમ બંગાળ એમ ૪ રાજ્યોની સાથે કેન્દ્રશાસિત પ્રદેશ પુડુચેરીની વિધાનસભાની મુદત પૂર્ણ થઈ રહી હોવાથી ત્યાં ચૂંટણીઓ યોજાશે. ચૂંટણી પંચ દ્વારા મતદાનની તારીખો, તબક્કાઓ અને મતગણતરી અંગેની વિસ્તૃત માહિતી પત્રકાર પરિષદ યોજીને જાહેર કરવામાં આવશે.

*બાંગ્લાદેશમાં ગંભીર ડીઝલ પેટ્રોલની સ્થિતિ અને વીજળીની કટોકટી: ઇમરજન્સી પગલાંના ભાગરૂપે તમામ યુનિવર્સિટીઓ બંધ

મધ્ય પૂર્વમાં અમેરિકા, ઇઝરાયેલ અને ઇરાન વચ્ચે ચાલી રહેલા યુદ્ધને કારણે સર્જાયેલી વૈશ્વિક ઉર્જા કટોકટીની ગંભીર અસર બાંગ્લાદેશ પર પડી છે. બાંગ્લાદેશ સરકારે ૯ માર્ચ સોમવારથી દેશની તમામ સરકારી અને ખાનગી યુનિવર્સિટીઓને બંધ કરવાનો આદેશ આપ્યો છે. શિક્ષણ મંત્રાલય દ્વારા ઇદ-ઉલ-ફિત્રની રજાઓ વહેલી જાહેર કરી દેવામાં આવી છે. આ કટોકટીના સમયમાં વીજળી, પેટ્રોલ, ડીઝલ અને કોલસાના જથ્થાને બચાવવા માટે આ ઇમરજન્સી પગલાં લેવામાં આવ્યા છે. સત્તાવાર સૂત્રોના જણાવ્યા અનુસાર, શૈક્ષણિક સંસ્થાઓ બંધ રહેવાથી હોસ્ટેલ, લેબોરેટરી અને એર કન્ડિશનર પાછળ વપરાતી વીજળીની મોટી બચત થશે. આ ઉપરાંત વાહનવ્યવહાર ઘટવાથી ઇંધણનો બગાડ પણ અટકશે. સરકારે વિદેશી અભ્યાસક્રમ ધરાવતી શાળાઓ અને ખાનગી કોચિંગ ક્લાસને પણ આ સમયગાળા દરમિયાન બંધ રાખવા સૂચના આપી છે.