તેહરાન:  ઈરાન અને પશ્ચિમી દેશો વચ્ચેના સંબંધો હવે ઈતિહાસના સૌથી નાજુક અને વિસ્ફોટક તબક્કે પહોંચી ગયા છે. વિદેશ મંત્રાલયના પ્રવક્તા ઈસ્માઈલ બગાઈએ એક સનસનાટીભર્યા પ્રેસ કોન્ફરન્સમાં દાવો કર્યો છે કે અમેરિકાનો અસલી ઈરાદો લોકશાહી નથી, પરંતુ ઈરાનની સાર્વભૌમત્વને છિન્ન-ભિન્ન કરીને તેના અઢળક તેલ ભંડાર પર ગેરકાયદેસર રીતે કબજો જમાવવાનો છે. બગાઈના મતે, વોશિંગ્ટન ઈરાનને આંતરિક રીતે નબળો પાડીને તેને વિભાજિત કરવાનું ષડયંત્ર રચી રહ્યું છે, જેથી મધ્ય-પૂર્વમાં તેનું વર્ચસ્વ કાયમ રહે. તેમણે વધુમાં ચેતવણી આપી હતી કે જ્યાં સુધી ઈરાની સરહદો પર લશ્કરી આક્રમણ ચાલુ રહેશે, ત્યાં સુધી કોઈ પણ પ્રકારની શાંતિ વાટાઘાટો કે યુદ્ધવિરામની આશા રાખવી વ્યર્થ છે.

આ રાજકીય ગરમાવા વચ્ચે, ઈરાને તેના નવા નેતૃત્વ હેઠળની દિશા સ્પષ્ટ કરી દીધી છે. ૨૮ ફેબ્રુઆરી, ૨૦૨૬ના રોજ થયેલા સંયુક્ત હુમલામાં સુપ્રીમ લીડર અલી ખામેનીના અવસાન બાદ, તેમના પુત્ર મોજતબા ખામેનીએ સત્તા સંભાળતા જ પશ્ચિમી દેશો સામે કડક વલણ અપનાવ્યું છે. ઈરાની ગુપ્તચર એજન્સીઓ અને સૈન્ય દળોએ 'એસેમ્બલી ઓફ એક્સપર્ટ્સ' દ્વારા નિયુક્ત આ ત્રીજા સર્વોચ્ચ નેતા પ્રત્યે પોતાની સંપૂર્ણ વફાદારી જાહેર કરી છે. બગાઈએ આરોપ લગાવ્યો હતો કે જ્યારે ઈરાન રાજદ્વારી માર્ગે ઉકેલ શોધવામાં વ્યસ્ત હતું, ત્યારે જ અમેરિકા અને ઈઝરાયલે હુમલો કરીને તમામ આંતરરાષ્ટ્રીય નિયમોને નેવે મૂક્યા હતા, જેના કારણે હવે ઈરાન માત્ર અને માત્ર આત્મરક્ષણ અને વળતો પ્રહાર કરવા પર ધ્યાન કેન્દ્રિત કરી રહ્યું છે.

વર્તમાન પરિસ્થિતિને જોતા, સમગ્ર વિશ્વમાં તેલના ભાવ અને વૈશ્વિક સુરક્ષા વ્યવસ્થાને લઈને ભારે ફફડાટ વ્યાપી ગયો છે. ઈરાને સ્પષ્ટ કર્યું છે કે દેશની જનતા પોતાના ભવિષ્યનો નિર્ણય પોતે જ લેશે અને કોઈ પણ વિદેશી શક્તિના દબાણમાં ઝૂકશે નહીં. આંતરરાષ્ટ્રીય નિષ્ણાતો માને છે કે મોજતબા ખામેનીના શાસન હેઠળ ઈરાન વધુ આક્રમક બની શકે છે, જેની સીધી અસર હોર્મુઝની સામુદ્રધુની જેવા મહત્વના વેપારી માર્ગો પર પડી શકે છે. આગામી દિવસોમાં મધ્ય-પૂર્વમાં યુદ્ધની જ્વાળાઓ વધુ પ્રબળ બનશે કે પછી કોઈ નવો વળાંક આવશે, તેના પર આખા વિશ્વની મીટ મંડાયેલી છે.